ZALEN July 31, 2023 : Exam chawlh hmanga Tlabunga haw zirlai, kawng chhiat vanga lirthei tlân awm loh vanga tangkhangte chu Mizo Zirlai Pawl Sub-Hqrs. Tlabung ten a thlâwna an chuanna tur lirthei an ruahmansak. 

Hmun danga lehkha zir Tlabunga zirlaite chu tun hnaia exam zawh hnu-a chawlh hmang turin an khaw lamah hian an haw nual a, kawngpui zawh ngam loh vanga maxi cab tiama lirthei tlan mumal a awm loh avangin, an chawlh hun chhung zo tawh mah se an zirna hmun panna tur lirthei remchang an hmu mai lo a ni.

Zirlaite harsatna tawh hi hriain MZP Sub-Hqrs. Tlabung hruaitute chuan, a thlâwna an zirna hmun an pan theih nan ruahmanna siamin lirthei an hmansak a, zirlai 25 bawr vel leh anmahni thlahtuten vawiin khan an lehkha zirna hmun an pan leh hlawm ta a ni.