VUC atangin Bualhranga leh Rin Sanga IAS (Retd.) bang

Aizawl : ZPM Val Upa Council bultumtute zinga mi pahnih - Bualhranga leh Rin Sanga, IAS (Rtd) te chuan September ni 21 khan VUC aṭangin an bânna VUC Chairman hnenah an theh lut

  Bualhranga bânna lehkhaah hian Chief Minister sukthlek hmang chu a duh loh chin (Ram tâna pawi tur) a pêl tih te, ministry chu sawi mawi leh sawi mam ringawt thiamin a ho khawm tih te, CM chu mipat hmeichhiat thuah sawi sep a awm tih te, corruption-ah pawh sawi sep a kai tihte a tarlang a. Hengte leh chhan hrang hrang avangin bânna a theh lût tih a tarlang.

  ZPM VUC-ah hian Lalfak Zuala, IAS (Rtd) chu Chairman a ni. Bualhranga leh Rin Sanga te hi VUC bultumtute zinga mi, a tir tê atanga tel an ni.

Mizoram State Finance Commission pathumna chairman leh member-in hna zawm

Aizawl : Mizoram State Finance Commission pathumna chairman Lalnuntluangi Tochhawng, ICAS (Rtd) leh member Vanlalnghaka, MFAS (Rtd) te chuan September 23, 2026 khan an hna an zawm

  Chairman Lalnuntluangi Tochhawng hi ICAS 1984 Batch niin Mizoram sawrkarah finance commissioner leh principal secretary hna kum 2012 aṭanga 2017 thleng a lo thawk tawh a ni.

  Vanlalnghaka hi MFAS 1982 Batch niin, Secretary, Finance Department aṭangin 2012-ah a pension a ni.

  Sorkar notification chhuah dan chuan February ni 28, 2027 aia tlai loah report pe tura tih an ni a. Chief Controller of Accounts Office, MINECO-ah an office tur ruahman sak an ni. 

70th Batch Mizoram Police Constable-te’n bike bo hmu let

Aizawl: September 23, 2026 khan 70th Batch Mizoram Police Constable Chanmari West-a duty ten bike bo an hmu let.

  Thawhtanni atanga khan Traffic Unit, Aizawl-a probationary course hmang mek 70th Batch Mizoram Police Constable-te chu Traffic Police-te kaihhruainain Aizawl veng hrang hrangah traffic dan zawmlo dap chhuakin an duty tan a.

  Traffic Police Enforcement Team kaihhruaina hnuaia Chanmari West lama duty constable-te chuan Vaivakawn Police Station-a motorcycle bo report zinga mi bike pakhat chu an hmu let a ni.

END leh AR ten Heroin hawng 35 an man

Aizawl: Excise & Narcotics Department, 14th Bn. Assam Rifles thawk dun chuan September 22 khan Zote – Bulfek kawngpui, Champhai District-ah Heroin Gram 492 & mg 160 (Hawng 35) leh a neitu nia puh – Pauchinthanga (46) s/o Thangmanga, Helipad veng, New Champhai-a khawsa nia inchhal chu an man. 

  Heroin vanga man, Pauchinthanga hi Section 21 (c) of The Narcotic Drugs & Psychotropic Substances Act, 1985 (NDPS Act) tlawhchhanin thubuai siamsak a ni. Court-ah thiamloh a chang a nih chuan Kum 10 atanga kum 20 Jail tang tur leh pawisa Cheng Nuai 1 atanga cheng Nuai 2 thleng chawi bawk tura hrem theih a ni ang. 

Education and Awareness Session on Doping hmang

Aizawl: Sports and Youth Services Minister Lalnghinglova Hmar chuan September 24, 2026 khan “Education and Awareness Session on Doping” Sports and Youth Services Department buatsaih chu Conference Hall, Commissioner of State Tax, MINECO-ah Khuallian niin a hmanpui.

  Minister chuan international level thleng pha tur chuan trainers leh coach te tan tlan a ngaih thu leh tun anga theih tawp kan chhuah chuan infiamna lamah Mizo te chuan nasa takin hma kan sawn zel a beisei thu a sawi a ni.

  Resource Person Pankaj Singhal, Dope Control Officer cum Educator, National Anti-Doping Agency hnen atangin zirtirna ngaithlak niin program-ah hian trainers leh coach 75 an tel a ni.

Mizoram State Human Rights Commission member te kawm

Aizawl: Chief Minister Lalduhoma chuan September 24, 2026 khan a office-ah Mizoram State Human Rights Commission Chairperson leh member-te a kawm.

  Chief Minister hian lawmpuina leh an kal zelna tura duhsakna a lo hlan a. Hna an thawhna atana an mamawhte sawipuiin, an mamawh zualpuite chu a ranglama ngaihtuah a nih tur thu a hrilh a ni.

  Mizoram State Human Rights Commission Chairperson Pi Justice Marli Vankung, Former Judge, Gauhati High Court, member Vanlalenmawia, MJS (Rtd.) leh K. Lal Nghinglova, IAS (Rtd.) te hi kumin July ni 29 khan Mizoram Larsap General (Dr) Vijay Kumar Singh, PVSM, AVSM, YSM (Retd) chuan rinawmna thu tiamtirin a lalut a ni.

Mizorama a vawikhatna atana buatsaih Pluck and Pay Festival hawng

Aizawl: Mizorama a vawikhatna atana Tourism Department leh Khawzawl DC Office tangkawp buatsaih ni thum awh Pluck and Pay Festival hawnna inkhawm chu September 23, 2026 khan Vanhnuailiana Hall, Tualte-ah neih a ni a, Tourism Department Minister Lalnghinglova Hmar chuan khuallian niin hun a hmanpui.

  Pluck and Pay Festival hi September 23 – 25, 2026 chhung Chawngtlai leh Tualte khuaah neih a ni a. Festival chhimtu mipuiten a thlengtu khuaa loneitute huanah kalin thei leh thlai rah chi hrang hrang lovin, an lei nghal a. Chawngtlai field-ah kuthnathawktute thar chhuah leh siam chhuah zawrhna stall engemawzat a awm a, Zawlkhaw Adventure Club-ten zipline hmanga uai theihna an buatsaih bawk. 

  Chawngtlai Historical Society leh Tualte Vanglai Committee-te kaihhruaiin historical leh tourist site hrang hrang, Pathian tlang te, Nikuala Lungdawh te, Zo Hill Station te, pasalthate in hmun te leh hmun pawimawh dangte a tlawh theih a. Heng bakah hian mipuite intihhlimna tur Mizo infiamna hrang hrang buatsaih a ni bawk.

Education Department thawktute dinhmun sawiho

Aizawl:Chief Minister Lalduhoma hovin Education Minister Dr. Vanlalthlana leh Education Department official te, Finance Department leh DP&AR official-ten September 22, 2026 khan Education Department thawktute dinhmun sawihona CM Conference Hall-ah an nei.

  District Education Officer (DEO) leh Sub Divisional Education Officer (SDEO) post ruak tam lutuk tihziaawm dan sawiho a ni a. Circle Education Officer-te Sub Divisional Education Officer-a an kai chhoh ran theihna tur rawtna (proposal) awm mek chu a rang lama umzui tha an ti.

  Sorkar hian school hrang hranga zirtirtu hi Primary-ah regular 671 lak phalna a pe tawh a, a tahtawla lak tur niin tun sorkar kum kal mekah 100 lak phawt tur a ni. Middle School zirtirtu hi contract 544 lak phalna a pe tawh a, a tahtawla lak tur niin kuminah 212 lak phalsak an ni. High School zirtirtu hi regular 107 lak phalna pek an ni a, a tahtawl bawka lak tur niin kuminah 57 lak phalsak an ni.

Social Welfare leh Central YMA hruaituten ruihhlo chungchang inzirtina kalpui dan tur sawiho

Aizawl : September 22, 2026 khan Social Welfare Secretary Lalzarmawii, IAS kaihhruaiin Department hotute leh Central YMA hruaitute chuan Mizoram pum huapa Central YMA ten Ruihhlo Dona atana inzirtirna - Awareness & Capacity Building under National Action Plan for Drugs Demand Reduction Scheme under Ministry of Social Justice & Empowerment, Govt of India (MOSJE), an kalpui tur chungchangah inkawmhona an nei.

  Ruihhlo that lohzia inzirtirna kalpui dan tur sawi honaah hian Social Welfare Secretary Lalzarmawii chuan Ministry of Social Justice & Empowerment atanga kan ram leh hnam mamawh em em - ruihhlo chungchang inzirtirna atana hman tur sum thahnem tham tak Central YMA ten an dawng mai tur chu lawmawm a tih thu a sawi.

  Central YMA hruaitute chuan Ministry of Social justice & empowerment leh Mizoram Sawrkar hnuaia Social Welfare Department te chungah YMA Kumpuan - Ruihhlo Do kawnga hmalakna tur sum an dawng mai tur chu an lawmzia thu an sawi a. Daihzai tak leh tangkai taka hman ngei an tum thu an sawi a ni.

NITI AAYOG Regional Workshop

Aizawl: September 21, 2026 khan Mizoram Assembly House Conference Hall-ah NITI Aayog chuan hmarchhak bial tan Regional Workshop – Strengthening SITs to drive Viksit North Eastern Region a buatsaih a, a hawnna inkhawm hi Chief Minister Lalduhoma chuan telpuiin thu (keynote address) a sawi. Chief Minister hi K. Sapdanga, Home Minister bakah Minister leh MLA- ten an tawiawm a ni.

  He workshop- ah hian hmarchhak state zawng zawngte State Institution for Transformation (SIT) te an tel a, Mizoram sorkar official pawimawh thahnemtak an tel bawk a ni.