- C. Vanlal Ruaia, 9862569310

Kan Sawrkar chuan Aizawl West Corridor-ah kawng a lai mup mup mai a. Lengpui Airport kawng hnai zawk (alternative rout ) pawh Sihhmui Bazar atangin kawngchho leh ulh awm miah lovin laih tlang a lo ni ta. He kawng pui hnai zawk tur hi Sakawrtuichhun khaw tlak lam ah a kal a ni. Boulder pawh thui fe Sihhmui Bazar atangin PTC thleng an rawn phah chho tawh a. He Kawngpui thar hian Sihhmui Bazar Rail station piah lawkah Lengpui airport kawng pui kha a man a ni. Truck lian trailer hian Earthmover Hitachi lian pui pui hi Tuivamit hi a rawn hnuk thleng thei ta. He kawng hi peih a nih hma atang hian a tangkai em em ta mai a ni. Vaiva­kawn to Sairang lam aiin Lengpui Airport hi KM 7 velin a hnai leh nghal a.

AIZAWL WEST CORRIDOR KAWNG: Falkawn Zoram Medical Collge (ZMC) leh Medical College pawh chho tur Aizawl West By Pass road kawngpui laih mek hi a tlang hunah phei chuan Medical College leh Hospital hian hlawkna ( feedback) duhawm tak a nei dawn a. Lengpui Airport-ah hian Visiting professor leh Doctor Specialist te lo tumin ZMC ah lecture an han pe ang a . Delhi atang te, Foreign Doctor Specialist te kan ko kal thei ang a. Kan Cancer Hospital Zemabawk lamah pawh Emergency Surgical ti turin mithiam koh a lo awlsam dawn a. Chutiang bawkin kan Mizoram University-ah pawh World class Education an ti ve ang.  Chutih hunah chuan Mizoram pawh Surgical lamah a lo sang dawn a. Phai lam sum tak tak seng a pan ngai hi; Mimir tin ten mi thiam zawk an rawn theihna tur kawng a ni. Chu vangin ZPM Sawrkar hian Kawngpui ( lifeline) hi 2028 election thlir ranin ngawrh takin in han bei leh mai dawn lawm ni..

CHU KAWNG SIAM AVANGA MIPUI TAWRH NA HI LE: Kawngpui laih hi a lawmawm em em a. Development a kal chuan Mipui pawn a hrehawm lai chu an lo tuar ve ngei tur chu a ni, tih chu ngaihdan pakhat a ni ve reng. Mahse kawngpui laih hi Tuivamit local Council ram chhung, Sakawrtuichhun road laih zauh hna hi Ramhnuai kawng laih ang tawpin an lai a. Metal road awmchhunte pawh Leivung-in a chhilh vek a. Kawngkam Mipui te tan chuan Kawtkai atrangin a diak nghal a. Khua a thatin a khu luih luih a. A laih dan phung hian Veng mipui a ngaipawimawh lova. Aizawl Municipal Area a ni ve a, AMC inthlan dawn chuan a khu lutuk Truck trip in kawngpui tui a rawn leih huh a, a khu a reh a. Tunah erawh Mipui tuar dan:-

1) Kan sawi tawh angin Kawng metal awm chhun pawh Leivung in a khuh bo/ chhilh vek a. ruah a lo sura a diak em em a. Khua a that in a khu luih luih mai a. Motor hnunga Two wheller tlan te tan a hrehawm hle.

2) Kawng hi laih zawl tawp mai a ni a. Side drain siam a ni lo a…Kawng lai (centre)ah tui a tling zel a. Kawng laiah Ruah sur chu a luang khawm a, a tling reng a. Chungchu Inhmun laihna Leivung paih Truck te Cubic, Rora, Balu phur Full load ten an rawn dai kawi ta thin a.

3) Tui dil lohna lai pawh Truck ke phirin a pu darh a a tui hul hman chuang lova. 

4) Luangmual -Industry hmun puia Raw material Supply leh Aizawl Hospital supply tur Oxygen phur leh Industrial Product Thir leh Tuizem te, Pipe te, Chekkers tile te, Block phur te chu an tlan reng si a.

5) Heng kawng hi khawlai anih avangin Office kal tur College kal tur, Student, Sikul naupang Nunau chitin reng, Nu leh Pa ei zawng, an tlan nitin ve lo thei lova. Zingah chhuah a ngai a. Tlaiah an haw leh thin a. Naupang Sikul Uniform phei khawk a berh vek a. Diak dai pum pelh tur in Motor- lei vung- paih leh motor hmuh apiangah Sikul naupang an bet taih thin a. Mahse phurh vek sen an ni chuang si lo.

6) Kawngsira PHE tui point Sem chhuahna Cluster chu Cubic/ Boulder leh Leivung bun in a delh chhia a. Mi tam takin rubber flexible pipe an lei a, chu chuan an va zawm a, Pipe leina nei ve lo te an inhawh khawm a, Tui Pressure a na em em a, Pipe zawm a pit a, Kawngah a chik zar zar mai a. Tui putin kawng a ti nal belh a. Tui chhuah ni hi Sunday a ni thin a. Inkhawm tur lo tlan an tlu a. Inchei nalh an berh vek a, Tui latute an hau va. An nin “ A mawh kan phur lo, Tui pipe ti chhe tute hau ta che u” an lo ti ve a.  Inkhawm an thulh phah ta a ni. In chei tha leh tur chuan hunin a daih thin lo.

7) PHE Department lam side office ah te VC ten an han hrilh a,… “ kan siam tur a ni lo, a ti chhetute siam tur a ni.” an lo ti a. Chutianga thu innawrtawn karah tui chhuah hun a lo thleng leh mai thin a ni. Mipui chu an buai ngai bawk in an buai leh thin a.  , Tuichhuak venga pipe chat zawmin Leilaih vung karah chirh diak leh pipe berh nen mi thenkhat chu an inkhawm hman lova. Chuti chung chuan Tui duh khawp an la thei lova. Tuichhuak Pipe pit thin avangin Kawng a lo nal leh a. 

8) Ruah a tlak phawt chuan Kawng diak leh Motor lian chil kawi avangin Ke-a kal te tan rah lai tur a awm lova. Hei hi Napang leh zualte an khawngaih thlak a. National policy- Samagra Siksa Abhyan te/ Beti Bachao Beti Padhao te nen a inhmeh lo khawp mai.

Hetia Mipui tawrhna hi kan sawrkar hian a hre lo a nih hmel a. Kawngpui laih hi a lawm awm em em a. Mahse a laih dan hi Ramhnuai kawng laih tawp lovin, Mipui chenna, residential area leh Municipal chhung ni bawk si hi. 

A tih dam dan tur a awm:-

i) Kawng hi Metal emaw RCC- a, an beih hma chu…Side drain hi Chhaklam sir ah sial hniam se la. Tui luan chhuah zung zung na tur siam ni se. 

ii) Metal road awmchhun Kawng ruh hlui hi Leivung chhilh tir hi nawr fai vek sela.

iii) Kawng laih khuar, Tui tlinna hmun hi hnawh pawng zawk se.  

iv) Kawng thlang lam Lungrem sang tak tak Leivunga hnawh khah a nih pawhin, Chhung vum ringawt lovin, Nawr zawl nghal mai se. Kawng lai (centre) Surface a pawn san phawt chuan full load-in an dai diak hmain Furpui hma Nisa hian a hem char hman an beisei a ni. Chuti nilova Furpuiin a nan chuan Bus Service pawh an kal thei lovang.

Hetiang reng reng chuan khua leh tui Mipui tan a hrehawm lutuk a. India Constitution Articles 36-51.in a sawi “Welfare State” kha an tan a hla lutuk deuh a ni. Kan Sawrkar chak tak hian JCB pakhat hmangin han siam rual deuh se, Mipui chu an lawm ngawt ang. Furpui kan tan dawn chauh a ni si a.