~ Zothanpuii

3rd Sem MA, Political Science

ICFAI University, Mizoram

Young Mizo Association hi kum 1935, June ni 15-ah Young Lushai Association tiin khatih hunlaia Sap Missionary te khan an lo din a. Kum 1947 October ni 7 - ah Young Mizo Association tia a thlak a lo ni ta a ni. Khang hunlai khan Christian-na in Mizoram ah thil tam tak a rawn thlak danglam a, Mizo hnam leh nunzia pawh lo danglamin; Mizo hnam nun a chindan tha tam tak chuan dal lam a pan ti ila kan sawi sual lo ang. Chutih lai chuan khatih hunlai a Sap Missionary leh Mizo thenkhat te chuan kan hnam zia leh tih dan thate an ral mai hlauin; Mizo hnamzia leh kan tih­dan thate venghim a chhawm nung zel thei turin YMA hi an lo din ta a ni. YMA hian din chhan leh tum mumal tak pathum a nei a chungte chu;-

1) Hun awl hman that

2) Zofate hmasawnna ngaihtuah

3) Kristian nun dan tha ngaihsan

Heng thil tum pathum mai bakah hian YMA hian Mizo zia tlawmgaihna nun hi a ngai hlu em em a. Hmanlai atang a Mizo nunze mawi em em ‘Tlawmngaih­na’ hi tunlai khawvel changkanna sang zel hian a kal bo pui mai ang tih hi hlau in thalai te pawh Mizo nun a tlawmngaihna chhawm nung zel turin a fuih sau sauh thin a ni.YMA hi tanpui ngaite leh chhawmdawl ngai te tan hian a hlu leh zual em em a, mi vanduai leh harsate tan YMA hmingin vehbur te an khawnsak thin a ni. YMA hi mi tanpui ngai te lakah hian a tlanchhe ngai lo tih a lang chiang em em a ni.

Kan ram leh hnam humhalh­na kawngah pawh hian YMA hian nasa takin hna a thawk a ruihhlo leh zu in a eiral mek Mizo thalai te chhanchhuah leh ven tum in ruihhlo leh zu pawh nasa takin a do thin reng a ni. Mizo thalai ten thiamna leh zirna lamah pawh hma kan sawn zel theih nan kawng chi hrang hrang in YMA chuan hma a la a. Central Young Mizo Association (CYMA) inkhawmpui vawi 72-na chuan Mizo thalai te chu zirna tha leh hna sang zawk te an neih theih na turin kumpuan a tan ‘zirna uar’ kumah a puang hial a nih kha. Mizo te chu hna sang zawk UPSC leh Staff Selection Commission hnuai a hna a kan in ziah tlin theih nan tiin zirna uar turin thalaite tan hna nasa takin a thawk a. Chumai bakah YMA branch tin a Mizo zirlai HSLC leh HSSLC a ti tha te pawh chawi­mawina certificate leh pawisa faite pawh an hlan thin a ni.

YMA hi Mizo khawtlang nun siam thatna kawngah hian a sulsutu leh bei nasa ber pawl ti ila kan sawi sual lo ang. Khawtlang tan a hnawksak leh awm tha duh lo, sual rawngbawl a ruihtheih thil ti a tal mai mai te; an chhungte pawh in a tihngaihna an hriat tawh loh te hi a vei hle a, nun kawngdik an zawh leh theih nan tiin home ah te a dah thin. Ruih­theih thil lakah an fihlim theih nan tiin Mizo thalai te pawh nasa takin ruihhlo leh zu laka fihlim turin a fuih deuh deuh thin a ni.

YMA hi lusun hunah te hian an hlu leh zual a, heng khawhar in a kal te, khawhar in riah te, thlan laih te hi YMA mawina leh hlut zia ti lang chiang tu a ni. Hman atanga tun thleng a Mizo khawtlang muanawm, Mizo nun ze mawi nei a, hnam dang Mizoram lo tlawh thin te pawh in a Mizo te min fak em em chu State muan­awm leh dan zawm tha tia Mizo mipui te an sawi hi YMA leh kohhran te hnathawh rah vang liau liau ti ila kan sawi sual kher lo ang.

Chutih rualin YMA chu tanpui ngaite tanpuia, mi te tan a malsawmna tih thupui nei, pawl thianghlim rilru pu ni mahse tlin lohna leh fel tawk lohna tam tak pawh a nei ang. Mizo khawtlang nunah hian mimal nawmsakna ai chuan vantlang thatna tur hi kan dah sang zawk a. Pawl leh kohhran in thuchhuah an siam leh an rel te chu mimal in lawm lo in, pawm lo deuh mah se; mi tam zawk pawm emaw khawtlang tan a tha tur zawk a nih chuan mimal in lo kalh emaw lo dodal hi tih awm lo leh mawi loah kan ngai tlangpui thin.

Enge maw hun lai deuh tawh khan hmun pakhat ah chuan pawl in emaw, khawtlang hruaituten emaw mimal dikna pal zut deuh zawnga sawi theih hmalakna an nei a. Sawiselna te pawh an awm laih laih a. Chutiang chu ni mahse mi mi tam zawk chuan vantlang tan a thil tha zawk ah ngaiin, khawtlang in ro a rel leh a dan siam te chu zawm mai a tha ti a ngai tu an awm a. Mi tam zawk te hlimna leh himna chu mimal nawmna/ dikna aiin a pawimawh zawka ngai an tam a ni.

YMA pawh in selna leh demna neuh neuh te lo tawk thin mahse a thil tum leh duh ber chu Mizo hnam thatna leh hmasawnna hi a ni a. YMA hi awm lo ta se hmanlai atanga kan nunze mawi tlawmngaihna nun te hi tunlai hmasawnna leh changkan inchuh a, intlansiakna khawvelah hian Mizo te nunah hmuh tur a awm tawh lo mai thei a ni.

Chuvang chuan YMA hian Mizo khawtlang nunah hian hmun pawimawh tak a chang a, a la chang zel dawn bawk a ni. Pu C.Lalhmachhuana CYMA President (2023-2025) in a lo sawi tawh ang in “YMA a awm chhung chuan Mizo kan awm ang a, Mizo a awm chhung chuan YMA hi a awm reng ang ” a lo ti tawh a, YMA hi Mizo hnam hmasawnna leh thlavang hauh turin a ding reng ang a, Mizo hnam a awm chhung chuan YMA hi a ral ngai dawn lo a ni.