MNF Thalaiin kawng an siam

Aizawl : September 5, 2024 khan Mizo National Youth Front (MNYF) bul tumin Aizawl khawpui chhunga motor kawng chhe lutuk thawmthat hnatlang neih a ni a. He hnatlang hi MNF General Headquarters Treasurer Lalruatkima chuan a telpui.

   Lalruatkima chuan, "Vawiin ah Kawng chhiat lutuk avanga, Mipui leh Lirthei khalh tute thlavang hauh a, Kawng siamtha thuai tura sawrkar muthlu kaihthawhna tura, Aizawl khawpui hmun lunlai ah MNF Thalai bultumin, Kawngchhe siam Hnatlang koh a ngai ta hial mai hi a pawi a ni," a ti.

Cheng 5,36,04,200 man Meth man

Aizawl : 3.9.2024 zing khan CID Crime hnuaia Special Narcotics PS team chuan an thudawn bawhzuiin Lungverh, Sakawrtuichhun area-a beihpui an thlaknaah Methamphetamine kg 41.234-a rit, Rs. 5,36,04,200 man hu chu an man.

   He thila inhnamhnawih mi panga - Edenthara (27), s/o Tlangthanga, Rihkhawdar, Myanmar (Present Address Zemabawk) nia inchhal; Rochharliana (38) s/o Sangtinkulha, Hruaikawn, Champhai District nia inchhal; Vanlalvunga (47) s/o Vanlalmawia, Khuangleng, Champhai District nia inchhal; Nasir Uddin (34) s/o Junab Ali, Karimganj, Rupargool District, Assam nia inchhal leh Anurul Haque (37) s/o MD Abdul Rasid, Baghan, North Tripura nia inchhalte an man tel.

Buaina siamtu naupang 5 man

Aizawl : September 2, 2024 khan Diakkawn field-ah insualbuai an awm a, police te hriattir an nih hnuah YMA te nen tang tlangin kumtling lo naupang 5 man an ni.

   New Diakkawn leh Vengthar YMA hruaitute ten Diakkawn field hi an pan nghal a, police te pawh an thleng thla ve nghal bawk. Mahse thenkhat chu lo tlanchhia a, YMA hruaitute nen tangtlangin an vai hian man vek an ni. Buaina siamte hi naupang kum tlinglo vek an nih avangin 'Juvenile Detention' ah dah an ni thung.

Tualthattu nia rin pafa man

Aizawl : August ni 23, 2024-a Sairang Dinthar ramchhung, Thlangtlak rama mihuan thlam nghak, Jharkhand lam mi, Hemron (Tlangvaltea) a chenna thlam chhunga a ruang hmuh tak thattu nia rin, JH Rokunga (60) leh a fapa JH Vanlalhriatpuia (20), Samseia te pafa tia hriat larte chu police ten September 2 khan an man.

   JH Rokunga te pafa hi awmna mumal nei lo an ni a, mobile phone pawh an nei lo a, an hnu chhui a harsa hle niin thudawnna chuan a sawi a, ngawrh taka Mizoram Police ten an chhui hnu-ah nimin khan Rangvamual kawng chhak lama thlam ram deuh tawh pakhat atangin man an ni a, Sairang Police Station-ah lak hnuah September 3 khan Court-ah hruai an ni.

Chief Minister-in Chin Community te hun hmanpui

Aizawl : September 4, 2024 khan Indiana State, USA a cheng Chin Community te chuan Townhall Meeting Programme an buatsaih a. He hun hi Chief Minister Lalduhoma chuan khuallian niin a hmanpui.

   Thu a sawinaah Chief Minister chuan, Mizo Society of America ten US a zin tura an sawmnaah lawmthu a sawi. Duhsakna tinreng nena an lo dawnsawn avanga vannei a intih thu a tarlang. Chin Community Townhall Meeting-ah hian Rev Vanlaldinga'n hunserh a hmang a, Rev. Dr. Thlaawr Bawihrin chuan kal khawmte lawmna a sawi a, Indian Ambassador Somnath Gosh pawhin thusawina hun a hmang bawk.

MRB-in Teachers' Day lawmpuina hlan

Aizawl : Mizoram Rural Bank (MRB) chuan Zirtirtute Ni lawmpuina atan September 5, 2024 khan CSR kaltlangin sikul 27 te hnenah Water Cooler, Bookshelves leh Computer set-te an hlan a. Hei bakah hian khaw hrang hranga MRB Branch 105 ten sikul 420 te hnenah cake an pe bawk a ni.

PHED tui pipe atanga tui put vilna tur Application tlangzarh

Aizawl : September 5, 2024 khan Public Health Engineering Department Minister Prof. Lalnilawma chuan E-in-C Meeting Hall, PHED Office-ah PHED pipe atanga tui put vilna tur 'Water Leakage Reporting Software System' a tlangzarh.

   'Water Leakage Reporting Software System' hi PHED leh Buannel Geo Solution & Services buatsaih a ni a. Mobile phone hmangin Android Playstore leh Apple App Store atangin a thlawnin download theih a ni. He application hmang hian PHE a thawktute hnenah phone kaltlangin tui putna thlalak thehluh mai tur a ni a, rang takin thawktuten an bawhzui nghal dawn a ni. He application hmanga PHED thawktute hnena tui put report pe tha te hnenah lawmman siam tum a nih thu tarlan a ni.

CM-in USTDA te a office-ah kawm

Aizawl : September 3, 2024 khan Chief Minister Lalduhoma chuan Verinda Fike, Regional Director, Indo-Pacific US Trade & Development Agency (USTDA) chu a office-ah a kawm a. Mizoram tana hmasawnna hna thawk ve tura sawmin a rawtnate a thlen.

   Chief Minister hian Mizoram tan project lian tham eng engemawzat an sawipui a, chungte chu USTDA hian a sector changtu bik department-te a enfiah tir a. Bawh zui zel tlaka an ngaih te chu a thlawnin master plan te, project readiness plan te siam sak thei tih thu Verinda Fike hian a lo hrilh a, USTDA aiawha India ram enkawltu bik pawh be nghalin, hma lo lak pui turin a hrilh a ni.

Mizoram sawrkar aiawh leh AR ten insawn chhuah dan tur sawiho

Aizawl : September 4, 2024 khan August ni 26-a Chief Minister Lalduhoma leh Assam Rifle Director General Lt. General Vikas Lakhera, VSM, SM te inkawmna bawhzuiin Vanlaldina Fanai, Commissioner & Secretary to Chief Minister hovin Mizoram sawrkara Home Department leh Revenue Department aiawhte leh Assam Rifles hotute chuan Assam Rifles Office's Mess ah Assam Rifles insawn chhuah chungchang sawiin inkawmna an nei a. A ram awm dan te pawh an en ho nghal.

School Education Department leh NEDFi te'n thawhdunna thuthlung an ziak

Aizawl : Vawiin chawhma dar 10:30 khan School Education Department, Govt. of Mizoram leh North-eastern Education Development Finance Corperation Ltd. (NEDFi) te chuan September 4, 2024 khan Directorate of School Education Conference Hall, Aizawlah thawhdunna thuthlung an ziak.

   He thawhdunna thuthlung 'Advancing North East Initiative for Career Mentoring of Students' hnuaia ziahna hun hman hi School Education Minister Dr. Vanlalthlana chuan khuallian niin a hmanpui. Thawhdunna thuthlung hi Mizoram aiawhin Lalsangliana, Director, School Education Department, Samagra Siksha State Project Director ni bawk leh NEDFi aiawhin SK Baruah, Executive Director te chuan an ziak a ni.

Mizo Society of America Mizo Day 2024 hmanpui

Aizawl : September 2, 2024 zan khan Rockville, Maryland, USA ah Mizo Society of America bul tumin Mizo Day 2024 lawm a ni a. He hunah hian Chief Minister Lalduhoma chu khuallian niin a hmanpui.

   Chief Minister chuan, Mizo Society of America te hian 2020 khan Mizo Day a khuallian turin min lo sawm tawh a. Covid19 hripui avangin rawn kal kha a remchang lova. Online in LPS studio atangin ka rawn zawm a. Vawiinah mahni ngei kala kan rawn tel thei ta hi ka lawm hle a ni, a ti. Hna thawh tur tam tak a neih avanga a cham rei theih dawn loh thu a hrilh bawk.

Tourism Ministers Conference-ah Lalrinpuii tel

Aizawl : September ni 2, 2024 khan Union Minister for Culture & Tourism Gajendra Singh Sekhawat leh Union Minister of State for Tourism Suresh Gopi te kaihhruainain Vivanta, Shillong, Meghalaya-ah North Eastern & Eastern States/Union Territories Tourism Ministers Conference hman a ni a, Mizoram aiawhin Tourism Minister Lalrinpuii chu a tel.

   Lalrinpuii chuan he huna tel Khualliante leh Tourism Minister-te chu Mizorama rawn zin tur leh, Mizoram mawina leh khualzinte chunga a thatnate, hnam nunzia leh tih dante rawn hmu ve tura sawmin, indaidannate thiata North East-ah Tourism hmanga danglamna thlen tum theuh turin a sawm nghal bawk.

ERO leh AERO te training pe

Aizawl : Special Summary revision of Electoral Roll 2025 neih tur inbuatsaihna atan Aizawl District chhunga ERO leh AERO te 02.09.2024 khan Aizawl DC Conference Hall-ah training pek a ni a. He training programme hi Aizawl DC Er. Lalhriatpuia chuan a hawng.

   Ram khua leh tui vote nei thei chu electoral roll ah an hming thun a nih ngei theih nan Special Summary Revision of Electoral Roll hi neih thin a ni. Hemi hun chhung hian kum tling thar, siamthat leh insawn te tan dil theih a ni thin a. Training-ah hian hemi atana pawimawh leh inbuatsaih ngai inhrilhfiah a ni. Tun tum Special Summary Revision of Electoral Roll neih turah hian 1.1.2025 a kum 18 tling chin te an lut thei ang.