Lunglei police station atanga tlanchhuak Denghmingthanga man

Aizawl : Lunglei police station atanga tlanchhuak Denghmingthanga chu September 3, 2026 tlai khan police ten an man.

  Ramdinpuii thattu a puh, Denghmingthanga chu Vanhne ram chhunga thlam pakhatah alo mu lai chu tlai dar 6:30 velah Vanhne VDP leh Police ten an man tih ZALEN thudawnna chuan a sawi.

  Tarlan tawh angin Thawhtanni zanlai khan Lunglei police station atangin Mualthuam North tleirawl H. Lalramdinpuii thattua puh Denghmingthanga chu a tlanchhuak a ni. 

  Police Custody atanga tlanchhuak Denghmingthanga tlanbo zana lock up a duty 2nd BN MAP Naik Lalnunfela chu September 2 khan suspend a ni.

High Commissioner of Vanuatu tur atan Muanpuii Saiawi ruat

Aizawl : India chuan High Commissioner of New Zealand ni mek Muanpuii Saiawi chu High Commissioner to the Republic of Vanuatu turin September 2 khan Ministry of External Affairs (MEA) chuan a ruat thar.

  2005-batch Indian Foreign Service officer, Muanpuii hi Vanuatu a thawk tura tih ni mah se, New Zealand khawpui Wellington-ah a cheng zui dawn a, a hna thar hi a zawm thuai beisei a ni.

  New Delhi chuan Pacific thliarkar ram nena an inkar hi tih that leh zual a duh avangin Muanpuii Saiawi hi dah a ni. India leh Vanuatu hi kawng tam takah an lo thawk dun tawh a ni.

NEET buaina vanga zirlaite laka FIR ziah luh Supreme Court-in thiat

Aizawl : Supreme Court chuan NEET zawhna put ru kaihhnawiha lungawilohna lan tirnaa kal zirlaite laka FIR ziah luh zawng zawng a thiah sak.

  Supreme Court chuan September 1, 2026 khan NEET zawhna put ru kaihhnawiha, July 20-25 inkara ramchhung hmun hrang hrang a lungawilohna lan tirnaa kal zirlaite lakha FIR ziah luh zawng zawng chu a thiah sak a, chhuizui a, bawhzui tawh lo turin hriattirna a pe. Hei hi zirlai te hmakhua tur an ngaihtuah vang niin an sawi.

CADC-a thawkte thubuai thehluh Gauhati High Court-in ngaihtuah

Aizawl : Chakma Autonomous District Council (CADC)-a hnathawk 211 ten thla li hlawh an lak tawh loh avanga thubuai an thehluh chu Gauhati High Court, Aizawl Bench chuan September 1, 2026 khan a ngaihtuah.

  Hemi chungchangah hian Gauhati High Court, Aizawl Bench chuan Mizoram sawrkar, CADC Chairman leh Executive Secretary-te chu kar li chhunga insawifiahna pe turin a ti.

  Thubuai thehluttu te hi Chakma Autonomous District Council Employees Association-a member te an ni a. CADC hnuaiah hian Grade-III leh Grade-IV hna thawk lai mek an ni. November 16, 2025 atanga March 31, 2026 thleng khan an hlawh hi pek an ni lo a ni.

Ruihhlo man thubuaia kum 10 lung in tang tura tih Gauhati High Court-in thiam chantir

Aizawl : Gauhati High Court chuan September 1, 2026 khan ruihhlo man thubuaia kum 10 lung in tang tur leh Rs. 1,00,000/- chawi tur a Special Judge, NDPS Court, Champhai-in hremna a pek tawh chu a thiat a, he thubuaiah hian thiam a chantir.

  Lalrosanga chuan he thutlukna hi pawm loin Gauhati High Court-ah criminal appeal a thleh lut a. Justice Kaushik Goswami chuan appeal hi pawmsakin, trial court-in thiam loh a chantirna leh hremna a pek chu a tihtawpsak a, thiam chantir a ni. 

Lalsavunga Park tlawh tumte Hlimen VC leh All NGO ten dang

Aizawl : Hlimen Local Council leh All NGO chuan Lalsavunga Park enkawl a nih dan chungchangah sawrkara an thil phutte a hlawhtlin loh avangin September 1, 2026 atang khan Park tawh theih lohin an dang.

  Lalsavunga Park enkawl dan chungchangah Hlimen Local Council leh All NGO te chuan Park enkawltu contractor chu a contract cancel turin sawrkar an ngen a, an ngenna a hlawhtlin loh avangin Park hi tlawh theih lohin an dang a ni. Hlimen khawtlang hruaitute chuan contractor an cancel hma chu park hi dan an tum tih ZALEN an hrilh.

Study tour-a kal pawl 9 zirlai Dilpui-ah tla hlum

Aizawl : September 1, 2026 khan Dennis Vanbawih Thawng (16) chu AH&Vety Dilpui, Thenzawl-ah a tla hlum.

  ZALEN thudawn danin Adventist English Academy School, Siaha zirlaite hian Thenzawlah Study Tour an nei a, chawhnu dar 2 velah class IX zirlai Dennis Vanbawih Thawng chu Dilpui-ah hian tla palhin, Ayush Hospital, Thenzawl panpui nghal ni mahse, chhan theih a ni tawh lo.

Rajya Sabha MP-in Aizawl Press Club tlawh

Aizawl: Mizoram Rajya Sabha MP K. Laltluangkima chuan MJA te sawmna angin vawiin khan Aizawl Press Club-a tlawh a, President hovin member thenkhat ten MP hi an lo dawngsawng a, lawmpuina thilpek an lo hlan.

  Monsoon session hmang zova a rawn hawn atanga a rilru-a awm lian tak chu MP Office neih a nih thu a sawi a, Chief Minister hnenah pawh a thlen a, mipui dawr theiah an awm a ngai a ti a, Office an neih loh chuan protocol a awm theih loh thu a sawi. MP te hian quarter an neih pawh tul a tih thu a sawi bawk.

I&WR Minister leh PHED Minister te Departmental Summit on Water, New Delhi-ah an tel

Aizawl: Irrigation & Water Resources changtu Minister PC Vanlalruata leh Public Health Engineering changtu Minister Prof Lalnilawma te chu, September ni 1 leh ni 2 khan Sushma Swaraj Bhawan, New Delhi-ah Departmental Summit on Water programme-ah an tel. 

  He Summit hi Ministry of Jal Shakti buatsaih niin, Prime Minister Pu Narendra Modi leh Union Minister for Jal Shakti, Pui CR Patil hova neih a ni. He Summit-ah hian State hrang hrang atangin Water Resources leh PHE changtu Minister te an tel a, ram chhunga tui chungchanga hmalakna hrang hrang thlirhona neih a ni a, Minister pahnih te hian thusawina hun an nei ve ve.

Myanmar lam mi hnen atangin Meth vaibelchhe 11 chuang man hu man

Aizawl : September 2, 2026 khan Lalpanliana, kum 29, s/o Valhrechina, Falam, Myanmar hnen atangin Methamphetamine kg 14.26, cheng vaibelchhe 11.408 man hu man a ni.

  Serchhip Sub-Divisional Police Officer Lalrinzuali leh Dulal Paul Intelligence Officer NCB kaihhruai Joint Operations Team - Narcotics Control Bureau (NCB), Field Office Aizawl (under Agartala Zonal Unit), DSB Serchhip DEF, leh CID (SB) te chuan rang taka bawhzui nghalin, September 2, 2026 zan dar 11:30 khan Tuichang Lei (bridge) atanga km 5 vela hlaah ruihhlo leh a neitu nia rinhlelh hi an man a ni. He case hi NCB-in a chhui zui dawn a ni.

CM-in Training cum Workshop on Prevention of Corruption Act, 1988

Aizawl: Chief Minister Lalduhoma chuan September 3, 2026 khan I&PR Conference Hall-ah Vigilance Department-in Mizoram Lokayukta, Anti Corruption Bureau leh Mizoram Police te puala an buatsaih Training cum Workshop on Prevention of Corruption Act, 1988 chu a hawng.

  Hawnna inkhawm hi Dr. YLN Reddy, Secretary, Vigilance Department chuan a kaihruai a, kalkhawmte lawmna thu a sawi a. A hawnna neih zawh hian Technical Session nei zuiin Lokayukta member Joel Joseph Denga, Member, Law & Judicial Secretary TL Guite, Secretary leh Dr. HTC Lalrinchhana ten training an pe a ni.

Lalrinpuii’n ‘MCON 39th Graduation and Lamp Lighting Ceremony 2026’ hmanpui

Aizawl: Health and Family Welfare Minister Lalrinpuii chuan September 1, 2026 khan Mizoram College of Nursing, Falkawn-ah zirchhuakte thlahna leh zirlai thar lawm luhna hun ‘39th Graduation & Lamp Lighting Ceremony 2026’ chu khuallian niin a hmanpui. Aizawl South III Constituency bialtu MLA Baryl Vanneihsangi chu khaulzahawm a ni.

  MCON hi kum 2005-a kalpui tan a nih atangin zirlai 528 an zirchhuak tawh a. Kumin atangin Mizorama a hmasa ber ni turin seat sawm awmna Master of Science (Nursing) an hawng a, nikum lamah Post Basic B.Sc Nursing an hawng tawh bawk. Thawktu, Teaching Staff 21 leh Non-Teaching Staff 29 an awm mek a, tun session-ah hian zirlai 198 awmin, State pawn atangin PM Special Scholarship (PMSS) Scheme hnuaiah Jammu and Kashmir leh Ladakh atangin zirlai 7 an awm bawk a ni. 

  39th Graduation & Lamp Lighting Ceremony 2026-ah hian BSc. Nursing zirlai thar mi 33 lawmluh an ni a. B.Sc Nursing 2026 exam-a Year tina tithate hnenah ‘L.Chhawnkima Award’ hlan an ni a, B.Sc Nursing 1st - 8th Semester University exam-a Mizoram pumpuia Top- 3 rank holder-te hnena an hlan thin Academic Excellence Award chu PC Lalnuntluangi hnenah hlan a ni. 

Telangana sawrkar tirh Mizoram Directorate of Nursing rawn zirchiangtu ten Health Minister kawm

Aizawl: Telangana State sawrkar hmalaknaa Directorate of Medical Education, Government of Telangana, Hyderabad atanga lo kal, Directorate of Nursing, Government of Mizoram rawn zirchiangtu mi pathum te chuan September 2, 2026 khan Health Minister Lalrinpuii an kawm.

  He study team hi Mizoram Directorate of Nursing zir chiang tura Telangana sawrkar-in an rawn tirh te an ni a. Directorate of Nursing hi Telangana State-ah din tura hmalak mek a nih avangin, an din theihna tura hmalakna pakhat atan leh zirchianna nei turin Directorate of Nursing, Health & Family Welfare Department, Government of Mizoram hi an rawn thlang a ni.

Minister Lalnghinglova Hmar hovin LESDE Department Review Meeting nei

Aizawl: Labour, Employment, Skill Development and Entrepreneurship (LESDE) Department chuan September 1, 2026 khan Minister Lalnghinglova Hmar hovin Departmental Review Meeting an nei a. LESDE Department hnuaia hmalakna leh hmachhawp te, inkaihhruai dan hrang hrangte thlirletin hmasawn zelna turte sawiho a ni. He hunah hian Dr. Lalhriatzuali Ralte, Secretary, LESDE Department chu Convener a ni.

  Meeting-ah hian Department hnuaia subordinate office hrang hrangte hnathawh dan leh kalpui mek program-te thlirho a ni a. Thalaite hamthatna, eizawnna, skill development leh mahni kutkea dinna (entrepreneurship) kawnga Department hmalakna te chu chak zawka kalpui leh hmasawn zel dan tur ngaihtuahho a ni.

  Meeting ah hian Directorate of LESDE, District Office te, (MBOCWWB), Mizoram Youth Commission (MYC), Government Industrial Training Institutes (ITIs) leh ESI Dispensary-te atangin hmalakna hrang hrang leh hmasawnna dinhmun Powerpoint Presentation hmanga thlirho a ni bawk.

Khawhai chhiat tawkte hnenah Ex-Gratia hlan

Aizawl: September 1, 2026 khan Khawhai khua, Khawzawl District-a Ngurkhuma in kangah a tunu Lalhriatzuali chuan nunna a chan a. SDC R. Lalrinhlua leh SDC Lalthanpari Khawlhring ten in kang hi a hmunah kalin an enfiah a, lusun chhungte hnenah SRDF dan angin ex-gratia cheng nuai 4 leh silpauline an hlan.

‘Mizoram Green Schools League’ Minister K.Sapdanga’n a tlangzarh

Aizawl: UD&PA Auditorium, Directorate of UD&PA, MINECO-ah, Swachha Bharat Mission 2.0 hnuaia Mizoram puma faina leh thianghlimna kawnga School inelna tur ‘Mizoram Green Schools League’ hawnna hun chu September 1, 2026 khan neih a ni a. Urban Development & Poverty Alleviation Department Minister K. Sapdanga chu khuallian niin a hawng. 

  ‘Mizoram Green Schools League’ hi UD&PA Department chuan Swachha Bharat Mission 2.0 hnuaia faina kawnga Mizoram puma School inelna buatsaih a ni a, Mizoram Green Schools League hi Block Level, District Level leh State Level-a kalpui tur a ni a. 

  Block level-a School titha 5 thlanchhuahte hi District Level-ah endik leh an ni ang a. District Level-ah hian a thazual 3 thlanchhuah an ni leh ang a. State Level-a inel turin District tin atangin a titha ber an tel dawn a ni. Ruahman dan chuan, School fai inelna endik hi October ni 12 atanga kalpui tan tur niin December ni 18 thleng awh tura tih a ni.

Mizoram sawrkar hnenah SELCO Foundation ten Electronic Vaccine Carrier 30 hlan

Aizawl: September 1, 2026 khan Health Minister Office Chamber, MINECO-ah Mamit, Lawngtlai leh Lunglei District-te tana hman tur Electronic Vaccine Carrier 30 (sawmthum) chu SELCO Foundation chuan Health department changtu Minister Pi Lalrinpuii kaltlangin Mizoram sawrkar hnenah an hlan.

  Heng EVC-te hi darkar 35 chhung 2°C–8°C inkarah vaccine-te a vawn that theih a, hmun kilkhawr zawk a awmte tan a hun taka vaccine an lak theih nan a tangkai hle tur a ni a. SELCO foundation-in Mizoram sawrkar an hlan tak EVC-te hi ken kual awlsam leh zangkhai, solar hmang niin, pakhat hi cheng nuai 1 leh sing 5 man lai a ni. 

Smart meter vuah mek chungchang thlirho

Aizawl: P&E Minister F Rodingliana hoin August 31, 2026 khan a Office Chamber-ah RDSS Scheme hnuaia Smart Meter vuah mek chungchang hmalakna leh harsatnate Department official te nen sawiho na hun an hmang.

  He meeting-ah hian smart meter hman ngei ngei a ngaihchhante tarlan niin, India ramah electric kal ral (loss) tam tham tak tihhniamna turin, Ministry of Power chuan RDSS: Loss Reduction Scheme a duang chhuak a, he scheme hnuaiah hian Smart Meter vuah runpui chu ram pumah neih a ni ta a ni.

  He hunah hian Smart meter avanga harsatna tawkte puihna tur leh complaint thehluhna tur Customer Care Centre(CCC) te nasa zawka puanzar rel a ni a, electric bill chungchanga harsatna neite chuan landline telephone number 0389-2310169/2322174, Whatsapp No. 8132801559/6009192434 emaw, mahni bialtu Electric Department Office-ah harsatna te thlen theih reng a ni a, P&E Department chu mipui harsatna chingfel turin a inpeih reng thu tarlan a ni.

Winter Festival 2026 Organising Committee thukhawm

Aizawl: August 31, 2026 khan P&PI Conference Hall-ah Chief Minister Lalduhoma hovin Winter Festival 2026 Organising Committee-te an thukhawm a, Winter Festival 2026 hman dan tur an rel a ni a, nikum lama Winter Festival neih tawh dan thlir let bawk a ni.

  Chief Minister chuan Mizoram chu Winter Capital of India-a siam kan tum mek a, chu mi atana kan hmalakna langsar ber chu Winter Festival hi a ni a. Entrepreneurship lama Mizoram tihlarna hmanrua tur a ni. Tourism Department bul tuma kalpui ni mahse department zawng zawng nena thawhho (convergence) ngai nih avangin department hrang hrangte an inko khawm a. Meeting-ah hian Tourism Department Minister Lalnghinglova Hmar leh department hrang hrang hotute an tel a ni.