Thawnthu hlui tak pakhat, Mizoten kan neih chu hmanlai hian Mizopain savun zial, thil ziakna tur a nei a; mahse, a dah tha lo lutuk a, a uipain a ei zawhsak vek a ni, tih hi a ni. He thawnthu hi a tak nge phuahchawp hriat a ni lo. Mahse, chu chu kan sawi tum a ni lo, a tak a ni emaw, phuahchawp emaw pawh lo ni ta teh reng se, he thawnthu hian chiang takin Mizoten thuziaka thil chhinchhiah kan peih loh dan te, ziaka daha vawn that lama kan taihmak lohziate chiang takin a tarlang a ni. Kan hawrawp leh tawngte ngei pawh keimahniin a kal hmang duang lovin hnam dangin min duansak ta reng bawk a ni. Hnam hian hma a sawna, hnam dangte tluka a awm dawn chuan ziaka thil chhinchhiah peih te, vawn thatte leh hnam chungchang, ziarang leh nihphungte hi zir binga, bihchian a tul fo thin. Mirhing thiamna leh hmasawn dan, khawsak dan mila hnam kalphung leh tih dan phungte her rem dan tur zir chiana, bihchian thin hi a pawimawh hle a ni. Israel hnam khu Pathian hnam thlan an nihna chu lo dah tha ila, Zofate zinga ziaktu lar tak pakhat L.Keivom chuan an ram a zuk tlawhna a a hmuhdan a sawiah chuan, lekha ziak leh chhiar an peih em em na chu an dinchhuahna pakhat a ni tiin a sawi a ni. Ziakin engkim mai vawnthat an duh a, a chhiar lamah pawh chuti bawk, ziaka engkim an vawn that zia chu a nunpui lam aia bible zakzeh tam zawkte kan ni a, sawi duah ngai lovin kan hre mai awm e.Roman lal ram ropui a ni emaw, an sawi ni tla seng lo ram awptu Kumipnu sawrkar pawh nise, a hnam anga an hlawhtlinna chu Israel fate zirlai an zir vang khi a ni. Kumpinu sawrkarte kha, Jordan lui rawn luang lut kha chu lo dah tha ila, Mizote nuna sap pachalin thu a sawi theih em em na kha eng dang vang a ni lo, kan hnama zia leh nihphung kha an zir chianga, kan khawtualah an bihchiang em a ni. Mizote hi chu a huhova titi khawm leh sawi khawm lama ram tang thin kan ni. Mimal a dai thuk peih lem si lovin, awmkhawm leh titi khawmnaah kan awki kan ti sanga, mimala chik taka zirchianna leh bihchianna lam hi kan nei tlem zawk fo thin. A chhiar lam leh a ziak lamte phei chu lehkhabu dawr leh library tha aia thawmhnaw showroom leh second hand bale dawr a luck zawkna hian a hrilhfiah kim mawi ber awm e. Khawvel hmasawnnain kan eizawnna min her danglam saka, chu chuan kan hnam nuna kan tih dan leh kan kalphungte min thlak danglam sak ve zela. Ei leh bar zawnna kawnga hmasawnna hi khawvel her danglamtu a nih miau avangin dan theih a ni lo, mahse a danglam dan a zirin kan siam rem thei thung. Chumi tur chuan zir chian, bihchiana chik chet a ngai thung a ni. Thlanmual marketised te an ti a, an sawi kan hre fo thin. Mizo historian lar leh rintlak B.Lalthangliana chuan mizo culture zinga siam rem ngai a tih zingah thlan laih hi a tel a ni a ti a. Thlan laih mai bakah tlawmngaihnate, khawhar in riah chungchangte pawh hi a tel bawk a ni a ti a ni. Kan khawpui berah phei chuan kalhphung thlakin sawi tak ang khian markerised a ni mek a ni. Tam tak chuan kutbengin an lawma, thenkhat erawh chuan thlawpna awka an chhuah duh lo thung. Mizo tlawmngaihnain a ken thlan laih, khawhar in riahte hi kawsak hona anga Mizote min phuar khawmtu thlamuanthlakpui awm ber a ni a. Thlauhthlak mai atan chuan uihawm tak a ni. Mahse siamrem ngaihnain min nangching erawh chuan kan bihruk san theih thil a nih dawn loh avangin siamrem tho tho chu a ngai dawn a. Kan mitin kan hmua, kan bengin kan hria. In vui chungchangah pawh, Biakin ah emaw hall ah emaw hunserh hmang an awm ta fo a ni. Kan siamrem dawn a nih chuan, kan zirchian hmasak fo hi a tul a ni. Hmanlai huna an lo nunpui dan leh tunlai huna kan nunpui theih dan turte hi zirchian a ngai ang a. Chutiang ni lova hmanlai chuan an ti alawm tih ringawt zel hi thangthar tam tak, kutphah atanga khawvel fang chhuak zung zung theite hian an pawm thiam tlat tawh thin lo a. Survey te lak a, a tul a nih chuan data, opinion poll te neiha zirchian mai tur, chung atang chuan kan hnam nuna pawimawh tak ban pawimawh tak te hi khawvel hmasawnna hrulah hian a siamrem dan kan hai chhuak zung zung thei dawn a ni. Sociology, anthropology, mirhing chenho leh khawsak dan zirbingna lama kan mi thiamte pawh hian he kan mizo culture a kan chen hona a min phuar khawmtu, nunze mawi tak takte hi specialised nan hian hmang ngam se ava tha awm em. Hman pawh a hun tawh hle reng a ni. Khawtlang anga kan chen ho zelna turah bo mai atan kan ui si a, thlauh thlak mai pawh kan duh hek lova, chuvang chuan kan hmasawn dan mila siam rem dan tur hi zirchiana bihchian hi a pawimawh takzet a ni. Engkima hlawkna sum hmuh zel kan tum tawhna hun leh khawvelah hian hlawk tumna leh sum siam chhuah tumna hian zau takin a ka ang zau zela, hei hian nasa takin min lem zo zel, mahse kan hnam nuna a tha laite erawh hi chu kan lem zawh tir phal tur a ni lo. Kan lem zawh tir loh nan kan zirchian vel zel chu a pawimawh chho zel dawn a ni. Tira mei kaiah infiamna hmanga nunphung zir tawh lo, sakei lemchan infiamna hmanga thiante thih ngama chhan duhna thinlung pu tur hiala infiam tawh ngai lo thangtharte hi, kan hnam nun la chhawm tur an ni, an chhawm nun zel dan tur ngaihtuah hun leh, tan lak hun hi nakin hun a ni lo, tun hun hi a ni.