Inthlan kumte a nih dawn avangin mipui leh hruaitu tha pawimawhzia kan ziak nual a, chik taka lo zir tan chuan nunpui thama hlawkpui nana hman ngeina tur chu a ni. Pathian thu duh em em Mizo Kristiante hi heti em ema inzirtir pek ngai chu kan ni lo maw le, engvanga Pathian thu hi a taka nunpui harsa em em nge kan nih tih pawh hi chhut ngial tham a ni. Kohhran inkhawm pelh ngai lo talte hi chuan a taka nunpui awm? Awm khawmna hmunah Pathian thu kan sawi khawm laih laih a, sawi ve vak lo te chu khawro viauah kan ngai a, a sawi thei hlei hleite hian an nun chhuahpui lo em ni aw? tih tur hian ni tin nun kan hman danah hi chuan chhuan tur kan nei lo chu a nih hi maw!! Kohhran inkhawm kan sel lo ve, sawi chhuah tum zawk erawh chu buaipui ngai nun hi kan nunah hian a bet hnem lulai lutuk mawlh hi a ni. Politician fing leh thusawi thiam kan tihte hlei hlei hi kan hmu hlauhawm zo vek dawn a lawm le!! Tun tum chu hawina lam han dan ve hlek teh ang,mihring ten kan chenpuite hi kan hmangaih lo riau-a hriatna ka nei a, kan in mamawh tawn em em a, Pathian thilsiam chungnung berte hian kan chenpui thing leh mau te, ramsa zawng zawng te, sava mawi tak takte hi kan hmangaih lo va, a tichhe tu, tichereutu dik tak chu mihringte bawk hi kan ni. Mihring bawk hi zirtir ngai chu kan lo ni reng mai a. Pathian thilsiam mawi tak takten damna min pe, theihtawkin Pathian an chawimawi. Zan mut a lo hun a, kan piah thing chu thliin a chhem ri sung sung mai a, thliin thing a rawn chhem ri hriat atang chuan thli a thaw a, chunglam atangin ruah a hnai ani tih ka hre mai, tukverh atangin boruak thiang tak a rawn lut seng seng a, chu chuan khawlum lutuk tur a chhem dai a, ka harh sawng sawng a, ka dam sawng sawng hian ka hria, Pathianin zan hahchawlhna min pek hmang chuan tui takin ka muhil a, zing vartian a lo ni, ka harh chiah chu kan piah thing hmunah chuan sava hram mawi tak mai ka hria, an chiar nap nap a, an hlim em em si a, an theihtawkin anmahni siamtu Pathian an fak ni berin ka hria, chu chu kei pawhin nuam ka ti em em a ni. Pangpar mawi tak tak ten siamtu an fak a, khawthiang em em karah ral hla tak han thlir ila, a mawizia lah sawi hleih theih a ni lo, van chung sang han thlir ila, mihring rilruin a chhui phak loh, van thengreng awm ruih mai te chuan Pathian ropuizia an va pho lang tak em!! Zan khaw thiang tak kara arsi pe un mai te, mihringte rilru tihlim tawk tur chauha zana thla eng ruih mai te hmuh chuan siamtu ropuizia a lang. “Vante khian Pathian ropuizia chu a hriattir a; Boruak zau tak khian a kut chhuak chu a lantir thin a” (Sam 19:1).  Leilung leh a chhunga awm zawng zawng hi Lalpa ta a ni a, thilsiam zawng zawng hian Lalpa chawimawi hi a phu a ni. Chu chuan damna min pe a, a ropuizia a lo lang, amah chu fak mai tur kan va ni em!! Vana Vantirhkoh awm zawng zawng te, ni leh thla te, Arsi engho zawng zawng te, Lei atanga tuifinriat thuk taka nungcha zawng zawng te, mei leh rial te, vur sur leh chhum te, Tlang lian tak tak te, Ramsa leh ran zawng zawng te.. Mihring awm zawng zawngte hian Lalpa chu fak mai tur kan nihzia SAM 148-ah hian a lang a ni. Sava, ramsa, thing leh maute tichereutu chu mihringte hi kan ni: Hmanlai boruak leh  tunlai boruak han khaikhinin han thlir ila, hawina lam apiang hi a kawlh seng sung tawh a, mihring kan chenna tawhah chuan thing lah a ding hlei thei lo, sava te lah kan umbo zo tawh, khua lah a lum tulh tulh tawh a, sava kan hmuh apiang perh thlak kan tum a, chempui kan hum tawh chuan  kan lak loh tur pawh thing kan hmuh chuan kan fik hmawk zel a, ram kan kal a, ramsa ei turin kan kap a, zawng kan kap thla a, zawng nupa, zawng nufa pakhat zawk khawngaihthlak takin kan that a, a la dam zawk khawhar takin kan siam a, lungngaiin an chiau vawng vawng a, an tap ve nasa teh a sin. Ram ngaw kan thiat a, chu chuan tui a titlem tial tial a, kan khua a ro a, a tuartu chu mihring bawk hi kan ni si, tun hnu hian he lama inzirtirna hi kan hre chhuak thar a, theihtawp kan chhuah chung pawhin thing pakhat rawn thang lian chho tur chuan hun a duh thin a ni. Mihring duhamna luatah luia sangha te turin kan hrai hlum teuh a, a eitu tur mihring bawk kan ni a, hriselna atan a tha lo chungin  kan sum duh luatah keimahni leh keimahni kan inhrai hlum lo chauh a ni si. Luia sangha kan tichereu nasa em em, Pathianin in ei tawn tura min siam avangin kan ei khawp chu thianghlim takin kan man thei a, heng vang ni lo, mihring duhamna leh sumdawnna avangin kan vela thil tam tak kan tichhe mek zel a ni. Pathian ringtu tan phei chuan kan sim vang vang a hun ta hle mai.  Pathian thilsiam vek mihringin kan ti chhe nasa lutuk avang hian Pathian thua inzirtirna pawh hi kan thlahthlam hle a ni tih tun hnu hian Pathian thu zir mite chuan an rawn hmu chhuak thar zel a ni. Pathian ringtu keini Kristian te hian Pathian thilsiam dangte hi kan suat nasa bik em ni? tih turin kan che nasa a, Kristian lo, sakhaw dangte zawk chuan thilsiam dang humhalh leh duat taka enkawl hi an lo inzirtir nasa zawk hle niin a lang. Bible han en ila, thilsiam dangte duat taka enkawl a ngaihzia a awm teuh si a; mahse, engati nge heti em ema kan duat loh a, kan suat vak vak mai tih hi ngaihtuah tham tak a ni. Khawvel hmun hrang hranga Kristiante hi kan ni zual deuh em ni? tih hi tun hnai mithiamte ngaihdan rawn chhuak atang hian a hriat theih ta a ni. Pathian thilsiam dangte lo humhalhtu tur ber chu mihringte hi kan ni a, nasa leh zuala tan kan lak a pawimawh a, Pathian thuah pawh nasa leh zuala zirtirna inpek hi ringtute tih tur a ni. Eco-Theology apiang, Kristiante Pathian thu kalpui dan chik taka zir a, hriat a tul: Thilsiam dangte tha taka humhalhtu ber tura ngaih Kristiante hian kan tih tur kan ti lo va, thilsiam dangte kan suat nasa nia hriatna hi sakhaw dangte hian min hmuh dan niin a lang. He lam thu pawh hi chhiar tur tam tak a awm tawh a ni. Thilsiam dangte humhalh a, duat taka enkawl a nih theihna turin Pathian thu kan zir dan pawh uluk leh chik zawka inzirtir a ngai a ni tih Pathian thu thiamte chuan tun hnai mai khan a rawn hmu chhuak thar a ni. Pathiam kutchhuak vek kan ni a, chhungkhat vek kan ni a, tumah intichhe thei bik kan awm lo va, kan inmamawh tawn vek ani tih hi kan hriat tur pawimawh tak chu a ni. Helam hi chu ka chhiar tlem em avangin han sawi zau a, sawi ngaihnawm dan ka hre the chiam lo. Aw Lal Pathian, i kutchhuak thilsiam: He hla mawi tak maiah hian Pathian thilsiam hlutna a rawn pho chhuak tha hle a, a phuahtu hian, “Aw Lal Pathian, I kutchhuak thilsiam tinreng, Dawn changin mak tiin ka lo khat thin… Lentupui leh tukram phulleng fan changin, Sirva zai mawiten sang thing tin awi e: khua chuan ila, tlang sang tinreng atangin, Dam te’n luang e, lui leh thlifim nuamte…,” tiin. He hla phuahtu Swedish Pastor Rev. Carl Gustov Boberg hian Pathian thilsiam mawizia a hmu fiah hle a, mawi takin a rawn phuah chhuak ta a ni. Khawpui lo ri dur dur a, tek a phe zuai zuai a, thli a thaw vuk vuk a, chhum let tup tup kara malsawm ruah rawn tla seng seng zawha khaw thiang tak leh engmawi  em em mai chuan a rilru a hneh hle a, khaw eng mawi tak kara thing hnah thianghlim em em mai te, sava hram ri hriat tur awmte chuan Pathian thilsiam mawizia leh ropuizia a hmu chiang hle a ni. Kum zabi sawmhnihna chhunga Pathian fakna hla tha berte zinga mi a ni an ti thin. Kum 1957 New York, Billy Graham Crusade-ah khan an sa lar vet vet hle a, mipuiin an sa kham thei lo an ti hial a nih kha. Khawvel milar tak takin thiam takin an sa a, Elvis Presley te, Carrie underwood, George Beverly Shea te leh mi dangten an sa a ni. Pathian thilsiam tinrengte hi hmangaih ila, duat ila, kan inmamawh tawn vek a, chhungkhat kan ni tih hi i theihnghilh lo vang u. Luia nungchate pawh sawrkar mai bakah YMA ten theihtawp chhuahin an khua/vengah a humhalhna hna an thawk a, a sawt hle a ni. Zoram hmun hrang hrang inkal pawhna kawng sirah thing mawi tak takte awm tluan chhuak vek thei se, khawpui chhungah kumtluana thing hring reng chi te, mawi tak taka par vul chukte hi awm chek chuk se, nun a tihlim a, boruak tha min pe a, hriselna atan pawh a tangkai hle a ni. Mihringten nasa taka kan tihchhiat avang hian khawvel sik leh sa lo danglam chho zel hi hlauhthawn awm a ni chho zel tih mi thiamte chhut dan a ni. Pathianin khawvel a siam laia a duh taka a siam enkawl hi kan hna a ni. Thlai chi hrang hrang, theirah te Pathianin kan ei turin min pe a, duat taka humhalh hi kan hna a ni. Ni thum nia Pathianin a thilsiam te a en a, tha a ti hle tih kan hmu a ni. Kumtin maia khaw lum zual deuh deuh te, kan lei tuam tlattu boruak ‘Ozone Layer’ pawp nasa zual zel nia an hriatte hian mithiamte lu a tihai hle a, keimahni ngeiin kan chenna hi chenna tlak loah kan siam zel dawn niin a lang. Khaw lum lutuk vanga sik leh sa lo danglam, vur tlang khawn tlatte a rawn tui zawih zawih a, chu chuan tui chim chin a tisang zual zel a, kan chenna thlengin harsatna a la rawn siam zel dawn a ni. Ram ngaw kan ti chereu nasat avangin nungcha tam takin chenna an nei lo va, hei vang hian Pathian thilsiam zinga chungnung ber mihringte hian kan chenpuite hi hmangaih taka kan duat a ngai a, kan humhalh tlat tur a ni. Kan chenpuite kan hmangaih loh chuan keimahni pawhin kan tuar zel.