-HF Rohlupuia, Freelance journalist

Kan pi leh pute khan intodelh tumin hah takin hna an thawk thin. An eizawnna pui ber 'Lo Neih' a ni a, Lo number an pawt a an pawh ang ang kha lungawi takin an vat a,hunawl neilo khawpin an thawkrim thin. Intihhlimna dang nei loin nula leh tlangvalte khan zalen tak leh thianghlim taka hahchawlhna hun an neih­chhun an kut - Chapchar Kut, Mim Kut leh Pawlkut etc. lo thlen hun leh hman kha an chak em em thin. A bik in Chapchar kut hi nula leh tlangval, nu leh pate khan nghak­hlel takin dingdihlipin a lo thlen hun tur kha an thlir thin a ni.

Kan ramah Khawthlang Sakhua ropui tak Kristianna a lo luh atang khan kan hnam Sakhua leh nunphung leh ziarang (Art & Culture) mawi tak kha zawi zawiin Khawthlang sakhua Kristianna-in a chimral (Assimilated) hret hret a, kan sakhua leh hnam ziarang mawi tak kha a lo dalzo ta a. Kan pi kan pu mi huaite dan tha, Mite hriatloha thiltha tih, midangte tana nun pek duhna, Tlawmngaihna te, mikawlh sakawlh hma a zam ngailo, Dam leh tlang khatah thih leh ruam khatah, kawmchhak kawmthlang Anhnah leh Saum Chingal intawm, Zonunmawi khan zawi zawiin zamual min liam san zo ta!!! ava pawi tehlul em.

Eng hnam pawh mahni hnam dan leh nun phung chawsan nachang hrelo chu HNAM BO an ni thin. Mizo hnam dan leh nun ziarang mawi tak kha kohkir theih chang se, Sappui Nun ngailoa Mizo nula leh tlangval fel tak takte hi Zonunmawi tlawmngaihna, Aia upate zahna, Nu leh Pa thuawihna chharchhuahlehna atan kumin Chapchar Kut lo thleng tur hi hmang thei ila ava ropui dawn em!.

Pastor ropui leh zahawm tak Rev. Liangkhaia khan, "Ka damchhung chuan Chapchar Kut leh Mizo Kut hrim hrimte hi hman ka remti lo," a ti a, ka demlo, a thlirna mual leh tlang atang khan a awm tho, Zu leh Sa nawmchennan an hman a hlauh vang anih ka ring. Kum 1979 a lo herchhuak a, Pu Liangkhaia (L) kha a awm ta lo bawk a, Synod lam hotute pawhin Zuhmun Sahmun hlimhlawp bawlna niloin Kristian tak si zalen taka hman an remti ta hlauh mai a, kan va lawm tak em. Lalpa chu fakin awm rawh se.

Kei tehlul pawh Mizo Cultural Club leh kan hotuten Kut Committee member-ah min telh ve a, Kan Education Director zahawm tak Pu Hranthanga (L) hovin, Kut Pa-ah Pu Hrangaia (L) kan hmang a, Mizo Nunhlui zemawi leh kut dan a Mizo thei ang berin Zozia rang phochhuak thei turin Lo vat lai, Inkawibah, Inhnawk, in Arpa sual, Kalchhet nena intlansiak leh hnam lam original chi hrang hrang, Parlam leh Chheih lam etc. nen kan han Chapchar Kut tak tak kha chu ropui nuam dangdai tak a ni.

Kumin KUT lo thleng tur pawh hi Kristian tak leh Mizo zia phawk thei ang berin Van lal Fa (Isua Krista) pawhin telve a chak hial turin hlim leh lawm takin tumah inhawlo leh inngeih takin i Kut tak tak ang u aw. A lenglawk e kei zawng ka dawnin...