Aizawl : Nimin February 16, 2019 zing khan Law & Judicial, Parliamentary Affairs, Forest leh Transport Department changtu Minister TJ Lalnuntluanga chuan New Champhai-a Mini Sports Complex leh District Sports Committee Pisa sakna tur lung a phum.
Minister chuan, Sports discipline hrang hrang intelkhawmin infiamna kawnga hmasawnna thlen tura hma an la chu fakawm tiin, Champhai District-in infiamna huangah theihna nasa tak a neih thu leh tun dinhmunah pawh volleyball leh discipline hrang hrangahte hlawhtlinna neih thin anih thu, a sawi a, "Hengte hi duhtawk mai lovin kan thlen chin zel atanga hmasawn kan tum tur a ni," a ti.
Minister chuan District Mini Sports Complex leh District Sports Committee Pisa sakna tur lung phum tak chu a lo puitlin hunah pawh Champhai district mai bakah Mizoram puma infiammite tana rohlu leh tangkai tak anih a, infiamna huanga khawvel hmaa zofate phochhuaktu a nih ngei a beisei thu a sawi.