- JB Foundation 

A CAUSE FOR PAWS

ZALEN-in ziaktu thar kan nei a, anni thu hi chu a danglam hret ang. Mihring leh mihring inkar piah lam thil tarlanna a ni dawn. Kan ran vulhte chunga kan mawhphurhna ang chi te, kan ran vulh, In khata kan chenpuite laka kan tih tur leh kan enkawl dan turte tarlanna tur a ni. Ran Damdawi In piah lamah a enkawlzuina rehabilitation centre nei JB Foundation te he huang­ah hian zalen takin an rawn TiTi thin dawn a ni - Editor 

1. Ran neitu chuan a ran vulhlai chu ei leh in tur thianghlim a mamawh khawp a pe tur a ni a, riltamin a dah tur a ni lo. Hei bakah hian ran vulhtu chuan a ran vulhlai chu awmna leh riah­na tur hmun tha (shelter) a buatsaih sak tur a ni a. Ei leh in tur pe thei lo emaw awmna leh riahna tur hmun tha siamsak lova a ran vulhlai hrehawm taka dah tu chu The Prevention of Cruelty to Animals (PCA) Act, 1960 hnuaiah pawisa chawi emaw lung in tan thlenga hrem theih a ni. 

2. Ran neitu chuan a ran hriselna a ngaipawimawh tur a ni a, vety doctor emaw mi thiam zawk te rawn in rulhut hlo leh vaccine a hun takah a pe thin tur a ni. Chaw a ei that leh that loh te, tui a in that leh that loh te, zun leh ek a neih dan thlengin a thlithlai tha tur a ni. 

3. Ran enkawltu chuan a ran faina a ngaipawimawh bawk tur a ni a, midangte tana rimchhia emaw midangte tana hmuh nuam lo khawpa bal in a dah tur a ni lova. Thla khatah vawi 2 emaw kar khatah vawi 1 emaw tal veterinary approved sahbawn emaw shampoo hmang­in a bual fai thin tur a ni. 

4. Kan ran vulh a bikin ui leh zawh­te te chu kan bual apiangin emaw thla khatah vawi 2 tal an beng leh tin te uluk taka tihfai thin tur a ni a, hrik an neih leh neih loh uluk takin kan en sak bawk thin tur a ni. Ui leh zawhte beng bal taka dah reng hian awlsam taka infection siam in, beng natna benvawn neiin enkawl mai loh phei chuan bengchhetna hial a thlen thei bawk.  

5. Saphihrik emaw ui hli kan tih te hian natna tam tak a ken tel thin avang leh ran leh mihring inkaichhawn theih natna (zoonotic disease) kengtu an nih theih avangin kan ran vulhte chu hrik emaw hli an neih leh neih loh uluk takin a khat tawka check sak thin tur a ni a, hrik emaw hli an lo nei a nih chuan veterinary approved hrik/hli thahna kan hmang vat thin tur a ni. 

6. Kan ran vulhte reng reng thenawm khawveng te tana hnawksakin kan vulh tur a ni lova, hram/bauh bengchhen emaw midangte tana hlauhawm emaw midangte ti chiai thei khawpin kan dah tur a ni lova, kan thunun theih tura an tet te atanga enkawl hi a neitu mawhphurhna a ni. An zun leh ek leh an inthiarna te midangte tana rimchhe lo turin kan thian thin tur a ni. Khawngtlang hriselna (public hygiene) ti chhe zawnga ran vulh hi Bharatiya Nyaya Sanhita, 2023 (Section 281/285) leh Municipal Sanitation Rules bawhchhiatna a ni bawk.

7. Kan ran vulhte natna inkai­chhawn theih lakah an fihlim leh fihlim loh hriat hi a neitu mawhphurhna a ni a. Ui a hri danna (anti-rabies vaccine) a hun takah an la tur a ni. Ran neitu in a in­thlahdah vang emaw thil dang vanga a ran vulh vaccine a hun taka a pek loh a, a ran vulhin mi a lo tipalh a nih chuan Bharatiya Nyaya Sanhita, 2023 (Section 281) hnuaiah pawisa chawi emaw thla 6 chhung lung in tan thlenga hrem theih a ni. 

8. Mi in a ran vulh lai riltam leh tui hal leh riahna tur mumal pawh nei lovin a awm dawn tih hre lawka chhan mumal awm lova a thlauhthla emaw a kal san anihchuan The Prevention of Cruelty to Animals (PCA) Act, 1960 section Sec 11(1)(i) hnuai­ah hrem theih a ni. 

9. Ran neitu chuan a ran hriselna a ngaihthaha, a ran damlo chu enkawlna mumal a pe duh lova, mithiam zawk te rawn lova a ran hrehawm taka a dah anih chuan The Prevention of Cruelty to Animals (PCA) Act, 1960 hnuaiah a ran chu a tiduhdah a ngai in, section 11(1)(h) hmanga hrem theih a ni bawk. 

10. Mi in a ran vulh lai a sawisa emaw tur in a hrai emaw ramtui­leilo a a siam emaw thih­na hial thlen khawpa a sawisa a nih chuan Bharatiya Nyaya Sanhita, 2023 (Section 324/325) hnuai­ah kum 2-5 chhung lung in tan thlenga hrem theih a ni.