- George L.Ralte

Vaivakawn

Kan ram (Mizoram) hi India ram State hrang hrang zing ah chuan leimin tuar nasa pawl kan ni hial awm e. Hei hi a chhan ni ber a lang chu BAWLH­HLAWH PAIH chungchang ah fimkhurna chang kan hriat loh vang a ni ber awm e. Ruah tui a tam chang phei chuan leimin nasa tak avangin nunna hlu tak chan hial an awm thin mai bak ah kan buai thei thin hle a nih kha. He khuarel chhiatna lo thleng thin buaipui hian a bikin Mizoram a kan tlawmngai pawl lian ber YMA mi leh sa te chhanchhuahna hna thawk a tanpui ngai apiang te tanpui hna thawk a kan han che chhuak thin leh sawrkar lam ten an theih ang tawkin an hmanrua neih that ang ang te thawh chhuah puiin leimin avanga chhiat tawk te buaipui hna thawk a an che chhuak han hmuh hian a thlamuan thlakin a lawm awm tak zet a ni.

Leimin hi Mizoram ah chuan ruah tui a tlak dan a zirin kan tuar nasain kan tuar nep deuh niin a lang.Leimin hi chhan hrang hrang avangin a min a,tui hawk luanna tur ah Bawlhhlawh a tam thin avang te a hran a tui hawk luanna tur siam that tawk loh avang te leh tui hawk a luanna tur ni lo kawng dung vel ah tui a luan nasat thin avang te hian Mizoram hian leimin nasa takin kan tawrh phah thin a ni.

Mizoram ah hian hetiang em em a leimin a tamna chhan ni a lang chu nitin a Bawlhhlawh neih paih fimkhur loh vang leh kan ngaihsam lutuk thin vang te hi a ni hial awm e.Nitin a Bawlhhlawh neih thin te hi chhungkaw thenkhat te chuan an then awm ten harsatna an tawk ang tih ngaihtuah miah lova mahni in bul a Bawlhhlawh paih duh mai te hriat tur la awm thin hian in enfiahna tur leh in siamthatna tur tam tak an la nei tih a chiang hle mai.YMA te VC te leh LC lam ten he lai hmun ah hian Bawlhhlawh paih phal loh tih an tar hmu reng chungin a ruk a Bawlhhlawh paih lui an awm thin avang hian khawtlang ah leimin avangin chhiatna nasa tak a thlen thin avangin Bawlhhlawh kan paih dan ah kan fimkhur thar a,kan khawtlang hruaitu ten mahni awmna khua leh veng theuh ah Bawlhhlawh khawn thin lirthei an ruahmanna ah kan Bawlhhlawh neih te paih hram hram thin ila.Bawlhhlawh khawn lirthei luh phak lohna ah kan awm a nih pawn nitin a Bawlhhlawh kan neih te thenawm leh khawtlang ti buai lo zawng a kan sawngbawl thiam a pawimawh tak zet a ni.

Nitin a Bawlhhlawh kan neih te hi khawi ah nge tuiin a len ang a, kan Bawlhhlawh neih te hi a tawih ral thei chi a ni em tih te hi kan ngaihtuah pha ngai hauh awm lo ve.Nakin zel atan mahni tan a pawi thei em? tih te kan awmna leh a chheh vel tan hian a him lo tih te phei chu kan ngaihtuah pha hauh lo ang le.

Thingtlang hmun hrang hrang a cheng te leh Aizawl a veng hrang hrang a cheng te hian nitin a Bawlhhlawh kan sawngbawl dan ah thenawm khua leh veng te entawn turin hma la thar zel ila.Aizawl a Bazar awmna veng a ni emaw thingtlang lam a Bazar awmna veng te pawhin mahni awmna veng Bazar hmun theuh te thianghlim takin enkawl chhunzawm zel ila.Hmun hrang hrang a Bazar a chawhmeh zuar te pawhin mahni hnu hma te mi dang te tih atana kalsan mai lovin fai tak leh thianghlim takin mahni chawhmeh zawrh thinna theuh te kalsan ila a lawm awm ngawt ang.