Thla ruk chhungin cyber crime thubuai 10 awm leh tawh

Admin - Jul 20, 2021

2009-ah thubuai an ziak lut tan

Aizawl; Mizoramah kumin 2021, January - June chhungin cyber crime thubuai 10 ziahluh awm tawhin, thawktu (staff) 8 awmna, Cyber Crime Police Station pawh din fel a ni tawh.

CID (Crime) hotute hnen atanga ZALEN thudawn danin kumin thla ruk chhunga thubuai pariatte hi 27.11.2020-a din, Cyber Crime Police Station-a ziahluh a ni. Police Headquarters, Khatla, Aizawla Cyber Crime Police Station-ah thawktu pariat awm mekin, Dy. SP chu officer-in-charge niin, Inspector pakhat, Sub-inspector pahnih leh Asst. Sub inspector pakhat te chu investigating officer an ni. Hengte bakah hian thawktu dang Head constable pakhat, Constable pakhat leh IV grade pakhat an awm bawk.

CID (Crime) hian Cyber Crime kaihhnawihah kum 2009-ah thubuai an ziak lut tan a, case ziah luh atanga thubuai ziah luh tam ber kum chu kum 2014 kha niin, thubuai 28 ziah luh a ni. Thubuai ziah luh zinga a tam ber chu social media-a thu post kaihhnawiha police-in complaint an dawn atangin a ni.

May 21, 2014 khan Mizoram Police, SP CID (Crime) hnuaiah Cyber Crime Investigation Cell din a lo ni tawh a, hun eng emaw chen Cell ang a kalpui a nih hnuin, tunah chuan police station puitlingah hla nkai a ni tawh.

Cyber Crime Police Station thawktute chuan cyber crime leh IT thubuai awm thei laka fimkhurna tur thuchhuah an tichhuak fo thin a, tun hnaia thuchhuah an siamah  inbumna chi khat, sextortion a hluar thar thu leh chumi laka mipuite himna turin facebook/ instagram etc. ah hriatchian loh te friend request accept loh a pawimawh thu te, number hriat loh emaw atanga video call pick up loh a tul thu te an tar lang. 

Share now