lalchhandama Colney-

Kan thupui tur hi a pa ang reng viau mai, awmnem deuh tan phei chuan a zamawm duh zek mai thei. Heti lam thiam psychologist-te tih awm tak a ni a; mahse, kan han tum ve laklawh tawh si a, ngaihdan deuhte in lo nei mai a ni ang chu!

Mihring tung chhoa nung tawh phawtte chuan he zia, thinrimna hi kan nei vek a. A then thinrim har deuh, a then hma deuh, insum thei tak te, insum thei vak lo te kan ni hlawm. Pathianin min siam dan a ni a, amah Pathian ngei pawh hi Bible-a kan hmuh dan chuan thinrim ve fo thin a ni. Thil siam dang heng ramsa, nungcha leh kan ran vulh te pawh hian an nei ve tho niin a hriat bawk. Thil nung dang heng thingkung, hnim, pangpar, thlai, etc. te hi chuan an nei chiah lo niin a ngaih theih, rimawi, fakna tawngkam etc. ang chi te hi chu an hre thei niin sawi a awm ve thung.

Vawiinah thiam ang tawk in han sawi fiahte kan tum ang a, engtin nge kan inhmakhua ang tih lam pawh sawi tum bawk ila. Sawi tawh angin mi thiam ka ni lo va, thinrimna tih a nih laiin nuihna turte pawh a awm mai thei, i lo zirho zel dawn teh ang.

A awmzia: Eng nge ni thinrim awm zia chu ni ang le? Mihringte hian zia chi hrang hrang kan nei a, kan hlimin kan nui a, kan nguiin kan tap a, kan hlim lohin kan ngui a, lawm lohin kan thin a rim a.

Eng vanga hlim nge ka nih? A chhan chu thil ka duh zawng lampang ka hmu ta emaw, hriat vang emaw a ni thei ang. A nih leh eng vanga ngui nge ka nih? A chhannaah chuan thil ka hlauh zawng emaw beisei tibo thei lam thu ka hriat vangte a ni thei ang.

Hetiang ang deuh bawk hian thinrimnate pawh hi kan nei thin niin a hriat theih. A awm zia berah chuan ‘kan taksain a thil tawn, hriat leh hmuhte chu a duh lo, lawm lo,’ tih entir nan he zia - thinrimna hi a lantir thin, han ti ila, a fuh lo lutuk lo vang chu maw?

Tichuan, mihring chu thinrim a lo ni ta a, a nasat phei chuan a bul a awm pawh a ngam awm loh ta thin a ni. Mihring kan in ang lo a,chu bakah a chhan a zirin rei tak te a awh a, rei vak lote pawh a ni thei bawk.

Mi a thinrim tawh chuan khua a hmu vak tawh lo thin, buaina bakah kut inthlakna hialte pawh a thleng thei a ni. Tui chhuan so bawrh bawrh nente pawh tehkhin ta ila, a inang thei viau ang.

Eng vang nge? Eng vanga thinurna hi lo thleng thin nge? A chhan tam tak a awm thei ang. Entirna han sawi ta ila- Kan fanu lah chu a inleng zu nam reng thin kan tih kha a lo inruktir daih mai a, a pa lah chu a insawh a insawh mai. Garage-a ka scooty dah lah chu a seat an lo zei thler vek a, police-ah ka report dawn a ni. Chhan eng emaw tak vang hian kan thin a rim thin a, chhan em em awm lem lo pawh hian a fuh loh ve theih tho bawk. Na neih vangte pawh hian a thinchhiat riau theih bawk.

Sipai hote hi chu ral do tur an nih avangin an thil tih reng reng a rorum, ri thak thin a ni, chuvang chuan tawngkam vin an hmang nasa hle.

Kan fa awm tha duh lote chungah pawh an that kan duh vangin thinurna kan lek kawh thin. Court-te pawh hian thiam loh chantirte hremna an phu tawk angin a pe thin. Hei hi thil sual miin an tih ngam loh nan/duh loh nan zirtirna a ni nghal a ni.

Thinrim ngai lo nih erawh a theih lo vang a; mahse, kan thinrim chhan thenkhat hi ho ve riau a awm a ni, nia, ho angreng deuh hi a awm ve thin.

A that lohna/thatna: Kan hriat theuh angin thil reng reng chuan thatna leh thatlohna hi a nei zel a. Thinrimnate pawh hian thatna a nei a, tu leh fate kan enkawlna kawngah thunun nan a tha hle. Mi sual, awm tha duh lote enkawl nan pawh hman thin a ni.

Han thinrim buan buante pawh hi a lo ngaithlatu tan a hrehawm deuh na a, kan thawl ve hawk thei a ni. Han thinrim chang neihte pawh hi mi kan ang ve tihna a ni a, hlim hlutzia min hrilhtute pawh a ni ve a ni.

A that lohna chu indo chawk chhuaktu a ni thei a, indona chuan thisen a ti luang thin. Inhauhna, insualna, tualthihna tichhuak theitu a ni a, nupa inthenna leh fahrah tam tak siam chhuak theitu a ni. Kan ni tin hna thawhna theuhah pawh harsatna mi siam theitu a ni. Infiammite zingah pawh chak lohna thlen theitu a ni. Thinchhe bula awm chu a hahthlak, min tibuai viau zel mai thin a ni.

Mihringte kan thinur thin, a chang phei chuan kan tum loh deuhte kan tih phah a, a hnuah kan inchhir leh vawng vawng thin anih hi. Hetiang hi kan ni tih Pathian pawh hian min hriatpui a, thinrim huna tih dan tur zirtirna min pe reng a ni, “…in thinur niin tlakpui suh se, Diabola hmun kian hek suh u..,” tiin Bible-ah kan hmu. A awmzia ni awm deuh chu, “In thinrim laia inngaihtuah angte ti tak tak suh u, thil sual tih nan phei chuan hmang reng reng suh u,” a tihna deuh a nih hmel.

A ni taka, kan thinrim laia kan thil tih hi kan inchhir leh duh chawk. Kan thinrimna thenkhat - miin min tih fek fekna te, khakna ang chi te, mahni kan indahsan vang hi a ni ve duh khawp mai. “A ni maw, a lo ni maw, ka thiam loh a nih chu,” tiin, mahni inphah hniam zel thei ilang chuan, thinurna tam zawk hi a hneh theih ang.

Awle, a tawp berah chuan thinrim chang nei fo thin kan ni a, chung huna kan buai lutuk loh nan kan tawngtainaahte lo thlen lawk ve fo thin ila; tichuan, a ziaawm thei deuh ngei ang.