March 8, 2024; Tourism minister Lalrinpuiin Thenzawl Golf Course chu a enkawl a hautak avangin 'sum thuni nu' a ni tih a sawi.

Vawiin Assembly Budget Session zawhna leh chhanna hun ah memberte zawhna chhanga he thu hi sawiin, tourism minister chuan, Thenzawl Golf course chu enkawl a hautak hle tih a sawi, "Sum thuni nu a ni ringawt mai a, a inenkawlzo lo a, a harsa em em a ni, outsource dan te ngaihtuah i la kan ti a, council of minister te nen a ngaihtuah tura chhawp chhuah tum a ni," a ti.

Thenzawl Golf Resort hi Swadesh Darshan hnuaia Rs. Nuai 6448.08 senga zawh fel a ni a, Edufice Infraservices Private Limited, New Delhi-in contract hna hi thawkin, January, 2016 khan bul tan a ni a, April ni 22, 2019-ah hna zawh a ni.

Eco log huts 30, Cafetari, convention centre, Gazebos 8 leh 18 hole Golf Course, parking te a awm. Thenzawl Golf course hi Graham Cooke & Associates design a ni.