Aizawl; Thinghlun ram chhung a John Zolawma thlam hal chhiatna hmun bul, ramri dep a BSF te inkulhna chu thuam that mek niin, Mizoram 4th IR te in kulhna erawh thuam that a la ni lo a, thuam thatna tur sum erawh ruahman fel a ni tawh.

ZALEN thudawn danin October 9, 2020, Zirtawpni a ramri dep a buaina thleng avang khan Mizoram 4th IR platoon khat te chu duty in an awm mek a, an inkulhna tur chu Assam lamin thlam an hal sak John Zolawma ram chhungah sak tur niin, hemi atan hian sawrkarin sum a ruahman fel tawh a, Covid 19 hripui leng vangin hmanraw lakkhawm leh hnathawktu tur ah harsatna awm a, boruak a ziaawm veleh IR te inkulhna tur hi sa turin ruahmanna siam a ni.

Hetih lai hian tun dinhmun-ah BSF platoon khat te inkulhna tur in pahnih chu sak zawh tawh niin, in pakhat sak leh tur a la ni a, BSF te hi Thinghlun khaw chhung Primary leh Middle school ah te an inkulh rih avangin BSF te inkulhna tur atan a sak ah IR te hi an inkulh lailawk rih ni a thudawn a ni bawk.

Mizoram leh Assam ramri dep, Assam lam hnaih ah hian SSB lam pawh an inkulh mek ni a thudawn ni bawkin, nikum lam a buaina chhuah hnuah tun thlengin boruak duhawm lo thleng a la awm zui leh lo tih Thinghlun atanga ZALEN thudawnna chuan a sawi.

October 9, 2020, Zirtawpni khan Mizoram leh Assam ramri Thinghlun khawdai ah Karimganj District official te chuan John Zolawma thlam an halsak bak ah a kuhva kung te an tihchhiat sak a, ani bakah hian Ben David, Thinghlun kuhva kung an tihchhiat sak bawk. He thil thleng avang hian ramri ah silai nen a inepna boruak sang tak a lo thleng tawh a ni.