JB Paws 

ACause for Paws

Ministry of Road Transport & Highways (MoRTH), Govt. of India – in nungchate chunga ngilneihna lantirna tura inzirtirna thu tawi (slogan) “Be Kind to Animals” (Nungchate dimdawi rawh) tih public transport vehicle zawng zawngah tar vek tur anih thu a chhuah kal zel bawhzuiin December 2, 2025 khan Animal Welfare Board Nodal Department A.H & Vety leh State Transport Department chuan tihhlawhtlin hna thawkin Zemabawk Auto Rickshaw Owners Association (ZAROA) Assembly-ah heng thuziak tawi te hi sem a ni. 

He assembly hi State Animal Welfare Board chuan bul tan nan hmangin; public transport vehicle (bus, taxi leh auto rickshaw)-ah te tar vek tur anih thu an sawi a. Hei hi MoRTH thuchhuak anih thu leh zawi zawi a hma an lak chhoh zel tur thu an sawi. He hunah hian State Animal Welfare Board aiawhin Pi Zirtei, founder, JB Foundation chuan thu sawiin, “Kan vela thilnung dangte duat leh dimdawi taka enkawl hi kristian nun nen a inzawm tlat thu te, infuihna leh inzirtirna tha zawk sawrkar in a siam a, a huaihawt fo a tul a ni,” a ti a. 

“Rawva taka thil nung dangte vulh a, chhawr a, tih hreawm hi The Prevention of Cruelty to Animals dan kalh tlat a ni tih kan hriat thar a pawimawh hle a, Mizoram ah ran phurh dan ‘The Transport of Animal Rules’ bawhchhiatna a nasat thu te, Transport of Animal Rules, 1978 No. 4 (a) in min phut angin, phurh sawn tur ran te chu an hriselin an tha tur a ni a, Qualified Veterinary Doctor in fitness Certificate a issue ngei tur ani bawk. Fitness Certificate neilo chu lirthei neitu emaw a khalhtu in a phur lui tur a nilo tih thu PCA Act ah tarlan a ni a, chuvangin Fitness Certificate neilo ran te chu phurh luitu nihloh a him hle dawn a ni,” a ti bawk. 

Ministry of Road Transport & Highways (MoRTH), Govt. of India chuan Chief Secretary leh Commissioner/Principal Secretary, Transport department state zawng zawng leh UT-te chu lehkha thawn in public transport vehicle-ah he slogan “Be Kind to Animals” hi bel/tar vek tur ani tiin thu a lo chhuah tawh a.

‘Constitution of India vide Article 51A (g) in a sawi angin India khua leh tui tha chuan kan chheh­vela ramngaw, lui leh nungchate kan humhalh tur a ni’ tih leh dan pahnih (2), The Prevention of Cruelty to Animals Act 1960 leh Wildlife Protection Act 1972 ran leh ramsa te humhimna dan kan neih te uar taka sawiin Ministry of Road Transport and Highways (MoRTH), Govt. of India chuan State tin a Transport Dept. Commissioner/Principal Secretaries te leh State Animal Welfare Board tin te February ni 25, 2025 khan lehkha a thawn a ni. 

Ran leh ramsa te chunga ngilneihna kan lantir lehzual nan leh kawngpuia ran leh ramsa te an him lehzual theihna turin public transport vehicle zawng zawngah awareness thu ziak (slogan) ‘Be Kind to Animals’ tih tar vek turin he lehkhaah vek hian a hriattir bawk a ni. ‘He slogan Be kind to Animals hi April 1, 2025 atangin transport vehicle zawng zawngah tar tan tur a ni’ tiin state tin te hi a hriattir tel bawk a ni.

Mizoram State Transport Secretary Er.R.Lalrammawia chuan thuchhuah siamin, public transport neitu zawng zawng te, nungchate chunga ngilneihna lantirna tura inzirtirna thu ziak (slogan) ‘Nungchate dimdawi rawh (Be kind to Animals)’ tih chu tar vek tur anih thu leh, District Transport Office-te chu a tul anga bawhzui turin hriattirna May 15, 2025 khan a tichhuak tawh bawk a ni.

Hmalakna a awm zui mai loh avangin MoRTH chuan August 25, 2025 khan ‘Be Kind to Animals’ tih slogan chu public transport vehicle zawng zawngah tar tur a ni tih Mizoram Chief Secretary lehkha a rawn thawn leh a, India rama animal rights activist lar leh MP pawh vawi engemawzat lo ni tawh Pi Maneka Sanjay Gandhi chuan September 10, 2025 khan Pu Khilli Ram Meena, Chief Secretary, Mizoram chu hemi chungchangah hian State chuan hma la har a tih thu leh public transport vehicle (Bus, taxi, auto rickshaw, etc.) ah te an tar ngei ngei tur a ni tiin lehkha a rawn thawn ve leh a, he thu hriattirna kal zelah hian September 23, 2025 khan Pi Ngurbiakkimi, Under Secretary, AH & Vety, Govt. of Mizoram chuan AH & Vety leh Transport Dept. Director-te chu lehkha thawn in, a rang thei ang ber a Ministry of Road Transport and Highways (MoRTH) thuchhuak hi public transport vehicle zawng zawng ten an zawm theih nan hma la turin a hriattir ve leh bawk a ni. 

He awareness campaign neih bul tan ni, December 2, 2025 Zemabawk Auto-Rickshaw Owners Assembly ah hian The Prevention of Cruelty to Animals Act, 1960 Section 11 bik, mizo tawnga ziak chu sem nghal a ni.

Mizoram ah Animal Transport Dan ‘'The Transport of Animal Rules” bawhchhiatna a nasa em em a, he dan bawhchhiatna hi ui chauh ni lo ah a hluar hle a ni. The Prevention of Cruelty to Animals Act, 1960 Section 11 (1)(d) ah chuan Lirthei a hreawm leh nuamlo taka eng ran pawh phurtu chu Dan hmanga hrem theih a ni a, tin he dan vek, Section11(1)(e) chuan Bawm tawt leh phui lutuk, a san zawng, sei zawng leh hlai zawng ran taksa nen a inmil lo, hahdam taka ran a chetsawn theihloh tur khawp a eng ran pawh dah tu/kungbet tu chu Dan hmanga hrem theih an nih thu a tarlang nghe nghe.