- F. Vanlalpeka, IMCS Aizawl

Keini India Hmarchhak state-a cheng, Thlangtla hnam - Chhinlung chhuak inti, Indian Union chhunga Hnam bil hrang hrang te Inzawmkhawmna hming leh Khawvel hriata National kan nihna hming chu MIZO a ni.

He Mizo National Umbrella-ah hian tuna Manipur tlangrama cheng (Naga Tribes ni lo zawng) heng, Thahdo, Paihte, Hmar bakah, Hnam bil tlem zawk, Vaiphei, Simte, Zou etc. zawng zawng hi an tel vek si a ni. Hun a danglam tak avang emaw, Manipur state hmuna awm an nih avangin emaw Mizo National an nihna hi a bo ngawt lova. Indian Union List atanga paih an ni lo.

Nimahsela Mizo National List-a awm ni reng si a, Mizo National hming invuah duh lova, a hel theih chung an hel ta zel hian Inpumkhatna thu sawi ngam chi kan ni em aw?

Mizo National hi India rama kan hnam Identity a ni a, he National hnuaia Impumkhat hi kan kalphung tur awmchhun chu a ni.

Hetia Manipur-a Mizo Hnahtlak hnam bil tam tak te hi kohduatna hming "Zo hnahthlak" kan hmang zui hi a fuh ta lo nge, Mizo nena compare-na ang lekah kan ngai ta em ni zawk?

Mizo National hian a fun kim lo kan ti ta em ni? Thlangtla Hnam/ Chhinlung chhuak hnam chi hrang hrang te tana India ram chhunga kan National Identity hming hi duh lo thei khawpin eng buaina nge kan neih chu le?

Mizo National kan nihna hi hming danga thlak ngai tur khawpa buaina kan nei em ni le?

Manipur Mizo hnahthlak te avanga kan Mizo National hming hi sawinghin chi a ni em?

Vawiin niah hian Chhinlung chhuak Hnam bil chi tam tak te hian Hnam (National) anga India rama kan khawsakna MIZO hming hi Zomi, Kuki, Zo nena Compare ngawt chi a ni lo. Thenkhat phei chuan, "Mizo leh Zomi tih hi chu a inang reng, a thu hi dah thlakthleng vel mai mai a ni" an la ti tak deuh deuhva!

Mizo National kan nih pawm duh lo khawpa Hnam bil ngaisangtu te thu vir vel hi em liam ngawt aiin, kan vil zui erawh a ngai ta.

Khawvela Mizo National Umbrella hnuaia awm Hnam bil tam tak te hi ngaihtuah chian a ngai ta hle mai. List fel tak leh Record fel tak siam mai pawh hi a la ngai ngei dawn.

"Chhinlung chhuak Zofate" tiin a hming hi chu kan leklam ta zel a, khawvela Mizo hming duh khawp lo leh min cover zo ve lo kan ti ta tlat a nih chuan, min funkim tur hming dang heng Hnam bil ti tlattu te avang chuan kan ngaihtuah a la ngai maithei bawk. Mizo National aia min fun kim tur hming dang pawh nei mah ila, tun ang tho hian, State pawn lam atang bawk hian reilote-ah kan pawm leh chuanglo thei.

Chuvangin, Indian Union chhunga Mizo National nghet kan neih tawhna, "Mizo chu MIZO ni mai rawh se" tih hi hnam anga kan dinchhuahna tur kawng awmchhun a ni.