-Dikteii Hnamte

Reiek-ah engemaw tihtur kan neih avangin ka fapa leh kan nau pakhat nen kan zuk kal a. Hunawl kan neih deuh avang te, khua a nawm avangte leh ka la kal ve miah loh avangtein Reiek Tlanga lawn ve ka rawt a, kan lawn ta alawm!

Ka fapa leh kan nau chu vawi 2/3 ve ve an lokal tawh a, gate kan pelh chiah atangin naupan lai style in “kan thleng teuh tawh em?” tiin ka zawt fiamthu nghal a. An sawi dan chuan darkar khat vela thleng thei tur angah kan inngai a.

Kawng chu cement concrete a siam tura hmalak mek, signboard a a intar dan ang chuan March 2024 a zawh tur, nuai 200 chuang man zet a ni. Lung a inphah a, rah mam loh niin kal a harsa hle. Pumpelh kan hmuh apiang­ah kawngpui lung phah kal harsa em em chu kan pen san zel a, chho zawng kal a ni bawk si a a hahthlak hle.

Pumpelh vawi 3na kan chho chu rinaiin kawngpui kan pawh har ta riau mai a. Kan lawn kan lawn a, kawngpui hmel a vang tual tual a, rei tawk fang kan kal hnu leh thlasik khawvawt pawh a lum huam huam, thawk pawh a har talh hnu chuan tlang chhip kan chhuak hlawl mai! Mahse…. mitin sawi Reiek Tlang erawh a ni si lo (Tlang chu a ni a, Reiek ah pawh a awm ngei chu a ni). Chawlh ngei ngei a ngai a, kan chawl hahdam kan han hawi kual chuan kan awmna leh Reiek Tlang (tak tak) inkarah chuan Tlang dang pakhat a lo la awm a. Kan ti ta sa sa tiin kawng chhuk chho leh kham leh suar nasa tak kaltlangin darkar khata thlen inring khan darkar hnih dawn kan kal hnuah Reiek Tlang chhip chu kan thleng ve ta a ni. A kal chhung a rei a a hmun pawh a nawm nen, awm rei vakna hun a awm lawi si lo. Rilru a “ka kal vawikhatna leh kal hnuhnun ber tur” ti rilru chungin khup zawi hnawk hnawkin khua in min thim chilh nasat lutuk hmain kan chhuk leh ta a ni.

Kan kal lam hian kan bo tih kan inhriat hnu deuh khan ka fapa hian “Nu, article tha deuh i ziah leh nan inspiration tur anih hi aw” a ti roh va. Kei chuan, “ka lo ngaihtuah mek tawh asin” ka ti! Amah hian kan kal tan dawna, “Reiek Tlang hi chu lawn ve leh hrim hrim ka duh, a chhan chu kawmthlang lawka awm zawka lawn lo hian Hmuifang, Sakawrhmuituai tih ang­reng hla fe fe ami kan pan a, a ropui bik pawh a ni miah si lova” a tih khan ka rilru a lo kaitho tawh reng tih a hre hauh lo. Mi tam zawk hian kan bulhnai maia thil awm hi ngaihhlut nachang hre lo hian a hla zawk leh harsa zawka awm hi kan pan fo a lo ni awm asin. Mahni pasal/nupuite aia mi pasal/nupuite felna leh thatna hmu thei riau hian keimahni puala kan ta hi a(n) mawina leh hlutna kan lo hmuh thelh zawk fo awm e. Mahni fate theihna lai leh thiamna hre lo lek hian ‘mi fate’ theihna leh thiamna te hi thazawk emaw tiin kan sawi kan sawi thin em?

Kawng awlsam leh pumpelh kan zawn chhan hi kan taihmak tawk loh vang a nih deuh ber hmel a. Harsatna tawh pawha chhel inzirtir aiin harsatna tawh loh theih dan kan inzirtir uar ta lutuk em aw…. Kan pumpelh zawnna (harsa pehhel kan tumna) lamah hian kan tum loh zawkah kan zuang lut a, kan tum ram thleng lovin kan chau hman fo te hi a lo ni em? Pumpelh zawnga tlang lawn keini nufa pawh kha hmun thengthaw deuh pakhat chu kan thleng ve mai, mahse kan tum tak erawh a ni si lo!

Khatia hah thikula chho nawr zawnga muang fahrana ka kal bek bek lai, kawng dik lo zawh tih inhre deuh tawha ka rilru a chauh (ruk) riau lai khan kan nau chuan tiang hawl tur min siam sak a, hah a chhawk khawp mai. Chho zawnga kal lai leh hah taka kal laia tiang hawlin mi a chhawk thei ang hian midang tan ‘tiang’ kan zawn sak ve tawh em? Kawng dik lo zawh leh chau tih kan hriat te hi hnung lam atanga an chau kal petek hi nuih mai lovin an invawn ngheh a hmalam an kal theihnan an tan tiang kan ni thei lo anih pawhin an tiang hawl tur ngaihtuahsak ila a va hlu dawn em!

Kan tum tak ni chiah lo, tha ve leh nuam ve tho atanga kan tum tak thleng tura insanmar hi a bik takin thalaite hian kan mamawh mang e! Nih ve hmel deuh, belhchiana lo ni si lo hi duhtawk mai lovang u aw. Tlemin han tang leh ila, tlemin han tuar leh hlek ila, kan tum leh kan duh ber hi kan banphakah a awm tih theihnghilh lovang u. Beidawng lova tih hram hramna hi hlawhtlinna bul a lo ni.

Tichuan, kan chhuk leh ta a, ka tiang hawl chu midang a mamawh an awm takin tiin motor hunna bulah chuan ka hnutchhiah a, pen singkhat leh sangli chuang hret leh kilometre 9 kan tei vel tih ka phone in min hrilh a!

In kan thlen chuan na­chhawkna te ka ei hial a!