- Lalmuansanga Khiangte

Ka phak tawkin vawi tam tak ui hlauhawm vulh tura fimkhur a ngaih zia leh intihhmuh chi a nih loh zia hi ka lo tlangaupui tawh thin a. In ti Dog Lovers tam takten an huat viau zel avangin sawi nuam tih loh chang pawh ka ngah thin. Mizorama Hospital hrang hrangte report hi chik ila, Ui Seh case hi a tam em em a ni. Mahse, heng a sehtute hi Mizo Ui kan tih mai a nih thin avangin na taka hliam a tam lem lo.

Hun a lo kal zel a, ram dang ui hlauhawm tak tak lakluh kan intihhmuh chho a. Mahse kan lakluh chak mil hian heng ram dang ui mawl tak tak, khawi fin chawp ngaite enkawl lamah erawh kan thang chak leh si lo. Tin, sawrkar lam lahin heng ui vulh dan turah hian regulation mumal kenkawh a lawi a nei bawk si lo a. Ka hlauh ang chiahin hmeichhe naupang duhawm lutukin dam chhunga pawi tur ser a neih phah ta.

A neitute khan damlo kha ngaihsak eng ang mahse kha hmei­chhe naupang future kha a chhe vek ti ila a na lutuk lo ang chu maw. Chuvang chuan midang chhiat vek theih­na tur hi kan kawl reng tih hi ui hlauhawm vulh tute hian kan vawn reng a ngai.

December 6, 2023 khan thla thum chhungin heng ui hlauhawmte khapna dan tur duang fel tur hian Central sawrkar a lo hriattir tawh a. Heng ui breed hlauhawm an sawi zingah hian Pitbull, Terriers, Ameri­can bulldog, Rottweiler, Japanese Tosa, Bandog, Neapolitan Mastiff, Wolf Dog, Boerboel, Presa Canario, Fila Brasileiro, Tosa Inu, Cane Corso, Dogo Argentino leh heng uite nena cross breed ho hi a tel a ni. India sawrkar hnuaiah hian Municipal Corporation hrang hrangte hian Ui breed hlauhawm vulh phal loh an nei fur a. Delhi Municipal erawh chuan ui hlauhawm zualte vulh phalna hi a nei a.

The Legal Attorneys & Barristers Law Firm te chuan October 2023 khan he phalna dan hi hlip a, ui hlauhawmte vulh phalna hlip turin petitiona thehlut a. Mahse he an petition hi hnawl a ni a. December 2023 khan theh lut lehin Delhi High Court chuan Central sawrkar hnenah thla thum chhunga duang fel turin a hriattir ta a ni.

State dang chu thuhran ni ta se la. Mizoramah hian heng ui hlauhawmte vulh phalna emaw phal lohna dan hi kan ngaihsak lo em em a. Ramdang ui hlauhawm vulh zngah hian ui hmangaih tak tak an awm tih chu zep rual a ni lo. Mahse, a tam zawkah hi chuan fa­shion chi khatah kan ngai a. In lak changkan nan kan vulh nasa tih chu zep rual a ni lo ang.

Ui vulhtu thenkhat hian Pitbull-te chu ui zaidam leh mihring laka friendly ber a lawm tih an ching a. Enkawl duhdah avang chauhin a lawm an sual an ti thin a. Hei hi thudik pawh lo ni se, enkawl dik loh avanga pawi khawih thei an nih leh lek phei chuan a vulh hi khap hmiah emaw, fimkhur taka enkawlna dan siam a tul hle tihna a ni.

Mizoramah hian kan dan siamtu kan MLA te leh Aizawl leh Lunglei Municipal lamte he lamah hian an thanharh a ngai tak zet. Heng ui hlauhawm zualte hi vulh phal loh mai hi mimal chuan ka support a. Mahse kan vulh duh talh a nih pawhin khuahkhirhna dan mumal tak kan neih hi a tul tak zet tawh a ni.

UI sa eite laka kan thikthu a chhiat ang chiah hian ui leh ran vulh duhdahte lakah kan thikthu a chhiat ve tho a ngai.

1. Ui neitute hian “a hlauhawm loh” ti ringawt zel suh u. A neitu tan lo chuan eng ui pawh a hlauhawm vek.

2. A theih hram chuan ui hlauhawm vulh hi intihhmuh lo ang u. An seh a na satliah a ni lo, an seh tawh an thlah tha duh si lo a, nasa taka hliam a thleng hian a pawi lutuk. Nunna hial an lak hun hi kan hma lawkah hian a awm a nia.

3. Vawikhat awh thut avangin ran hi vulh mai mai suh. An duhawm hun a liam thei a, I dinhmun a inthlak thei tih hria la, an thih thleng a rinawm taka I enkawl huam a nih loh chuan vulh ve ngawt suh.

4. I rante kha I inchhung bak ah chuan chain nghet takin I thlung ngei ngei tur a ni.

5. I ran chak tak kha control zo lo tur kaih tir miah suh. Thlun loh phei chuan kai chhuak reng reng suh.

Ran hi an ngainatawm a, duat phu an ni. Mahse mihring aia pawimawh an awm lo tih hi kan vawng reng tur a ni. Chuvang chuan midangte tina thei tur leh thenawm khawvengte tana hnawksak tur lakah erawh kan inven a ngai.