ZALEN, November 21, 2025: KC TVS chuan Zirtawpniah Millennium Centre kawt, Dawrpuiah scooter thar, Ntorq 150cc an khuh hawng a, a hmunah mi 17-in leiin an khalh haw nghal.

KC TVS chuan an showroom, Bawngkawn atanga an pek chhuah nen tlangzarh ni hian 30 dawn an hralh nghal tih an sawi a; dealership inbunna, Aizawlah 70 chuangin an hauh lawk a, district danga an sub-dealer-te hnenah 30 velin an hauh bawk.

Chief Executive Officer Kevin Vanlaltlana chuan Mizoram dealer an nih atangin tun thla hi KC TVS-in kum thum an tlinna a ni a, an beisei aia chakin hma an sawi tih a sawi.

“Kan lirthei zawrhte mipui duh zawng a nih avangin rin aiin kan che tha a, Ntorq 150cc pawh hi hauh lawk a tam a, kan pe seng lo. Sport scooter ni mah se a hmaah thil phurhna a awm avangin a tangkai dawn a ni.

“A neitute tana hamthatna awm leh thei tur chu Ntorq 125 nen part a intawm hnem a; chuvangin, buaina a awm dawn lo. A engine a tha a, hybrid-in a puih telh avangin kawng chho leh tlan chak duh hunah a pui dawn.

“A suspension a tha viau a, tlan chakpui nuam tho siin a sawh a na lo. A tyre a len loh avangin zawhna a awm a, tyre lianin power a heh avangin a chak loh phah zawk a ni,” a ti.

India rama 150cc hyper sport scooter hmasa ber niin an sawi a, Mizoramah Rs 1,35,263 leh Rs 1,44,920-in a lei chhuah theih a ni.

India rama sorkarin lirthei hralh zat a chhinchhiahna, Vahan-ah October, 2025 chhungin KC TVS-in 306 an ziak lut a, November-ah hian ni 20 thlengin 200 an ziak lut tawh a ni.