Lallunghnema, Charity Lodge

Kan ti nek nek a, kumthar chu dam takin kan lo chuang kai ta reng mai! A lawmawm a, a hlimawm bawk. Mahse kumthar hi ho takin kan hmang leh mai mai ang a, eng­mah lodeuhthawah kan chantir leh mai mai ang tih pawh a hlauhawm khawp mai. Upa in, “Arte pawhchhan nei lovin a thi bik lo,“ an lo ti thin a. Chhan neiin Pathianin kumthar min hmuh tir ngeibawkin a rinawm. Kumhlui a kan hun hman dan te, kan thiltih chi hrang hrang te kha han chhuikir leh ta ila, kan tan, kan ram tan leh khawtlang tan, kohhran tan thil tha kan ti em? Ro tlinghnutchhiah kan nei em? Tih pawh kan in chhut let a ngai khawp mai. Tunkum tharah hian engagenda nge kan neih dawn? Hetiang hian kumthar agenda I han chhawp chhuak dawn teh ang.

1. Rinawmna: Rinawmna hi a pawimawh khawp mai a, rinawmna hi mitin mamawh a ni bawk. Mi lian leh mi te , thil lian leh thil te ber thlenga kan rinawm a tul hle. Kan hlawhchhawmna thin chhan te leh kan mualpho thin nachhan te hi rinawmna kan tlakchham vang a ni fo. Ram hruaitu tam tak, mualpho fo te hi sum leh pai a an rinawm loh vang a ni. Sawrkar hnathawk tam tak inthlahdahna leh sum leh pai an tihchingpenn thin fo nachhan hi rinawmna an tlakchham vang a ni thei bawk. Eizawnna kawng hrang hrangah sawrkar hnaaah te pawh rinawm a ngai a ni. Rinawmna chu hetiang hian I lantir thei an. A hun takah engkim ti la, a hmun takah engkim dah rawh. A hun takah mu la, a hun takah tho rawh.

Tihtur nei mang hlei lova men rei vak vak te, TV, mobile leh computer, Internet, Facebook leh a dangte atchilh bur a hun ren baksak lova kan thalai leh nu leh pa tam tak tena an atchilh ta mai hi rinawmna rah a nih loh hmel khawp mai. Hetiang hian dawngdahna leh thatchhiatna a thlen a, kawng hrang hranga rinawm lohna tipungtu mai a ni. Thalaite hian rinawmna um zel teh u, nu leh pate pawh hian in fate kaihruai turin rinawm takin in fate kilkawi thin teh u tiin a tawi zawngin kan inchah ringawt mai ani.

2. Taimakna: Taihmakna nge taimakna (?) A engnge dik zawk kei mi mawl hian ka thlir thiam lo, Pu Chhuanliana BVT khan a eng nge dik zawk han sawi chiang teh se. Hot Ice-ah coffee ka khilai kha mawle. Tunlaiah chuan kan thalaite hian khilai tih hi’ treat’ an lo ti tawh der a. Keini senior chin chuan kan man pha vak lo. Mahse, Pu Chhuanliana kha ka khilai miau a ni. Ni e, taihmak hi kan in zirtir thar a tul hle. Kumtharah chuan kumhlui aiin mi zawng zawng hian taihmak kan chhuah dawn lawm ni? Kan taihmak nafam chuan kan rethei lul lovang ka ti.

Mizote hian hna kan thawk tam lo hle, kan thawk tlem a ni. Ram changkang apiangin hna an thawk tam a, an thawk chhuak hnem bawk tih hi I awih ang u. Hna kan thawh tlem chuan hlawh pawh kan hmu tlem mai tur niawm tak a ni. Mi ramah chuan thawk tamin an hmu tam a, thawk tlemin an hmu tlem mai a ni. Kan ramah vet hung erawh chuan thawk tam leh tam loh hi kan intehna fung pawh a ni chiah lem lo maithei. Eiruk tam leh hlepruk tam hi a ruka kan intihsiakna a ni ber mai.

Han thlir vang vang teh. Kan thalaite hi an taima tawk em? Kan fate hian hna an thawk tam em? Chawmhlawm chunga dan te a inkutsuih hautak em em thin chhungkua kan ni mai lo maw? hlawm a. Tun kan dinhmunah chuan taima in an hlawh tam silo, thawk tamin an hmu tam bawk silo. Sum bawm hmu fuh apiang an ding chang a, a hmu fuuh lo apiang kan rethei mai nite pawhin a lang. Tun kumtharah erawh hi chuan hetiang hi ni tawh suh se. Taimaknain lukhawng a nei ngei tur a ni.

3. Hun hman that: Tun kumthara kan Agenda tur zinga mi pakhat chu hun hman dik leh vawn dik chungchang hi a ni. Hei hi a pawimawh lutuk. Traffic Jam chhan pawh hi hun an vawn dik loh vang a ni pakhat. Hun kan ngaih pawimawh loh avangin nasa takin mipuiin kan tuar a, tul lovah sum leh pai pawh tam tak kan sen phah thin a ni. Hmasawmna tithuanawptu lian ber zinga mi pawh hun ngaih pawimawh leh vawn dik loh hi a ni chiang khawp mai. Hetiang hian kan sawi zel ang. Pisa kai hunah mi tam zawkin a hun dik takah Office an thleng zat zat ngai lo. Pisa tan hunah mi tam zawk chu an in an chhuahsan thei tawk a, hemi kawngah hian harh tharna kan mamawh a ni.

He kan thu leh hla chhiartuten in lo tangkaipui theih mial takin kan nau zinga pakhat hun hman dan kan tarlang lawk ang. Ani hi Bank pakhatah a thawk a, a tlai ngai lo, zinga dar 7:30 velah chaw a ei thin a, dar 8:00 ah in a chhuahsan nalh thei. Dar 8:00 velah office panin a chhuak a, dar 9:00 rik hmain office a thleng fo, hei hi a ropui ani. Sawrkar hnathawk tam ber chu Office tan hun dar 11:00 vel a ni tlangpui. A zia lo gui gui khawp mai! Kan nau office tlai ngailo hian Traffic Jam hi a hre ngai meuh lo a ni. Keini ve zawng Traffic Jam leh kan chawhmeh te hi a in chaw-be em em khawp a, kan hmui phun leh motor Jam hi a inmil em em bawk a ni.

Kan thianpa Office-a ka awm lain an clerk pakhat chu chhun dar 12:00 velah a lo lut a, an pu chuan, “Ti leh tawh suh”, tia phun nung nung chungin a lo ngaidam bul hmuk. Office thlen tlai te, office ban hmaa ban ngawt thinte, chhuanlam chhe te te hmanga office chhuahsan fote hi Corruption a ni, sual lian tak a ni bawk. Kan sawi ta nual mai, kumtharah chuan zing takah tho la, chaw hma takah ei la, hma takin office kal la, a lawm tur ber chu nangmah bawk I ni. Ka’n sawi leh hlek Traffic Jam te hi kan time corrupt vang a ni pakhat. A hun takah engkim dah a nih chuan Traffic Jam hi nasa takin sum tam tak seng lovin kan tizia in kan pumpelh thei a ni tih hi lo hre mawlh teh u.

4. Midang tana inpekna: Kan kumthar Agenda pakhat dang leh chu mite tana nun leh inpekna hi ni rawh se. Hei hi a tul satliah lo. Ram tichhetu zinga pakhat chu mahni hmasialna hi a ni. Ram hruaituin ama pumpui hmakhua chauh ngai a ram a hruai chuan mipuiin an tuar a, an retheih phah a, buaina zakhua a thlen fo thin a ni. Tunah hian khawvel hmun tam takah hruaitu mahni hmasial tak takte sulhnu thalo kan hmu mek. Midang tana inpekna hi mahni tan chauh ni lovin chhungkua, khawtlang leh ram tan a tha a ni. Kohhran tan hlei hlei hian a tul lehzual emaw tih tur a ni.

Kohhran Upa leh Pastor ho zingah mite tana inpe miah lo, berampu entawn tlak loh hmuh tur an ther fur mai, a ropui lo hle. Tun thlenga sawi hlawh Abrahama’n a fapa Isaka nunnathapa Pathian tana a inpekna kha a ropui hle. Khang tluka inpekna thuk kha khawvelah hian hmuhtur a vang khawp mai. Keini pawh hi he kumthar lo thleng mek chhung hian mite tanmalsawmna ni turin kan nun kan thap hi kan tih theih vawrtawp a ni tih rilru puin I inbuatsaih ang u.

Tichuan, Agenda chu Latin tawng atanga lak a ni a, a saptawng chuan, “ Things to be done”, an ti. Chu chu keini Mizo tawngah chuan thil ngaihtuah tura chhawp chhuah tihna a nih angin tuna kan sawiho tak rinawmna te, taihmakna te, hun vawn dikte hi hmasawnna kailawn ropui a tling. Heng thil pathum chauh pawh hi I neih ngat chuan mi hlawhtling leh mi ropui ber zinga mi I va ni dawn chiang em! Tun kum bul atang hian rinawm la, taima la, I hun chu pawisa a ni tih hre reng chungin vawng tha bawk ang che.