April 26, 2024; PC President Vanlalruata chuan ZPM kaihhruai sorkar thar chu ‘thlanchhuahte invulhna’ mai a nih rih thu sawiin, “’Year of Consolidation’ an tih fo hi ‘Thlanchhuahte invulh Kum’ tihna ni maiin a lang,” a ti.

Party Office-ah chanchinbumi leh mi thenkhat lenga sawmin Vanlalruata chuan ZPM kaihhruai sorkarin budget a pharh hmasak ber te, Chief Minister leh Minister dang thusawi thin te leh speaker in motor thar a lei der tawh dan te sawiin, “Inrenchem sawi uarin ‘year of consolidation’ an sawi nasa a. Chief Minister tiama Minister ten motor pakhat an kawl tur thu te, motor an lei loh tur thu te an sawi nasa a. Motor pakhat aia tam an kawl hlawm ni mai lovin Speaker phei chuan motor changkang lutuk, cheng nuai 28 man vel a lei der tawh,” a ti.

ZPM kaihhruai sorkarin budget a siam hmasak bera thlanchhuahte invulhna tur nasa lutuk chu PC Party in ngaimawhawm a tih thu sawiin, “Budget kan en chuan Minister leh MLA te invulhna tur uchuak tak langin MLA rualten pung tlem special-a an puk thin, a hma kuma cheng nuai 200 hman thinnaah cheng nuai 1,050 lawih dah a ni a. MLA LAD fund pawh a hmaa cheng nuai 6,000 hman kha cheng nuai 8,000-ah an tipung bawk,” a ti a. “Kum hmasa lama Assembly budget-a wages-a cheng nuai 101.16 an hmannaa cheng nuai 141.50 hman an tum hi invulhna turu tak a ni a, zinna (domestic travel expenses) atana cheng nuai 111 hmannaa cheng nuai 144 hman an tum hi nuam tawlna hawi a ni bawk,” a ti bawk.

MLA te chekawi te tana wages-a cheng nuai 60 vel hman thinnaa kumina cheng nuai 99.50 ruahman anih thu te; Minister leh MLA ten ruang an phurhna tur nuai 500 ruahman anih thu te pawh sawiin, “Kan party chuan uchuak kan ti hle a. An sawi thin, ‘Year of Consolidation’ an tih hi, ‘Thlanchhuahte Invulh Kum (Year of Consolidation for the Elected)’ tihna ni maiin kan hria a. Sorkar hi mipui tana hlawkna (for the people) ni tura mipuiin kan duh laia thlanchhuahte tana hlawkna (for the elected) a ni leh tho hi a pawi kan ti a ni” a ti a. PC Party chuan mipui tan hma a lak nasat dawn thu a sawi.