Sawrkar laipui chuan India hnampa Mahatma Gandhi piancham vawi 150-na pualin faina kawngah nasa taka hmalak chhoh a tum a. Chumi kal zelah chuan chhungkaw tin te pawna inthiar awmlohna 'open-defecation free' ah siam a tum a ni. He ruahmanna Swachh Bharat Mission an tih hi October ni 2, 2014 khan Prime Minister Narendra Modi chuan a hawng a, he ruahmnna hnuaiah hian kum 2019 October ah chuan India ram chu pawna inthiar awmlohna hmun Open Defecation Free ah puan tum a ni.

Open Defecation Free in a tum te chu chhungkaw tinin inthiarna (toilet) neih, mahni ina inthiarna hmun nei remchang lo tan an awmna atanga metre 500 huam chhunga vantlang inthiarna hmun siam, sumdawnna hmunah te km1 huam chhunga vantlang inthiarna hmun siam tih te chu a langsar zual an ni. He hmalakna hi chak taka kalpui a niin Mizoram pawh pawna inthiar awmlohna Open Defecation Free state ah puan a ni tawh a ni. Open Defecation Free mai hi a tawk lo a, Open Defecation Free plus nih tumin khaw tam takin hma an la a. Chung zinga khaw entawntlak tak Maubuang khua chu ODF plus ah puan thuai tum a ni.

ZALEN in Open Defecation Free plus khuaa puan mai hmabak Maubuang VCP Laldingngheta a biakna ah Open Defecation Free plus chu nih an tum ngawr ngawr vang ni lovin an hmalakna chu a tha nia an hriat avanga thuneitu ten ODF plus a puang tura hma an lak mai thu a sawi a. "Faina leh bawlhhlawh sawngbawl kawnga kan ruahmanna leh hmalakna te a vangin sawrkar atangin award kan dawng a. Kan award dawn hmang chuan pipe te leiin tuiluankawr ah kan luantir a. Kan khuaah hian chhung -kaw tinin septic tank kan nei vek bawk a. Chubakah bawlhhlawh hi kan thliar hrang bawk a ni," a ti. "Kan bawlhhlawh paihna ah hian a hma chuan kan paih kawp vek a, hetiang anih chuan hun kal zelah min dawl zo dawnin kan hre lova. Tawih thei chu paih tawh lovin mahni compound chhungah khur laiin kan paih ta a, kan bawlhhlawh paihna hmunah hian a tawih thei lo chauh kan paih tawh a ni," a ti. ZALEN in faina kawnga an hma-lakna avangin an khua an hrisel phah leh phah loh a zawhna chu chhangin VCP Lalding-ngheta chuan, "Kan hrisel phah hlein kan hria a, kum 6 dawn chu malaria vei pawh hi kan nei tawh lo a ni," a ti bawk.

Tunhnaiah Mizoram khaw hrang hrangte faina kawngah kan thangharh chho mek a, khaw bal leh tawp tak tak ni thin kha tunah chuan an faiin an thianghlim a, an hrisel hle niin pa pakhat chuan a sawi a. "Mizote hi thuawih tak hnam kan ni a, tunhnaiah fai pawimawh zia kan hre chho thar leh a. Sawrkar, kohhran leh tlawmngai pawl te hian tun ai hian nasa lehzualin hma han la se India ram mai nilo khawvel huap pawha state fai kan nih theih ka ring tlat a ni," a ti bawk.