TK : COVID-19 thawh thumna hmachhawn turin inbuatsaih rawh

Admin - Jul 03, 2021

WHO chuan Europe ramte chu lo inbuatsaih lawk turin a chah

Khawvel tuam mektu hripui leng Covid-19 chuan kian lam aiin zual lam a pan chho leh dawn niin a lang a, mithiamte chuan a thawh thumna (third wave) hmachhawn tura inbuatsaih a hun thu an sawi leh chamchi ta mai. 

World Health Organization (WHO) chuan July thla chhung hian a thawh thumna hi a leng leh hmanin an ring a, a bikin Europe ramte chu lo inbuatsaih lawk turin a chah a ni. 

WHO Director-General Tedros Adhanom Ghebreyesus chuan Covid chi thar Delta Variant chu inkaichhawn awlsam leh hlauhawm tak a nih thu sawiin, covid vaccine la lo ten rang takin an inkaichhawng thei tih a sawi. 

Delta Variant hi June thla thleng khan khawvel ram hrang 96-ah hmuh chhuah tawh a ni a, an hmuhchhuahna hmasa ber chu India a ni - kan dinhmun a him lo hle! Delta Variant hi hi tunah chuan khawvelin a buaipui ber pakhat a ni leh mek tawh a, inkaichhawn a awlsam bawk si avangin mithiamte lu a tihai hle. 

Hei mai hi a ni lo, Delta+ Variant pawh hmuh chhuah a ni leh tawh. Delta+ Variant hi April thla khan India ramah hmuh chhuah a ni a, Maharashtra, Kerala leh Madhya Pradesh-ahte hmuh chhuah a ni. 

Alpha Variant pawh ram 172-ah a darh tawh tih WHo chuan a puang a,  Beta leh Gamma te pawh ram 70 chuangah hmuh chhuah tawh a nih thu an tarlang bawk. 

Delta+ Variant chu...
Delta+ Variant pawh hi ram 12-ah hmuh chhuah a ni leh der tawh a, WHO lam pawhin an ngaihven leh tawh hle. AN hmuh chhuahna India-ah chuan state 12-ah a darh tawh a, Union Health Ministry chuan thuchhuah siamin, mihringah nghawng a neih nasat bik thu an tarlang. AIIMS director Dr Randeep Guleria pawhin Delta+ Variant hi a hlauhawm hle tih sawiin, taksa a nghawng nasat bakah thihpui pawh a awl zawk niin a sawi. 

Engpawh nise Covid-19 thawh thumna hi kan hmachhawn leh ngei dawn niin a lang a, engtik hunah nge a lo thlen dawn hriat ni lo mah se lo inbuatsaih lawk a finthlak a, hri danna lo lak lawk a fuh viau bawk ang. 

Share now