- H. Laldanmawia

Taxi hman man mumal neih kan duh ve tho: Kan passenger-te an duhna tak kan thlen a, a âwm tâwk taxi fare kan han sawi a. "Ê, chutiangin kan kal ngai lo reng reng," an han ti tlat a. An duh zat taxi fare min pek luih chu lak loh ngawt aiah rilru na takin kan la a, thinrim teuhin kan tlan let nal nal fo.

Dam lo leh mi harsa a thlawnin kan phur fo va, chutih laiin driver thenkhat duham lutuk avangin kan hming a lo chhe ve chhên bawk a; mi tan kan tangkai ve emaw kan intih laia hmingchhiat tùar fo va, passenger-te nena inhnial hrep a, rilru inti na tawn fova taxi khalh reng ai chuan, rual khai tak leh inhnialna awm lo tura taxi hmanna rate mumal tak neia service hi mi pangngai chuan kan duh zawk vekin a rinawm.

Chu ti si, Engvangin nge Mizotaxi app hman hi kan duh loh?

Mizotaxi app hian mi chi li a nghawng a:

1. Sawrkar.

2. App siamtute.

3. Taxi driver-te.

4. Mipui.

Heng mi chi lite-ah hian mi dang zawngin app hi an hlawkpui vek theih laiin, taxi driver-te chauh hi a chhe lamin a nghawng ta bik a. Mi dangin an hlawkpui vek laia 'ngai pawh kan awh phak lohna tur' app hman chu a tuartu tan chuan a nâ a, lawm taka pawm chu har tak a ni.

App hrim hrim hi kan do a ni lo va, a pawnga takin sawrkar kan hnial a ni ngawt hek lo; a rate chhe mah mah te, app-a inregister-te tan dan anga hamthatna dawn tur a awm tel leh si lo anga lang te, app rin tlak tawk lo anga lang te, registration fee pek ngai tel kher te, app siamtute leh app-in a nghawng tur mi dang zawng duhsak an nih laia taxi-te dinhmun erawh ngaihthah bik anga a lang te, taxi hmanna rate mumal neih dawn tâk avanga mipuiten chhiah an chàwi tèl ve kher ngai tur anga langte hi a ni zawk – kan hriat thiam loh leh pawm harsa kan tih chu!

App chu – rate a chhiat lutuk lo va, dan ang taka a nih dan tur dik tak a nih a, a tua te pawhin rual khai taka hamthatna kan neih theuh dawn chuan duh lohna tur a awm hranpa lem hleinem; kan duh zawk daih ang chu!

STA hian motor hmanna rate hrim hrim hi a siam chhe thin ve mah mah a. Transport department bus service pawh an rate that tawk loh avanga inenkawl zo lo niin an sawi a. Taxi hmanna rate pawh hi englai mahin hman tlak khawpa pangngaiin an siam ngai lo va, taxi-ten STA rate siam kan hman ngai loh chhan pawh chu tho chu a ni. Chu chu kan duham vang a ni lo; sawrkar hnathawk hlawh te, kan rama thil hrang hrang mante leh STA-in taxi hmanna rate a siamte a in-balance thin loh vang zawk a ni.

Tuna sawrkar rate siam pawh hi kum 2024 a siam a ni a, an siam tirhah pawh a bèi tham deuh avangin hman ngaihna a awm lo va, taxi-ten kan hmang ta lo va. Siam tirh pawha hman ngaihna awm lo khawpa rate hniam kha, kum hnih hnu; petrol leh thil tam tak man a lo sân leh teuh tawh hnua inhman luihtir tum hi chu a lungchhiatthlakin a beidawnthlak hle.

Kum 2024 a sawrkar rate siam chu app-a rate thenkhat hian phâk loh a la nei zui a; chuvangin, he app rate hmang hi chuan taxi-te tan dam khawchhuah theih a ni dawn lo.

Sawrkar ep leh a thu zawm loh te, court hial thlen te ngat phei chu taxi-a eizawng, Pathian zara nung ve tawk tawk, fate dam lo pawh duh anga enkawlna nei zo lote tan hian cho chi a ni hleinem. Kan cho lo; app hmanga sorkarin min nawr dan hi kan bet lutuk mah mah a, kan hma lam thim lutuk tur ngai ngam lovin, loh theih lohna avang zawkin kan thiam ang angin chêt kan la ve a ni chauh zawk; sawrkarin taxi-te min enkawl danah hian kan thla a muang thei ngang lo a ni ber.

Sawrkar hian mipuite leh taxi-a eizawngte hi a duhsak tak tak a nih chuan – sawrkara chhiah chhung lut tel kher lo leh, tute emaw hlawk bikna tura ruahmanna siam lovin, 'mipuite leh taxi-te lungawi ve ve-na turin' ruahmanna a siam theiin a lang a. Chu chu kan nu leh pa sorkar laka kan phut leh kan beisei pawh a ni ve.

Taxi-te hian – road tax, fitness fee, insurance, passenger tax, pollution fee, permit renew-na, ni tin parking fee cheng 40/- kan chawi bakah petrol kan lak apianga chhiah kan chawite hi sorkar hian min hriatsak ve sela; taxi-te leh mipuite inkarah hêm thlak lovin; sawrkar – mipui – taxi-te kan inrem theih dan tur dap zawk se, chu chu sorkar chêt lâk dan tur ni pawhin a lang.

Taxi-te hian duhsak bik kan phût hauh lo va. Chhiah tam tak sorkarah kan chhung lut reng chunga min duhsak lo ta bik anga a lang thin erawh hi chu hriat thiam a har viau a ni.