ZALEN December 11, 2023: Vawiin (Thawhtanni) hian ZPM chuan Party Office-ah chhung inkhawm hun an hmang a, he hun hmanpuitu Chief Minister Lalduhoma chuan, “Ram mipuiin min enchhin a, min enchhin zel turin kan duh. Kan hnathawh atangin mipuiin min endik se, sawrkar leh tlaka min ngaih theih nan tlak huamin hna kan thawk dawn a. Ni 100 chhunga kan tih tur kan puante khawng takin kan kalpui dawn a ni,” a ti.

Lalduhoma chuan, “Inthlan zawh takah khan ka beisei aia tlem kan tling a, kan tlin lohna tam tak chu sum leh pai vang a ni. Sawrkar siamtu ni mah ila sum leh pai hmangin vote kan zawng ve dawn lo. A bikin minority area lamah kan tling mumal lova, ram puma rual taka mipui kan kal tlan theih nan thianghlim takin hma kan la ang. Chief Minister-in works department a chang lo ang kan ti a, works department ka chang lova, bial tin ka enkawlpui vek zawk dawn a ni. Kan dinhmun hi Pathian remruat, kan tawngtai chhanna a ni a. Mipui, neutral-te avangin hnehna kan chang a. Neutral an tam poh leh ram a kal tha dawn a, party ruihchilhna hi kan kalsan tial tial a ngai. Keini ZPM te hian mipui beng kan tithlep tur a ni lo. Keinin mipui kan tih beidawn chuan Zoram mipuite hian beisei tur dang an nei tawh lovang,” a ti.

Chief Minister chuan, “Bial tinin Minister kan duh vek a, mahse Minister bial nih chak hi thil awmdan an hriat tawk loh vang a ni. Mipui sawrkarah chuan Minister leh MLA an inthlau vak dawn lova. MLA-ten Department an enkawl dawn loh avangin bial tan leh ram mipui tan theihtawpin an thawk thei zawk dawn a, MLA taima tak bial nih a hlawk ber zawk dawn. Term hmasaah kan MLA ten tha takin hna an thawk a, an hlimthlaah tunah hian kan awm mek a. Kalphung tharah chuan eng hna pawh a tha hle tur a ni. Mipuiten min thlir reng a, tibeidawngtu kan ni thiang lo. Kan hotute kaltlanga min hunna theuhah mipui beiseina tha theih tawpa kan chhan a ngai.Ram rorelnaa Pathian ram a taka thleng turin kan inbuatsaih a ni,” a ti bawk.