Home Minister hovin Mizoram Meitei aiawh te inkawm 

Aizawl : August 31 khan Home Department Commissioner & Secretary H. Lalengmawia hovin Home Department Officer-te leh Mizoram University & Pachhunga University College-a thawk Meitei aiawhte chuan Hmar Students’ Association leh Zirlai Pawl dangte'n Mizoram Meitei-te laka vauna lam hawi thuchhuah an siam chungchang an sawiho.
    Meitei te hian Mizoram Governor hnena Meitei faculty (Teaching and Non-Teaching) te'n Campus chhung leh pawna khawsa ten an hna an thawh chhunzawm leh thuai theih nana hma laksak tura an ngenna chungchang te sawiho a ni bawk.
    Meitei te hian Mizoram sawrkar leh University-a an thawhpuite, a bik takin Home Department hmalakna chu chhuanawm an tiin thlamuanthlak an tih thu an sawi a, Sawrkar leh mipui zahngaihnaah lawmthu an sawi.

CEC hovin Mizoram dinhmun enfiah

Aizawl : Chief Election Commissioner (CEC) Rajiv Kumar kaihhruai Election Commission Team chuan ni thum cham turin August 29 khan Aizawl an rawn theng a, State General Election lo awm tur atana inpuahchahnate endik turin an rawn kal an ni.
    August 30 khan Aijal Club ah chanchinbumite kawmin Chief Election Commissioner Rajiv Kumar chuan he thu hi a sawi a. Mizoram inthlanpui neih hun tur chu la tihchian a ni lo tih sawiin political party te ngenna angin Inrinni leh Pathianni chu a nih a rinawm loh a ti a. Inthlan senso zat chungchang zawhna chhangin tuna candidate pakhat senso theih zat chu nuai 28 a ni tih a sawi a, senso hi tisang turin ngenna a awm tih a sawi bawk.

CYMA Office-ah Union Minister lenglut

Aizawl : Govt of India, Ministry of Minority Affairs Minister John Barla chuan August 28 tlai khan Central YMA office-ah lengin Central YMA hruaitute a kawm, hnam hnuaihnung leh tlem zawk te tana theihtawp chhuah zel turin a ngen.
    Union Minister for Minority Affairs, John Barla chuan Central YMA hruaitute hnenah YMA-in Mizoram leh hnam tana a hnathawh thin chu ropui tiin a ngaihhlut thu a hrilh a. Hnam hnuaihnung zawk leh tlem zawkte tana theih tawp chhuah zel turin a ngen.
    Central YMA hruaitute hnenah hian Aizawl khawpui atanga Thingtlang leh hmun kilkhawr zawka ruang in phurh zung zung theih nan, Morque Van tha tak pek a tum thu Union Minister hian a sawi a, Central YMA hruaitute chuan lawmthu an sawi a ni.

John Barla hovin Rozgar Mela hmang

Aizawl : Assam Rifles buatsaihih August 28, 2023 khan Rozgar Mela/Job Fair tum 8-na 2 AR Gajraj Hall, Lakhimpur Battalion, Aizawl-ah buatsaih a ni a, he hun hi Union Minister of State for Minority Affairs John Barla chuan telpuiin Indian Government hnuai Central Armed Police Forces (CAPF) a hna hmu thar mi 68 te hnenah Appointment Letter a hlan a ni.
    Union Minister of State for Minority Affairs Pu John Barla chuan Mizorama Rozgar Mela hmanna puala Central Armed Police Forces hnuaia hna hmu thar mi 68 te hnena appointment letter pek chhuah a ni thei chu chhinchhiah tlak a tih thu sawiin, hna hmu thar leh an chhungte a lawmpui thu a sawi.

Mizoram State University din chungchang sawiho

Aizawl : August 31 khan Secretariat Conference Hall ah Higher & Technical Education Department Minister Dr. R. Lalthangliana hovin Higher & Technical Education Department leh MZU hotute chuan Mizorama State University din dan tur chungchang an sawiho a, Mizoram State University Draft Bill sawihona neih nghal a ni.
    Meeting chuan Bill Drafting Committee-in State University dinna tur atana Draft Bill a siam chu uluk taka zir hovin an sawiho a. NEP 2020 hnuaia State  University neih ngei a ngaih dawn avangin fimkhur tak leh uluk taka zirchiang chho chungin Mizoram State University din tura hma lak zel nise tiin an rel.

National Sport Day 2023 hmang

Aizawl : National Sports Day 2023 chu SAI Training Centre, Mission Vengthlang, Aizawl-ah August 29 khan hman a ni a. Sports Minister Robert Romawia Royte chu khuallian niin a hmanpui a. Major Dhyan Chand Best Athlete Award lawmman a sem bawk.
    Minister Robert Romawia Royte chuan infiammi kalkhawmte chu National Sports Day chibai a buk a. Covid hripui avanga India ram chhung state dang zawng zawng aiin Mizoram chu inkharkhip rei bik in, chuti chung chuan tunhnaia Mizo infiammi ten International Medal 166 leh National Medals 388, Regional Medals 296, a vaiin Medals 850 lai an hlawhchhuak chu ropui a tih thu a sawi a. Asian Games awm tawh tam takah Mizote an tel pha lo thin a, kumin Asian Games-ah erawh chuan Mizo thalai infiammi an tel tur chu lawmawm a tih thu a sawi.

Master Trainers Training on Ruihhlo Do

Aizawl : State Level Working Committee in Ruihhlo Do chungchang inzirna kawng a District tin aiawh tur training a buatsaih 'Master Trainers Training on Ruihhlo Do" chu August 30 khan Er.Lalrinawma, Minister Social Welfare & Tribal Affairs etc chuan State Veterinary Council Hall-ah hman pui.
    Training-ah hian District tinah atanga Master Trainer tura ruat mi pali (4) te chu lo telin, Master Trainer-te hian an mahni District huamchhunga zirna in (schools & colleges) leh Kohhran inkhawm hrang hrang (Sunday School, Naupang &Tleirawl Inkhawm, Thalai Inkhawm etc.) ah te Ruihhlo that lohzia an zirtir dawn a ni. 

ECI High Level Official te'n Mizoram tlawh

Aizawl : Chief Election Commissioner (CEC) Rajiv Kumar kaihhruai Election Commission Team chuan ni thum cham turin August 30 khan Aizawl an rawn theng a, State General Election lo awm tur atana inpuahchahnate endik turin an rawn kal a ni.
    Election Commision Team-ah hian Election Commissioner (EC) pahnih Anup Chandra Pandey leh Arun Goel te bakah Nitesh Vyas, Senior Deputy Election Commissioner,  Hirdesh Kumar, Deputy Election Commissioner, RK Gupta, Deputy Election Commissioner leh Election Commission of India hnuaia Official pawimawh tak tak sawmpahnih an tel a ni.

ECI Team in SVEEP Exhibition & Felicitation Programme an hmanpui

Aizawl : Chief Election Commissioner of India Rajiv Kumar kaihhruai Election Commission of India team chuan 31.08.2023  khan Assembly House Annexe Conference Hall-ah Systematic Voters' Education and Electoral Participation (SVEEP) exhibition leh voter te chawimawina hun buatsaih chu an hmanpui.
    ECI team hian Voter category hrang hrang - kum 80 chunglam, hmeichhe voter, young voter, Persons with Disability aiawh mi pakhat theuhte bakah State Icon pahnih - S. Malsawmtluanga leh Lalbuatsaiha te hnenah chawimawina hlan a ni.
    Inkhawm hian College hrang hranga Electoral Literacy Club (ELC) atangin leh upa pawl, PwD, Young voters leh hmeichhe voter aiawh sawm bikte an tel a ni. He programme zawh hian ECI team hian Delhi an pan nghal a ni.