A naupan lai chuan football a tui zawk a; mahse, naupang thu awih thei tak, Zemabawk North nula ni ta, Lalhumhimi chuan a chhungte thu a awihna avang liau liauvin Asia khawmualpuia infiamna kûtpui lian ber a thlen phah dawn ta.

Humhimi hi June thla tawp khan Judo Federation of India (JFI) chuan September 24-27, 2023 chhunga Hangzhou, China-a Asian Games neih turah kg 52 hnuai lam Judo inelnaah India aiawh turin a thlang a, a hming pawh June 20 khan New Delhi-a Indian Olympic Association (IOA) pisaah a pe fel tawh.

Asian Games-a tel tura a hming a pek hnuah hian tel tlak turin a taksaah fel lo a awm tih endikna (doping test) neih leh vek a ni a, hei pawh hi June 30 khan result chhuakin a tling chiang tawh a; harsatna dang a nei a nih loh Mizo nulain Asian Games a khel ngei dawn ta.

Kum 29 mi, vawi tam tak Mizoram leh India tana medal lo hlawh chhuak tawh, Humhimi hi ZALEN-in a biaknaah a naupan lai chuan football a khel nasa a, a tui pawh a tui zawk tih a sawi a; “Mahse, ka chhungten judo khel zawk turin min nawr a, tun hi ka thleng ta a ni,” tiin a sawi.

A chhungte thu zawma hetiang dinhmun a thleng thei hi a lawm tih a sawi a, “Keimah bakah ka chhungte tan a lawmawm zual a, anmahni chawmna pawh ka neih ve phah ta hial a nih hi,” a ti.

Humhimi hian nikum khan Gujarat-a National Games-ah Mizoram aiawha inlanin gold medal a lo la tawh a, hei vang hian April 5-8, 2023 chhunga JFI-in selection trial a neihah pawh a inlan phak phah a, hlawhtlinna a chang zui ta a ni.

China hmain Croatia-ah
A hudo thiam vang liau liauva home ministry hnuaia Nepal leh Bhutan ramria duty thin ralthuam keng police, Sashastra Seema Bal (SSB)-a awm mek, Humhimi hian China a kal hmain tournament khelh tur a la nei a, chumi atan chuan a inbuatsaih mek.

August 18-20 chhung hian Croatia-ah inelna sang, Croatia Grand Prix a hmachhawn dawn a, Arena Zagreb, Zagreb-a inelna atan hian camp-in an inbuatsaih mek.

Zagreb an pan hma hian Kosovo-ah Pathianni hian an kal phawt dawn a, hei pawh hi Croatia-a inelna an hmachhawn tur atana inbuatsaihna tho tur a ni.

“Kosovo-a kan camp tur hi kan tournament inlanna tur azira a hmun thlan a ni a, sik leh sa a inang lo va, India nen a danglam em em thin a, chumi kan lo insiam rem theih nan kan tournament khelhna tur hmun nena inmil sik leh sa awmnaah kan camp thin,” a ti.

Croatia tak hi August 15-ah chauh an pan dawn niin a sawi bawk.

Asian Games atana inbuatsaihna kalpui tan hun tur erawh a la sawi thei lo va. Mizoram Judo Association chuan Humhimi hi an lawmpui tak zet tih sawiin India tan gold medal a lak ngei theih nan duhsakna sang ber an hlan tih an sawi.