- Joseph L. Ralte

Hmanah Mao Tse-Tunga chuan "Thawk leh khata ram rorelna thlak thut hi dinner party emaw essay leh lemziah mai a ni lova, thil-thui-par (embroiderry) mai mai a ni hek lo," tiin chutianga vawi leh khata ram kalphung thlak danglam thut tur chuan tha thawh a ngai a, a tul chuan thisen chhuah tura silai chelek pawh a ngai a ni, tih chu a ngaihdan a ni. Thu tha ziah leh sawi mai te, ngaihdan tha tak tak puanchhuah ringawt maite'n awmzia a neih tawh loh chuan "thisen chhuah" duhtu an awm thin reng a, chu chu history-ah kan hmu a. History chu alo thleng nawn thin a ni, tih hi khuarel thudik a ni.

Mizote hi a huhova nun thu-ah chuan society nuam tak ram kan ni. Mimal nun thu-ah chuan belhchian dawl lemlo tak kan ni thung em aw ka ti thin. Kan la tlem a, kan inhrechiang viau hlawm a. Kan inveitawn hle a. Kan inhmu tlinglo tawn hle bawk. Kan ram hi a chhe zawnga puakkeh dup tur anga ngai pawh kan tam mai. Thahnemngai au nazual deuhte phei chuan "revolution" te hi la thleng mai turah te an ngai hial a. A lehlam pawl erawh chuan chutiang em chu kan ramah thleng turah kan ngai thei lo. Ka chhut ka chhut hian kan thalaite zingah thisen chhuah buaina hi kan ramah a hnai viau hian ka hre ve tlat  thin.

Tunhnai kum 10 vel chhung hian "eizawnna ngelnghet dinna atana intuaihriamna programme" kan buatsaih thin a. Programme tam tak kan buatsaih tawh a, mi sang telin chu'ng kan programme buatsaihte chu an chhim ve tawh a. Thalai kum 18 atanga pavalai, tlema upa deuh kum 60 han pel hial tawhte thlengin, hmeichhe tam tak tiamin hmaihmaah ngei ka hmu ve thin a. An harsatna sawite ka lo ngaih-thlaksak ve tawh bawk a. Chungte chuan an dinhmun tleu tlat chhan bulpui berah hian sorkar an mawhpuh tlat mai. 'Sorkar' an tihah chuan politician pawh an tel a, sorkar hnathawkte pawh an tel a ni.

Kan ramah hian dinhmun tleu laklawh, theihpalingkawha bei ve a, lei rem rap hlei thei tawh lo kan tam ta hle mai. Chu'ng mite chuan sorkar hi an taah an chhiar ve thei tawh tlat lo. Mawl takin thlir dan an nei a - minister rual leh an chhungte, politician tithei zualte hausak thut thutna, sorkar hnathawkte nawmsip bawlna ni maiin an hria a. Duhsaktu nei ve lo leh sorkarna chang political party mi leh sa ni ve lo tan chuan tangkaina neilo leh huam ve loh nia inhriatna (unwanted and excluded feelings) an nei lian ta em em a ni. Sorkar chu a thei deuhte tana ding leh rorel ni maiah an ngai a ni. Journalist lar Sudeep Chakravarty-a'n "You have to create a complete society in which local people have meaningful stakes. The point is if you don't govern that particular group of people, they are not yours, they are not in your control," (Red Sun by Sudeep Chakravarty) a lo tih hi a dik ngawt mai. 

Chu chu alawm thawkkhat lai atanga India himna (security) tichhe thei lian bera an ngaih Naxalism emaw Maoism movement bul lo intanna chu. West Bengal-a Siliguri bula Naxalbari thingtlang khaw te reuhtea bul rawn intan kha kum 20 a vei meuh chuan state 11-a district 55-ah nghet takin Maoism hian bu a khuar tawh a. Nitin thisen chhuahna a thleng a, sorkar inrelbawlnain awmzia a nei thei lova, an support apiang inthlan naah an chak ta mai mai a ni. A buaithlak lai ber chu Maoist-te thluak bur ber ber (think tank) te chu Delhi khawpui chhungah, India zirna in ropui tak takah, University mithiamte zingah an zi nuk mai a ni. Professor leh scholar rual tam tak chuan zirlai rualte thinlungah zirtirna an tuh thuk em em mai si.

Tangkaina nei ve lo leh huam tel ve loh nia inhriatna chuan mi thinlung ram a la chak em em mai a. Ni sensa hnuaia vahchap kang ang mai a ni. Thalai thisen lum a luhchilh a. Eizawnna thua beidawngte inhnemna a ni mek. Tunah hian khawi lai veng kilkhawr leh thingtlang kilkhawrah emaw chuan tute emaw hel rilru putna chu an titi tui ber a ni tawh mai thei. 

Lehkhathiam kan pung a. Hna a pung ve thur thur si lova. A thiam thiam, a tha tha dinkhawchhuahna ni lo deuhva ngaihna hi an nei lian ta hle. Zawlnei ni miah lo mah ila kan ram rorelnaa lungawilote rawlrala an chet hun hi a hla lo tih hi a va chiang em!! Kan CPI (Maoist) unaute lah chuan an vahvaihpui chanchintha (t) chu khawvel ram zawng zawngah puandarh an tum ve mek bawk a. Intelligence report hnuhnung berah chuan India hmarchhak state tam taka tribal hnam thenkhatte an thlunzawm thuk hle tawh ni awm tak a ni.

Kan thalaite zingah hian Delhi University leh Jawaharlal Nehru University rap pha, Socialism rilru-in a hmin tlat an kat nuk tawh a. Chu em la thleng pha lo - ngaihtuahna leh suangtuahnaa ram inrelbawlna kal meka duhkhawp hmu zo lo, a ngai pet peta kal reng ringawt mai duh lo tam tak an awm tawh mek a ni. Kan sorkar kalphung leh ziarang kan thlak lohva, kan nihphunga lungawina (complacency) nena kan kal bek bek reng mai chuan chu'ng kan nau thangthar lungfingte chuan kawng zawh tur dang an hre lovang. Naxalism leh Maoism thlipuiin a nuai ve mai ang. Chu thlipui hlauhawm lo thleng mai thei reng venna atan kan thanharh va hun tak em!!!

Engemaw kan tih chu a ngai ta a ni. Party tin insanmar a hun ta. Engemaw thil ho mai maia inchirhtheh lova policy thila insual a va han hun em! "Keini party chuan chu chu kan ti dawn a, chutia kan tih chuan chutiang chu alo ni ang a, kan ram a dingchhuak ang," emaw ti sela, party dangin "Chutia tih chuan kan hnam himna khawih chhiatin a awm thei a, heti zawk hian kan ti dawn a. Chutia kan tih chuan chutiang chu alo thleng ang," tih ve a hun ta.  Tawngtaw politic tuinua inchirhtheh mai lovin, "Keini kan sorkar chuan heti hian kan ti thung ang," emaw "He thil hi hnam tlukchhiatna tur a ni a, a rang thei ang bera tihtawp a ni ang a, hemi policy aiah hian hemi policy hi kan ti zawk ang," kan tih a hun hle mai. A fawng vuantu apiangin mipui pawisa an khawih a, party mal mi leh sa inhaivurna atan an policy an hmang a nih chuan mipui rilru an tinâ a, danpui constitution an bawhchhia a ni tih inhria se la. Mipui huapzo teh se.

Kan kalphung pangngai let let a kal hi a hun ta lo tih kan hriat a va hun em! Tawngkam maia inthlakthleng tulzia sawi lovin chetzia-in kan kalphung thlak ila. File movement pangngai ngawr ngawr piah lamah rilru leh ngaihtuahna seng ila, kan hnam ze mak tak nena inhnerem turin kan hotute'n hma an lak a va han hun tak em! Thawk leh khata ram rorelna thlak thut hi dinner party emaw essay leh lemziah mai a ni lova, thil-thui-par (embroiderry) mai mai a ni hek lo. Thisen chhuak zawnga history thlen nawntir lovin ‘thisen tello inthlakthlengna’ i thlentir teh ang. Kaa sawi mai lovin ‘tha’ thawh teh ang u. Beidawnna nasa lehzualin min luhkhung vaih zawngin khua kan tlai mai ang.