-JB Foundation 

A CAUSE FOR PAWS

Ui hi kum sanghnih - sangli liam ta atanga mihringte nena chengho tura vulh (domesticated) tan niin zirmite chuan an chhut a. Ran dang ang lo takin Ui leh mihringte hian inzawmna leh inpawhna thuk tak kan nei chho zel a, kan khawhar min hnemtu satliah mai nilovin kan lungngaih ni a kan lungngai ani tih hrethiam ni awm taka an chetzia a kan lungngaihna min tawmpuitu, kan hlim leh lawmni pawha kan lawmna min tawmpuitu an ni. A ngaina tu apiang ngaina ve mai thin, naupangte pawhin an infiampui theih leh puitlingte tan pawha thian tha tak an nih tel avang hian chhungkaw tam tak chuan chhungkaw member angin an ngai hial reng ani. Mithiamte chuan stress leh depression natna neite tan damdawi chikhat an ni an lo ti bawk ani.

Ui hi kan nun tihlimtu an nih piah lamah hian kawng hrang hrangin mihringte min pui nasa em em tu an lo ni. Rualbanlo leh khaw hmu fiahlo leh bengngawngte puitu atan hman an ni thin a, heng pianphunga rualbanlo te hi an duhna hmunah him takin an hruai thleng thin. Tin, natna benvawn kaih, thawhah, anxiety leh rilru lam natna nei te, an natna a lo chhuah dawnin hriatlawkna an lo neih thin avangin signal lo petu atan an hmang bawk thin. 

Ui hi an rim hriatna a that em vangin hnu chhui thiam leh fing tak an ni a, misual hnu chhui ah te, ruih theih thil leh puak thei thil chhui ah te an tangkai em em a. Indona hmun thlegin police leh sipai puitu atan tangkai taka hman an ni thin. Khuarel chhiatna chi hrang hrang leimin, leitawlh, lirnghing, tuilian leh hripui lengah te chhanchhuah hnathawktu te nasa taka puitu an ni bawk. Heng bakah hian ran nunphung leh nihphung zirchian nan te, mihring – ran inkungkaih dan leh natna inkaichhawn theih zirchian nan te, inthlahchhawn theih natna (inherited disease) zirchian nan mithiam­te chuan an hmang thin bawk a ni.

Hetiang khawpa mihringte tana pawimawh ni si leh mihringte min tihlimtu kan enkawl danah erawh kan harh thar a pawimawh hle mai. Ui hi an tetlaiin kan duh a, kan it a, sum kan nei a, kan lei a. Thiantha leh chhungkhatte ui note a thlawnin kan man a. An lo lian a hun engemawchen chu kan enkawl thei ve e. Hun alo her zel a, mahni kan inngaipawimawh zawk lo thei si lo a, a tawpa an chan HNAWL anni leh thin hi chu a pawi ngawt mai.

Kan dam chen dam turin an tan rilru buatsaih ila, a nuamah pawh a hrehawm ber laiah pawh, an tan ding ngam ila. An chanchhiat ber lai pawhin ngaihsak ila, thianchhan thihngam khawpa kan tan rilru rinawm pu reng te hi phatsan bik lo ila. An damlo thei, pawi an khawih palh thei ve bawk e, chung hunah chuan "Man's Best Friends" kan tih te hi a ti lungngai leh ti beidawngtu ni lovin kan laka an chanvo leh an beisei tihhlawhtlin saktu nih a pawimawh hle ani. 

Ui hi Ui an ni satliah lo, anmahni an inhmangaih aia a neitute, an chhungte hmangaih em em zawktu, rinawm leh thian chhan thih ngam nun nei tute anni zawk e.