George L.Ralte

Vaivakawn

Sap tawnga kan hriat lar tak Music tih hi keini mizote chuan rimawi tiin kan dahin kan sawi mai thin a ni. Rimawi han tih ringawt mai chu hetiang hian thiam ang tawkin i han sawi fiah dawn teh ang.

A tawi zawngin rimawi tih hi thil ri awmze nei a a rik hian rimawi kan ti mai thin a ni. Rimawi hian mihring mai ni lovin ran leh thlai te nun ah pawh awmze neiin nasa takin thu a sawi thui thei thin hle a ni. Hnam fing leh hnam mawl zing ah pawh mahni hnam ze milin rimawi hi kan lo nei vek mai a lo ni.Chanchin zirmi ten an lo chhui danin hmanlai atang tawh khan mihring nun ah rimawi hian hmun a lo luah thuk hle tawh a lo ni. Keini mizo Kristian te ngei pawh hian kan sakhaw biakna hmun biak­in ah te leh thil chi hrang hrang atan rimawi kan hmang tangkai mek zel a ni.

Rimawi hian mihring nun ah nasa takin thil a ti thei a, mi a ti lawm a, mi a ti hlim a, mi a ti hlum a, mi a ti mangang thei a, mi a ti thin rim theiin, mi a ti lung ngai thei bawk a ni. Rimawi hre chiang apiangin an ngai hlu a, a tangkai zia an hre tam tawlh tawlh niin a lang. Chu tih laiin a hre chiang lo tan erawh chuan ninawm ah leh thil ho mai mai ah a ngaih theih bawk.

Khawvel a Kohhran siamthat hna thawktu hmasa zing a hming langsar tak Martin Luther chuan rimawi hi khawvel a Pathian thil thlawn pek tha leh ropui zing a pakhat a ti a ni. Tunlai a kan thangthar rimawi lam a tui te hian rimawi hlutna te a duhawmna leh a mawina te hi an la hre tam tawk lo em ni chu aw a tih theih. Chu tih mek laiin kan rimawi ngaih thlak te hi sual kawng min zawh tirtu a ni thin em tih erawh kan in zawh fo a tha awm e. Rimawi kan ngaih thlak duh atang hian mitin te hi kan tanna lam leh kan hawi duh zawng a hriat theih hle a ni tih hi kan chhinchhiah reng dawn nia.

Khawvel a changkang mek zel a, Kohhran pawh a thangin hma a sawn mek zel bawk a, rimawi hian thil a tih theih tawh zia leh hma a sawn tawh zia chu sawi ngai lovin a hretu kan ni theuh awm e. Rimawi hi Pathian fakna leh chawi­mawina hmanraw pawimawh tak mai niin Pathian biak inkhawm kan neih thinna ah pawh tun aia uluk leh uar zawk rimawi hi kan hman thiam a tul tak zet a ni. Rimawi hian Pathian leh mihring te chu hip khawmin chung lam ropuina chu lei lam hriat phakin a ti chhuak a, chu rimawi avang chuan mihring ten kan vel a Pathian thil siam ropuina kan lo hmu chhuak thin a lo ni.

Rimawi lam a tan kan lakna tur leh kan hlam chhiah tlat si chu kan hnamin rimawi chi hrang hrang kan neih te chhawn nun leh Pathian fak leh chawimawi nan a hi a ni. Tunlai khawvel hmasawn mek leh changkang mek zel ah hian mizote hi rimawi hman tangkai chungchang ah zawi zawiin kan thang harh mek niin a lang a, Branch YMA a ni emaw Kohhran thalai ang pawh hian hma lakna atan tlak a nih mekna hi ti nung thar zel turin kan in chah ni se. He kan hnam rimawi te hi kan chawi nun loh chuan tu nge chawi nung ang le?