Aizawl June 17, 2024 : Vawiin khan Chief Minister Lalduhoma hovin a office-ah Sawhthing lei leh hralh leh a processing chungchang Minister leh official pawimawh te nen an sawiho, thlai thar palite lei an tihlawhtling ngei ngei dawn tih a sawi.

Chief Minister chuan, "Kan flagship programme Thlai thar palite lei hi kan tihlawhtling ngei ngei dawn a. Tun atanga thla 6 velah heng thlai te hi a thar chho mai tawh dawn a ni. Chumi hrereng chuan tih tur awm apiang kan lo tih ve zung zung a tul a, chak takin kan inbuatsaih theuh dawn nia," tiin mawhphurtute a chah a. Kuhva chingtute harsatna pawh thapui thawha bawhzui a tul a ti bawk.

"Kum tharah hian Mizoramin sawhthing quintal million 1vel a thar chhuak tura ngaih a ni a. Free market hmangin lei leh hralh hi kalpui zel tur a ni ang. Amaherawh chu market a kal tluan theih nan leh loneituten an tharchhuah zawng zawng an hralh theih nana thil tul te vawiin hian an sawi a ni. Sawhthing Minimum Support Price hi January atanga May thla inkarah pek ni se," a ti.

Meeting hian sawhthing hi a hralhna kal tluang (free market) pangaia loneituten an hralh theih bak a grade hniam, process ngai chi lo awm ta se engtia kalpui tur nge ni ang tih an sawi nghal a, hemi atana Private company rintlak te thawhpui dan tur te an rel a ni.

Kuhva chingtute harsatna sutkian dan tur, Mizoram chhunga processing plant siam chungchang te pawh an sawi.

Meeting-ah hian PC Vanlalruata, Agriculture Minister, Prof. Lalnilawma, Horticulture Minister, F. Rodingliana, Commerce & Industries Minister, Dr. KC Lalmalsawmzauva, Adviser to CM, Vanlaldina Fanai, Commissioner & Secretary to CM bakah official pawimawh te an tel a ni.