ZALEN Nov. 7, 2024; Thirsakawr a India ram state 28 leh Union Territory (UT) 5 fang chhuaktu, Vanlallawmzuala Varte (Lz-a) chuan Thirsakawr hmang vek a khawvel fan chhuah a la chak tih a sawi.

Vawiin chawhnu dar 2:30 khan Aizawl Press Club-ah thuthar thehdarhtute kawmin, Lz-a Varte chuan, zinkawng a zawh chhung zawngin India ram state hrang hrangah Mizote inpumkhatna that zia chiang takin a hmu tih a sawi a, thuthar thehdarhtute zawhna chhangin, thirsakawr a km 17,403 a thui zinkawng a zawh hnu, India ram a fan chhuah hnu-ah, thirsakawr hmang vek a khawvel fan chhuah a chak tih a sawi a, tih theih hun pawh a la awm mai theih thu a sawi

"Zinkawng ka zawh chhungin kir leh tumna emaw beidawnna emaw ka nei lo a, phur takin zin kawng ka zawh a, nin chang erawh ka nei thin," tiin a sawi.

'Ride to Clean Air' tih thupui hmang a zin chhuak a nih angin, a kalna hmun hrang hrangah ngaihhlut a hlawh hle thin tih a sawi a, state hrang hrangah ama hmingin thing 17 a phun thu te a sawi. "Boruak thianghlim hi kan mamawh em em a ni a, kumin krismas leh kumthar vuakvet-ah pawh sawrkar thu zawmin halpuah lam chi hal lo turin mitin te ka ngen duh," a ti bawk.

Lz-a zinkawng hi 'Book of India Records' a ziahluh turin hmalak mek a ni a, data pawh thawn a ni tawh a, a zinkawng te enfiah niin, hmalak chhoh a ni dawn a ni.

Lz-a hman thirsakawr hi Kolasib YMA ten YMA museum a dah turin an dil a, hetiang bawk hian Mizoram state museum a dah turin dilna a dawng tawh bawk.

Mission veng, Aizawl a khawsa, Lz-a Varte hian kumin January ni 24 khan zinkawng a zawh tan a, ni 204 chhung thirsakawrin a inkhalh a, km 17,000 chuang a inkhalh hnu-ah November ni 5, 2024 khan a chenna Mission veng a inkhalh thleng leh a, Missin veng YMA huaihawtin ropui taka lo hmuah a ni.