- Dikteii Hnamte

May thla kan chuangkai leh ta a, khuain lum lam panin kum dang ang lo takin ruah pawh a ngawi vung vung mai! Khél lova par thin ‘April Par’ erawh a awmna hmun apiangah mawi takin a vul chûk mai tih kan hriain kan hmu awm e.

April Par ni na na na, May thlaah a par tlat zel a’ tih hi kan naupan lai ata tawh mak kan tih thin em em kha a ni a. A hming hi an phuah fuh lo nge, a hming awmzia a pu zo lo ni ang le? A  enga pawh chu lo ni ta se, a par a mawi em em a ni tih leh ama hun bi pangngaiah chuan par a thulh ngai reng reng lo tih hi inhrilh chawp ngai lova chiang reng chu a ni.

Kan sawi fo thin, kan hming kan put zawh loh zia leh nu leh paten kan hming an phuah anga kan awm loh zia hi April Par atang hian a fiah leh ta riauvin ka’n hre thar a!

Rinawmi a rinawm lo tia kan sawisel emaw, Muanpuii kan muanpui lo kan tih thin te, Duhawma duhawm lohna kan sawi thinte hi keimahni duh hun atanga kan thlir vang hi a lo ni mai lo maw? Rinawmi rinawm hun atana kan beisei, kan beisei ang kan hmuh chiah loh avanga a hming pu zo lo riauva kan ngaih hi, kan beisei hnu lawkah a lo rinawm si ziate, kan tum hun pelh fe hnua Muanpuii kan muanpui leh fo thin leh Duhawma duhawmna hmu tura nghah hret ngai (ZPM leader ka sawina a ni kher lo u aw) te hi kan enna mit leh kan ngaituahna kan hman thiam loh vang a ni thei dawn hlein ka hria. April Par hi April thlaah ngei par tura kan beisei tlat chuan kumtin kan bei a dawng ang a, kan lungawi lo fo dawn a lo ni. May thla han nghak hlek ila, a mawina par vul, min tihahdam sawng sawng thei khawpa mawi kha kan hmu ngei dawn si a.

April Par ang hi mi tamtak chu kan ni ve ngei ang. Kan nu leh pa leh thenrual ten min beisei anga min beisei huna awm lo hi a tamber hi kan ni hial mai thei. Mahse, May thlaa a mawina kim nena par thin April Par ang hian “ka tlai lutuk” tih rilru pu lovin tlema kan hun kan pel tawh nia kan inhriatna paih bovin vul theihpatawpin i par ang u. Kan hmaa par, Tlaizawng, Vaube leh Fartuah te an vuaia an chuai hnu, mi tamtak lung tilengtu mai an nih hnu hian tan lain keini ‘April Par’ ho hian hlimna thar pein kan mawina chhuah turin May thla hi a tlai lo tih hria ang u.

Ni 4 liam hnu, mihring ngaiha ‘theih loh’ atanga Pathian ropuina mihring hmuh tura ti ropui lehzualtu chu Lazara kaihthawh kha anih kha. 

Kan tlai tawh emaw tia indawm kun mai lovin April Par May thlaa a vul mawi thei anih chuan, keini pawh hian vul mawi turin hun kan la nei tih i hria ang u