~ - Crossa Kosbek

Bullet khalh inzui duah duah in hmuhin in rilruah tute nge lo awm hmasa ber ang tiin inzawt ta ila Aizawl Thunders te a nih ngei ka ring a, “Charity Ride an nei a ni maw” in tih ka ring. Anih leh Aizawl Thunders-ah chuan tu hming nge in hriat langsar ber ang ti leh ila Pa Rock-a hming hi a ni ang. Bullet leh Aizawl Thunders leh Pa Rock-a hming hi chu a inzawm tlat reng a ni.

Ni e, Royal Enfield Bullet hi India ramah an hlut em em loh lai khan Pa Rock-a leh a thian ten kum 1999 khan India rama Bullet Club hmasaber tur The Aizawl Bullet Club, Aizawl Thunders tia koh chu an lo din a. Mi nuihzat pawh an hlawh hial ngei ang. Hetih hunlaia tlangvalten Bike an ngaihhlut chu Yamaha lam a ni a, RX100 te hi khatih hunlai kha chuan Aizawlah chuan a lar vet vet hle a.

Tin, Patling leh pavalai pawhin an lawm em em, a rik deuh dat pawha "cheng cheng cheng" a ti e an tih mai Rajdoot te vanglai kha a ni a. Bullet erawh chu right gear chi (Ke dinglama gear thlak ngai) leh gear te chi nei hrang (Neutral finder) danglam tak leh buaithlak tak anga lang, over heat reng thin; Aizawl atanga Lunglei ride dawn pawhin tlan vang vang a Ser­chhip thlen vel atangin a chak tan chauh te an tih ang kha a ni a. Mahse, Pa Rock-a leh a thiante hian an champion pui tlat!

Engtinnge kan ti a ni mai thei, a chhanna chu hei hi a ni :- Royal Enfield Bullet ngaihhlutna khan Club a hring a, Aizawl Thunders atangin India ramah Club za tam a lo piang ta a, a la pian belh zel pawh a rinawm a. Mizoramah ngei pawh hian club 20 chuang an awm mek a ni a, Royal Enfield Club tam tak lo awm ta chu intawhkhawmna event lian leh ropui, ram pum nghawr nghing thei a lo pian phah a. Heng BOBMC Rider Mania(Brotherhood of Bulleteers Motorcycling Consortium RM) te, Royal Enfield Company Rider Mania te, North East Riders Meet (NERM) te hi India ram pum huapa Bullet Event lian ber ber khawvel hriatkhawp te an ni.

Hemi piahlamah hian mahni State tin deuh thawah event bil a awm leh theuh a, chung zinga lianber leh hmasaber a chhal ngam chu Mizoram Enfield Kutpui (MEK) hi a ni a. Heng bakah hian Manipur Riders Meet te, Assam Riders Meet te, Bodoland Riders Meet te, North Bengal Riders Meet te, Sikkim Riders Meet te, United Central Rider Mania leh a dang tam tak te hi Royal Enfield intawhkhawmna event vek an ni a.

Royal Enfield Company lamin an buatsaih leh siam pawh ni lo, club-in an thlen (Host) thin vek te an ni. Heng hi Bullet ngaihhlutna Pa Rock- a ten chi an lo tuh tawh atanga lo piang chho vek an ni.Vawiin niah chuan India khawvelah hian Motorcycle ropui Harley Davidson lakah Royal Enfield hian a hmai a uang hial thei ta ve ang.

Thalai mahni Bike duh duha tlan vak vak leh ring leh bengchheng tak taka kawtthlera tlan kha Bullet Club-a memberte hian an ti meuh lova, a chhan pawh club tinte hian inkaihhruaina fel tak an nei vek zel a, inkaihhruaina zawm lo chu an pawl atangin an telh lo hial thin a ni. Pa Rock- a khan khua leh tui tha ni tura dan zawm that kha a dah pawimawh thin khawp mai a, document neilo a bullet khal te kha a duhlo bakah a sawisel nasa thin hle a. An inkaihhruaina entirna thenkhat han sawi lang ta ila- ‘Ride hona reng rengah eng emaw tul thil vang a nih ngawt loh chuan mahni hmaa tlante an tlan lehpel ngai lo’ tih te, Ride-naah motor dang nen a in tawh palh lakah him nan headlight ON vek tur (Tun hnuah chuan company lamin ON sain an rawn siam ta) tih te, Club waist coat / Vest a mualpho tur zawnga hak loh tur tih te, ride hmain mahni motor cycle check tir vek tur tih te, kawng laka chhia an awmin inpuih vek tur tih te leh a dangte. Inkaihhruaina simple leh zawm awlsam, zawm atana tha tak tak ngaihtuahchhuak thin tu kha Pa Rock-a kha a ni.

Kawng dang lehin Bullet ngaihsanna leh chawisanna lo lian chho zel hi engtia lo awm thei nge tiin inzawt leh ta zel ila, a bul chu Pa Rock-a leh a thian ten Club an din atanga riding community tha an siam vang a ni tih loh rual a ni lo. An din hlim khan 'Charity is our Mission' tih thupuiah neiin vawiin ni thleng hian club ding tawh reng reng chuan vantlang tana thil tha tih lamah hna thawk zelin a bikin charity hi an thupui a lo ni chho ta zel a ni.

Pa Rock-a ropuina leh creative na deuh mai chu company lamin alloy wheel an siamchhuah hma khan spoke wheel vek kha a ni thin a. A ni chuan Fork pipe hmang khan alloy wheel kha a siamchhuak a, a hmang bawk a, vawiin thleng hian hmuh theihin a la awm. Kum 2011 a North East Riders Meet (NERM) Sohra (Cherrapunji) Meghalaya-ah khan a alloy wheel siamchhuah chu vuahin a inkhalh thleng nghe nghe a, kalkhawmte en hlawh ber pakhat a ni hial a ni.

Pa Rock-a kha a advance-in a ngaihtuahna te kha riding community lam thatna tur hi a ni deuh vek zel thin a. Ri­ding hi adventure a ni a, chu chu a hrechiang em em a. Kum 1997-ah a eizawnna Hot wheels Bullet workshop a siam a, customer tam tak neiin, a customer te zinga inti riders tak tak te kha khaw tawp atanga khaw tawp lehlam chauh ride thin ni lo se, Aizawl pawn lamah te ride tam ve se, Aizawl pawn chuah pawh ni lo, Mizoram hi pel ngam thin se a duh hle thin a.

A thian ngamtlak thenkhat Tlawng luikam vela inti hlim paha ride thin te fuihnan Tlawng Riders tiin a phuah el thin a, lehkhaden uar deuh te kha Casino Riders tiin a phuah leh mai a. Pa fiamthu duh tak mai a ni a, thil hre lo lutuk te kha hria se a duh vang te pawh a ni ang e, a Workshop a lo lut, mahni bike chinchang hre lo deuh te kha ‘A brake line-ah fork seal a tang a nih hi' ; 'mudguard oil seal thlak a ngai' te hi a han ti a, a hre lo te chuan tak tak emaw an ti a, a hria erawh chu an lo nui char char thung a. Vawikhat pawh a thian ngamtlak tak seat a siamsak a, tui a tlang loh nan Rambo Polythene-in a tuam thin a, Rambo milem a 'silai vei keng lai lem Polythene a tha bik' tiin bazarah a zawntir chiam tawh a, a zawng tupa lahin a zawn hmuh loh thu a rawn sawi chu an nui nasa mai.

Hming phuah te lah kha a awlsamin, vawiin thlenga pu hlen te pawh an awm nual mai bawk. Dawrpui pheia Second gear nena tlan det det chak kha, a hming atan Second gear-a tih te, tlu lek lek a khalh hniam lutuk te kha Low Rider-a tih te, a side glass vuah a len em vanga SideGlassliana tih te, 3X-a, Iahpuia, Dampa Tiger-a, Buy and Sale-a, Sûtpût, Boss-boss, Gish leh a dangte. A mizia leh a fiam­thu duh zia te kha kei aiin a thian tha leh a bul hnaia awm tam ten sawi tur an hre teuh ngei ang.

Rockfeller Zothanpuia (Rock-a) kha kum 1964 February 26 -khan Pu Dosanga (Fam) leh Pi Lallianpuii Sailo te fa unau pali zinga upa ber ni turin Presbyterian Hospital, Durtlang-ah a lo piang a. A pa hnathawhna avangin Biate leh Nagaland-ah te an awm kual hnuah kum 1970-ah tuna an awmna Peter Street, Khatla, Aizawl-ah an awm a. St. Peter’s School, Shillong-ah lehkha a zirchhuak a, Pi Zonunsangi nen inneiin fapa pahnih an nei a. Kum 2017 khan Gland Cancer a nei tih hmuhchhuah a ni a. A natna hi enkawl nghal niin dam tha viaua a lan laiin kum 2023 khan a lo langchhuak leh a, 2nd September, 2023 zinglam dar 12:20 khan chatuan ram min pansan ta a ni.

Pa Rock-a kha Bullet leh a nun kha a inzawm tlat a, a sakhua a ni ti ila kan sawi sual tam lo hial ang. Hun rei tak USA a hna a thawh hnuin Aizawl ah lo haw in kum 1997-ah Bullet Workhshop a siam a, kum 1999-ah a thiante nen Bullet Club an din a, chumi atanga Bullet ngaihlutu an pung zel a, chutih rualin Club pawh a lo ding zel a, mipui vantlang tana thiltha tih 'Charity' a keng tel zel bawk a, Riders te intawhkhawmna Event a lo piang zel a, Club leh Event hi a la pian belh zel pawh a la rinawm. Royal Enfield Bullet ngaihhlutna lo arh leh lian tual tual, riding community tha lo awm zel hi two wheeler company dang heng Jawa te, Yamaha te, Honda te leh adangte tan hian chona a va ni tehlul em! He Bullet culture ah hian mithiam 'scholar' te research tihna tham chu a awm a ni.