DOWNLOAD OUR APP

Read latest news on your phone
app-store

TK : COVID vaccine a hlauhawm em?

Jun 27, 2021

Covaxin, Covishield leh Sputnik V te hman a ni a, mipui hnenah sem chhuah mek zel a ni.

Hripui leng thawh hnihnain rampum a tuam mek a, India hmar chhak pawh kan bang bik lo. Hmarchhak state te tan chuan tun hi a nasat lai ber te pawh a ni hial zawk mai thei a, a damdawi pek chhuah kawngah pawh sawrkar laipuiin chak takin hma a la mek zel. 

Mizoramah ngei pawh COVID-19 vaccine thahnem tak pekchhuah a ni tawh a, pek mek zel a la ni bawk. He tih mek lai hian COVID vaccine thihpui an awm niin social media lamah thu thang hriat tur a awm a, state thenkhatah chuan thihpui an awm ngei tih sawrkarin a puang tawh a, Mizoram-ah erawh thihpui an la awm lo. 

Hlauh tur nge? 
Doctor thiam bikte leh scientist ten uluk taka an enchhin hnu leh fiahna hrang hrang paltlanga an siam COVID vaccine hi him tawk tura ngaih a ni a, chu chu khawvel ram hrang hrangte pawhin an pawm dan a ni. Chutih rual chuan ram hrang hrangin an pawm chin a inang lo a, mipuite hnena an pek chhuah pawh a inang lo nuk mai. 
India ramah chuan vaccine chi thum - Covaxin, Covishield leh Sputnik V te hman a ni a, mipui hnenah sem chhuah mek zel a ni. 

Covaxin hi Bharat Biotech siam niin, Serum Institute of India chuan Covishield an siam chhuak a, Russia siam Sputnik V pawh a lar viau bawk. Covishield hi mipui nawlpui hnena pekchhuah tam ber chu niin, dose vaibelchhe tel sem chhuah tawh a ni.  

Heng vaccine te hi mithiam ten mihring tana him thei ang ber tura an siam a ni a, hlauh tur a awm lo - enchhinna pawh a paltlang hnem. Chutih rual chuan mihring hriselna dinhmun a inchen miau lo a, taksain a lo dawn sawn dan pawh a thuhmun vek thei lo. Thenkhatin ni hnih thum an chauhpui laiin, thenkhat ve thung chuan hna an thawhpui leh nghal bawrh bawrh thei thung. A tlangpuiin vaccine la te hi an khua a sik a, taksa na themthmun an nei bawk. 

Vaccine lakpawlh chungchangah a thatna leh that lohna chiang taka sawi theih a ni lo a, lakpawlh erawh a theih thung. 

German Chancellor Angela Merkel pawhin a vawi khatnaah AstraZeneca vaccine a la a, a vawi hnihnaah erawh Moderna vaccine a la leh daih thung. Hetianga ram hruaitu leh mi chal lang tak tak ten an tih thin chhan pakhat chu vaccine hi a rintlak a ni tih mipui hnena an puanzarna pakhat a ni. 

Mithiam zawkten him tura an ngaih chinah chauh mipui hnenah vaccine hi an pe chhuak thin tih hriat tel a tha bawk awm e.  Delta variant

Hripui len hnuah ram hrang hrangah virus chi dang/insiam dang lam hmuh chhuah a awm nual tawh a, tun laia khawvelin a buaipui ber pakhat chu delta variant an tih hi a ni. Hei hi a hma a mi te aiin a let tam takin inkai chhawn a awlsam zawk a, thihpui pawh a awlsam bik hle niin mithiamte chuan an sawi. 

Hetiang a nih mek lai hian tuna COVID vaccine awmasa te hian delta variant hi a dolet zo ang em tih chu mithiamte lu tihaitu a ni mek a, vaccine chi dang pawh an siam chhuak lo ang tih sawi theih a ni lo. Delta variant hi India ram bakah khawvel ram dang eng emaw zatah hmuh chhuah a ni tawh a, mithiamte lu tihaitu ani mek.

Hripui leng thawh thumna hmachhawn thei kan nih mek lai hian a damdawi siam chhuak kawngah pawh chak taka hmalak zel niin, tunah chuan nasal/intranasal vaccine te pawh sawi rika ni leh tawh. Hei hi chu taksaa chiu luh chi a ni lo thung a, hnar atanga invenna tur a ni tawh thung dawn - virus-in chhuap a thlen lohna turin a veng thei dawn niin mithiamte chuan an sawi. 

Eng pawh nise hripui leng hian engchen nge khawvel a chenchilh dawn hriat a ni si lo - fimkhur em em zel phawt mai ang u. 

Share now