Aizawl; Mizoram a tlawmngai pawl intelkhawmna, Joint NGO Coordination committee hruaitute chuan ramri hrul buaina thleng vanga Assam lamin kawngpui an dan chah (economic blockade) mek chu chiai lo leh zam lo a hmachhawn turin Mizo mipuite an chah.        

ZALEN in a biakna ah Joint NGO Coordination committee chairman, Central YMA president ni bawk Vanlalruata chuan Assam lamin Mizoram mamawh chawkluhna kawngpui an dan chah mek chungchang ah mipuite kan inlungrual a, kan chhel deuh a ngai dawn tih sawiin, sumdawng leh dawrkaite pawh an thil zawrh ti to lo tur leh chheprelh lo turin a chah a, kawngpui an dan in engti rei ngei a awh dawn hriat a nih loh avangin, tun hi sem sem dam dam tih hman hun tak a nih thu a sawi. 

Mizoram Upa Pawl (MUP) president Lalhuapzauva pawhin, Assam lam kawngpui dan chah vanga zam lo turin mipuite a chah a, kan tharchhuah ah kan inhnangfakna tur a awm thu a sawi. "Economic blockade hi keini  chauhin kan tuar lo a, anmahni pawh an in block," tiin, MUP president chuan, "Zam mai lo in, tuar hram hram ang u," a ti. 

MHIP president T. Lalthangpuii chuan, mipuiten chiai lo in, sawrkar hmalakna kan rin ngam a ngai tih a sawi a, inrenchem taka khawsak kan thiam rih a ngaih thu leh ram leh hnam thil a nih vangin party sawi lo a, inlungrual taka sawrkar hmalakna tawiawm a tul thu a sawi.

Assam lam in kan eibar lak luhna kawngpui min dan chah sak leh chu tha nat thlak a tih thu sawiin, MZP president B. Vanlaltana chuan, kan mamawhna leh min mamawhna a danglam bik lo tih hre turin Mizo mipuite a chah. "Kan hnenah lo bungraw hralhna an nei bik lo tih hriain, engkimah duham fal bik nih tum lo i la, a thlum a al ei za thin hnam ze ropui neitu kan nihna parvul thar tir leh i la, riltam a min dan beh tum tute mangang hmel hmu ngei turin i tang tlang ang u," a ti.

Mizo Students Union (MSU) president J. Lalmuanzuala pawhin, mipuite chiai lo tura chahin, Assam lam chauh mamawh lakluhna kawngpui a awm loh thu leh Tripura atangin mamawh chawkluh mek a nih tawh thu a sawi. Dinhmun harsa zawkte hrethiam chung leh tawrh a tul pawh a tuar tlang a, a awm awm ei za tura sem sem dam dam tih rilru putlang turin mipuite a chah bawk.