- Rinsanga

Article pakhat John Lalsiammawia ziah kha ka lo chhiar ve a, thil ni thei leh awm thei a rawn thur chhuak nual mai a, ngaihtuah zui ngaiin ka hria a. Tichuan Facebook leh social media dang vela MPSC Asst. Professor hna lak miin an sawi leh comment zui dan te ka en kual nghal a, chu bakah a interview leh helam a kal mi ka hriat deuh te ka theih ang ang ka zawt kual a, he article hi han thai ve ka duh ta a ni.

Kan hriat theuh ang leh, John Lalsiammawia pawh in a lo ziah tawh ang khan MPSC hian India ram University leh State College ten zirtirtu an lak dan criteria angte chu zawm in Notification an chhuah a. Post 31 lak tur (subject hrang hranga a ruah dan erawh a in ang lo) atan mi 225 interview tura koh an ni. He interview tura an koh te hi chu Academic Performance Index (API) score an tih fo hmang a teh an ni awm a. Chu chu Ph.D/M.Phil, Net/JRF, Research Publications in peer reviewed journals, teaching experiences leh Academic background BA level chin atang a teh ni te pawh in a hriat.

Chutianga an mi thlan chhuah bik mi 225 te chu MPSC member pakhat a chawlh chiah avangin member 2 te room hrangah insemin, expert 2 hi MZU leh MCTA (College professor) aiawh pakhat ve ve bak ah observer atan MZU lam mi professor pakhat awm tel in an vaiin room tinah member 4 vel zel ang thu in interview an conduct a ni awm e. Tun tum hi Mizoram College aiawh professor te hetiang a interview-a official taka an koh vawi khatna a ni hial maithei, MCTA hmalak na ni ngei pawhin a rinawm e. 

MZU lam erawh a tlangpuiin Mizo professor vek an thuin a rin­awm a, hnam dang an thut hriat a ni lo.

Interview ni tur department a zir in ni zawn in an ko zung a nih hmel a, kha erawh kawng awm chhun a ni miau a. Tichuan chuta interview te chu a tlangpuiin minute 30-40 bawr interview room lamah lo hrual niin, chuta tang chuan an result siam fel tawp a nih hmel a, an API score khan awmzia a nei zui tawh lo a nih hmel bawk. Hei hi Mizoram lama kan hman vawi khatna a ni hial maithei, API score tel loa interview hlanga MPSC in Asst Professor a lak tum khatna a nih hmel a nih chu, a ziak tu hmasa kan sawi khi chuan hei pawh hi ennawn tul a ti viau bawkin a lang. Chung interview turte chu practice teaching minute 5 bawr theuh an nei a ni awm a, an topic duh zawng lecture an pek hnuah zawhna hrang hrang an dawng ta thin a ni.

An sawiselna hrang hrang en hian an sawi pakhatna ah chuan expert te hi Mizoram pawn mi, interviewer zinga an zirlai chhuak emaw, paper ziahpui tawh leh hriat nei sa nei lo ni se tih hi an duhthusam lian ber leh John Lal­siammawia article kan sawi tak pawhin a tawp khar na kha a ni bawk. A chhan an sawi tam berah chuan Mizo chu kan la tlem a, in thenawm let let, kohhran khata lawi emaw, khaw khat leh mahni college chhuak mai bakah zirlai chhuak a bikin PhD thleng a an lo supervised tawh te chu duhsak loh hreh em em kan nih hmel si hi a ni.

Tun tum hna lakah pawh hian Johna thuziak ang bawk chuan MZU professor an thu deuh vek a nih hmel a, chu ti a nih chuan MZU zirlai chhuak tan chance a tha vawng nghal hlur a, nei leh nei loa phai lama lehkha lo zir ve te, thiam zawk avanga India ram University tha a lo zir chhuak ve te tan phei chuan a tha nat thlak thin thu an sawi a, chance an nei chhe thei viau a ni awm e. tun tum ah tak erawh mi complain an hre deuh nge an chawhpawlh deuh e chu an ti bawk. Chuvangin pakhatnaah chuan expert hi Mizoram mi emaw, Mizo zirlaite nena inhnehnaivai ni lo se la a fair ber angem tih hi interview hmachhawn tam zawk te thusawi chu a ni.

A dawt lehah chuan State College (MCTA) aiawha expert-a thu ve te pawh hi an mahni College chhuak duhsak na leh an naute hre zui a awm theih tho tih sawi a tam leh hle bawk. Mizoram college lian ve tak leh lar ve tak pakhat a Principal hming tha deuha an sawi pawh academician tam takin an ngaisang der lo! A chhan chu a Principal lain a college-a guest faculty leh a Alumni tan lo chuan chance a chhe lutuk tih chu an sawi nasat a ni a, interview a fair tawk lo an ti a nih ber chu. Chutiang chuan MZU lam expert chauh ni lo, MCTA aiawh pawh chuan bias nasa tak a neih theih si a vangin expert hrim hrim hi chu Mizoram atang ni lo se, emaw Mizo ngei hman tel duh pawhin College professor kher lo MPSC member te rinngam mai emaw, state danga thawk Mizote zinga mi emaw, kawng hrang hrang tha leh felfai zawk sorkrain a ngaihtuah a tul tak zet awm e.

A dawt leh ah chuan Mizote zingah pawh pu chuam leh nau chuam hi vai ho ang main a tam tan hlein an sawi. Academician chhung­ah politics a lo tam ve theih tho zia te an sawi nasa a, paper inziah tawm thang deuh te, Ph.D lama lo in supervised tawh te, Master kallai atanga pu/pi te hnung lo zui peih leh in volunteer taima te duhsak hlawh an nih dan sawi a tam hle. Work experience a pawimawh si a, chu experience nei tur chuan college emaw university-ah an duhsak zawng guest faculty-ah an la a, chung mi te chu Ph.D leh iloah seat an chang zui a, hna nghet lak hun ah ni se an pi/pute interview board ah expert an nih zui chuan an lut leh mai bawk a; phu taka tling ni a kan inngaihna phenah hian rim taka lo inchhawr tawhna leh intlawn lung­awi tawh na te a lo tam thei hle a ni awm e. Professor bias leh tirhlek neih nuam ti tak tak Mizo zingah an tam ve tawhzia te an sawi nasa a, heng ho kianga an ui khawi ang a tap chawt ho hian hna an hmu zui zel bawk thin ni a an sawi avang hian Mizo ni kher lo expert atan a tul chho viau maithei.

Tin, MPSC Member te chu Chairman ni in interview lamah mark ken nei tam ber mah se expert te thu an hnial tak tak ngai loh thu an sawi nasa hle a. Expert te ngei pawhin an thut ve china an recommend an la tlin loh ngai loh thu te sawi an awm zauh bawk ni tur a ni. MPSC member te chu MCS leh IAS retd te an ni nuk a, an mahni insitna emaw avangin expert te kutah an pe pumhlum thin ni a sawi awm bawk hi a fuh lo maithei, expert kha a duh chuan a corrupt thei tlat a nih chu. Written exam te hi sawi a tam ta viau a, MPSC hian India ram state tam zawk tih ve loh state pali vel bawr lekin an tihchhoh State Services lak naa optional paper tih bo pawh kan ti ngam tho a, state dang tih dan ang kher ni lo a fair zawk a Assistant Professor lak dan ruahman hi MPSC hian ngam leh se a tha hle ang.

Tun tum hna lakah pawh hian a thiam leh fel te chu tling tam zawk tur ah ka ngai a, mah se science (a subject mal chuan sawi lo ila) lamah te pawh screening paltlang atang tawh khan RTI hmang tea ringhlel taka zawhna a lo awm tawh ni ten an sawi a, tun tumah pawh hian final result-a tlingte leh an department expert a thu te hian in zawmna enge maw sawi zawm tur nei lo hram se ka ti hle a, chu erawh a interview a ten an hre turah ngai ila. MPSC a lo insiam that leh zawk nan hengte hi thai lan ngei a tul ka ti ve tlat a ni.

MZU leh PUC hna lak pawh mipui nawlpui in kan ngaihven phak loh avang in sawi sep a tam duh hle thin tun hma phei chuan an ti ve tlat a, Assembly hna lak lah kan hriat ve meuh chuan chhungkaw bil office a lo ni ngawt tawh bawk. Heng zirtirtu ho, hlawh tam si, lehkha zir rei ngai bawk si te hi fair lo taka nau chuam te an pu chuam ten an lakna mai mai a nih chuan thalai te beidawng in kan siam mai ang tih a hlauhawm e.

A bik tak in tun hnaiah MPSC a che chhe em em a, member te hi tun generation changkang tawh tak siah chuan an la nawi ber tum a ni hial ang em? Heti tak a hming chhiat na thla tin deuhthaw a an nei chung hian Chairman pawh in banna a thehlut mai lo hi mak ka ti a, an hna lak pawh a fair ang e maw chu tih zawhna kan nei rum rum hial thei nia. In thlahdah taka khawsa tur in hlawh sang tak tak an la lo a sin mawle. 

Controller of exam te leh secretary thlengin an demawm thin viau ka lo ti a, an in siam that a ngai a, sorkar pawh in hma la se la a tha khawp mai. MPSC chungchang chhui tura an ruat Pu Manzuala IAS retd kha MPSC Chairman a nih tawh avangin a bias hle emawni aw, MPSC tisual thei meuh loah a chhuah a, hei, tunah lem MPSC lo nawi zia hi a lang zel zawng a nih hi. Pu Michael Manzuala meuh pawhin a sawi mam sak ngam ka ring tawh lo a ni.

Chuvangin, kan ram thalai te hian sorkar hna kan beisei nasa em em a, chung latu atana kan rin ber leh a dang pawh awm chuang lo MPSC hi a in siam that a ngai a, mipui te rin ngam a nih leh a ngai. Sorkar lam pawh in Asst Professor lak dan hi en nawn leh se la, hei ai a fair leh rintlak zawka interview conduct dan te ngaihtuah se la, tehkhawng rintlak zawk hmang in hna hi lak ngei ni tawh rawh se.