Mizoram leilung leh a chhunga eizawnna mumal tak nei turin Tualchhung mamawh, Ramchhung mamawh leh Ram pawn lam mamawh dehchhuah/tharchhuah tam a ngai.

Hetiang hmasawnna leh rahbi tha zawk hmanga eizawnna kalpui hi a tul tawh a. Mizorama thil la awm ngai lo hna kalpuina (Innovation Project) nei tur chuan AGRIBUSINESS PROJECT hi kalpui a ngai bawk.

Tualchhung Mamawh :

Agribusiness Project hmanga Tualchhung mamawh dehchhuah (production), sawngbawl (processing) leh hralhchhuah (market) fel taka remfel vek theih a ni.

India ram khawpui leh district hrang hrangah hetiang Tualchhung mamawh Market fel taka kalpuina hi Agribusiness Project kalphung a ni. Hetiang hi Mizoram khawpui leh district zawng zawngah pawh kalpui theih a ni.

Entirnan: Mizoram nitin mamawh leh a lohva kan awm theih loh, mamawh sang tak leh items tam tak buaipui ngai kan nei tam hle.

Ram chhung Mamawh :

Agribusiness Project atang lo chuan Leilung atanga thil tharchhuahin awmzia a nei lo. A bik takin, India ram states dang te hian hetiang hi an lo kalpui nasa tawh a, an kalpuina belhchhah turin emaw, an ruala kal ve mai ngai items a tam khawp mai. (keini ang a "hmuh hmuh leh mi ten an ti" tih inchintir ang ngawt ni lovin).

India ram khawpui nena inthlunzawm tak tak tur chuan kan thil chin tur items-ah mumal zawka bul tan a ngai. Mizoram phei chu hetiang kalphung siper pawhin min la deng phak lo.

Kan thil dehchhuah dan kalphung atang reng hian Ram chhung Mamawh tinzawn hian kal ve a ngai tawh.

Ram Pawn Mamawh :

Agribusiness Project hi International thlunzawmtu a ni a, Tualchhung Mamawh leh Ram Chhung Mamawh ang mai mai a ni tawh lova, engkim mai hi Quantities, Best Grade Variety based vek a ni tawh a. Mizoramin phawsawlh taka tlem te te kan thar kual mai mai ang a ni tawh aw-kawng lo.

Ram Pawn Mamawh tinzawn tur leh hetiang hawi zawnga ke kan pen dawn a nih chuan, a bulthum atanga inremfel vek kan ngai.

Kan tarlan angin, Agribusiness Project atang zel hian Ram Hmasawnna dik taka kalpui a ngai a, Leilung atanga mamawh engkim mai dehchhuah/ tharchhuah a nihin, Tualchhung (Local) Mamawh bik, ei bobar nghal chi te, Ram Chhung (Inter-state) Mamawh thlunzawm ngai leh Ram Pawn (International) Mamawh thlenga inla-lawn thei items neih ve hi a hun hle tawh bawk.

Chuvangin, Zir sanna (Degree) aiin Zir thiamna leh a tak ram a pawimawh. Mizoram ei leh bara Intodelh hi chu kan tun dinhmun ni mekah hian sawi sawi ngam tur kan ni lo.

Kan State Sorkar Development Departments leh Sorkar Rorelna chelh tawhtu te leh chelh mektu te atang hi chuan a hla lehzual.

Mizoram Sorkar Budget tel miah lova Central Government Scheme hrang hrang hmang tangkai ve thei lova, dan pin saka kan awm chhung hi chuan Mizoram hian Lei malsawmna atanga Intodelh hi chu kan hlat zual zel dawn. Entirnan: Prime Minister-in ram chhung thar­chhuah uar tur leh Leilung atanga tharchhuah tipung tura ram mipuite min chah lawm lawm laiin, Central Sum hailut theitu te State Matching Share 10% kan tih sak duh ve tlat lo te, State Sorkar Budget nghawng miah si lova Central Sorkar Funding hmu tur pawh Department hriatpuina inpek kan harsat em em te hian Mizoram Intodelh ve tumna a hlat tial tial chu a nih hi !

Hetiang a nih tlat zel avangin Agribusiness Project criteria hmang tangkai thiam Sorkar neih a nghahhlelhawm tak zet a. Hetiang hrep hi kan dinhmun a nih tlat avangin, Agribusiness Project ngei pawh hi Commercial Business Project hmanga kalpui a ngai ta zel chu a ni e.