Vanhnuailiana Sailo, Ph: 9862482761

Tun hnai ni tin chanchinbu chhuak leh media dangah Lengpui Airport chungchang hmuh tur a awm thin a. Mizoram Sorkhar pawhin zir chiangin Indian Airforce (IAF) te kutah hlan tumna thu kal mek a nei ni awma thuziakte pawh a awm. Mipuite hian Airport kan neih ve chin hi kum 25 vel emaw chauh a la nih bakah, kan airport neih ve chhun hi chin hre tak tak mang lo va kan titi titamtute pawh a ni awm e.

Lengpui Airport hi ka lo thlir ve thin dan chuan Mizoram PWD te kutchhuak a nihna laiah Mizoram Sorkhar hnuaia mi ni lovin neitu chan an han chang tur hi an hrethiam lo niah a ngaih theih a. Amaherawhchu, airport te engemaw zat leh hun engemaw chen lo enkawl tawh thinte hian hun lo kal zel tur thlir chungin airport runway siam hna hi ngai pawimawhin hna danga Mizoram PWD te kutchhuak i.e; Kalkawng siam, In sak leh Lei dawh hna an lo thawh tawhte ngaihtuahin tun ang dinhmun a han lak chhawn hi an chak lo ni te pawhin a rin theih awm e.

Indian Airforce te hian North East States-ah hian airport 8 (pariat) zet an enkawl mek laiin Lengpui Airport tiamin airport dang 6 (paruk) a awm a. Lengpui leh Imphal Airport te tih loh, Silchar (Kumbirgram), Agartala Airport leh Kailasahar Airport-te hi Airport Authority of India (AAI) te enkawl lai mek an ni.

Vanglaini Chanchinbua chhuak January 2025, ni 26 leh 27-a kan hmuh ‘IAF KUTA LENGPUI AIRPORT HLAN’ tihah khan, he airport siam hna thawk tur hian BRTF hotute nen Congress sorkhar hotute kha rei ngial an indawr thu leh, BRTF te hian Airport siam hna hi cheng vaibelchhe sawmsarih-a an thawh theih thu kan hmu a. Chutih laia Mizoram PWD kuta cheng vaibelchhe za seng tura dah a ni ta kha thil mak dangdai tak a ni. Chu mai a ni lova, tender koh a nih leh nih loh hriat loh te. Terminal building awm loh chu sawi loh, chawlh hahdamna tur (waiting room) pawh awm mumal lo va Airport hawnna (Inauguration) an buatsaih kha a mak viau mai.

India-a North Eastern States-a airport-te dinhmun leh enkawltu hrang hrang - Aizawl (Lengpui), Agartala, Dibrugarh (Mohanbari), Bagdogra, Dimapur (Manipur Rd), Chabua, Imphal (Korangel), Jorhat, Imphal (Tulihal), Hasimara, Guwahati, Kailasahar, Silchar (Kumbirgram) leh Tezpur te dinhmun pawh a chung-ah khian tarlan a ni.

Bagdogra leh Hasimara Airport-te hi Indian Airforce Airport a ni a, grade hi pek a ni lo. Chutiang bawkin Lengpui Airport hi grade pek a ni lo.

Lengpui Airport bik hi Aizawl atanga 21 Km a hla a ni a, a runway thui zawng hi 2440 meters a ni a, chu chu 8000 Ft a ni. A runway zau zawng hi 25 Mtrs width a ni a, chu chu 150 Ft a ni. Lengpui Airport PCN hi 36 a ni a, Agartala Airport PCN chu 64 niin Imphal chu PCN 67 a ni thung a ni. (PCN hi runway chak leh chak loh tehna a ni).

North East India-a airport-te ka han tarlante hi neitu/enkawltu hrang pahnihte enkawl an ni a, Indian Airforce (IAF) leh Airport Authority of India (AAI) ten an enkawl a ni.

Airport tinte Instrument Landing System hi AAI ten an enkawl vek thung a. Airport hran hran hian Grade an nei a. IAF enkawl airport-te hi Grade A,B, leh C-a an dah laiin AAI te chuan Civil I, II leh III grade an pe thung a ni. Lengpui Airport hi grade pek ve a ni lo hi a enkawltu tur dik tak AAI-in an enkawl loh avang pawh a ni thei ang em?