KAMKEUNA: He thumal Isua zirtirte zat chiah hawrawp 12 infinkhawm, lamrik zawng pawha min hneh em emtu hi khawvel hnamdangte hian keini ang chiah hian thumal hlawm ffelfai thlapin an nei ve hauh lo niin a lang. A awmzia lah a ril em em a, hringnun chawmtu leh a taka midangte tana malsawmna thlentu a ni. Mirethei leh Hausa, Mipa leh Hmeichhia, naupang leh puitling, mihang leh mi ngo emaw chi leh kuang leh hnamdang a thliar hek lo. A mamawhtu apiangte tana englaipawha hmanraw tangkai a ni. A AWMZIA: Tlawmngaihna hi khawvel hnamdangte hian a awmze tlukpui dik tak an nei ve meuh lo niin a lang. Grik tawng leh Latin emaw, Hebrai tawng pawhhin thumal hlawm fel fak chuan an nei bik kher lo mai thei. Kan hriat phak ve chin Saptawng leh Hindi-ah pawh a awm lem lo niin a lang. Saptawng Dictionary kan hmuh phak ve chinah chuan Tlawmngaihna hi “(n) unselfishness, self sacrifice, self denial perseverance” tiin hrilfiah a ni a, a awmze dik tak a phawk fuh chiah loh bakah thumal hlawm fel tak, a tlukpui tur a awm lo niin a hriat theih. Hindi pawhin Tlawmngaihna hi “Aatmabalidan emaw Aatmatyag” tiin an hrilhfiah ve mai a, heng an hrilhfiahna hi Mizotawng chuan “Mahni inpumpek emaw Mahni inphat” tihna a ni thei ang. Tlawmngaihna tih thumal phawk chiah chu an nei lo niin a ngaih theih. Chutiang bawkin Saptawnga hrilfiahna pawh khian a awmze dik tak chu a phawk chuang lo niin a lang. Mizo hahthlak zinga kan unau tawng zerang dang hmangte pawh hian a tlukpui an nei chiah cuiang lo niin a lang. A bikin kan unau Mara-hote pawh hian an tawngah a tlukpui an neih chiah loh avangin an tawng kar lakah an lam dawn chuan a ngai ngaiin an hmang ve mai thin niin a lang. A TOBUL: Tlawmngaihna hi khawi atanga kan neih nge tih I chhut ngai em? Vawiin thleng hian mi tam takin YMA chin chhuah emaw tiin an thusawinaah pawh an sawi fo thin. YMA chin chhuah ni lovin Mizo hnam awmtirh atanga Pathian thilthlawn pek, Mizo hnamziaa bet tlat zawk niin a ngaih theih. YMA din hma daihin Mizote hian Tlawmngaihna leh a tawngkam hi kan nei tawh a, YMA chu a chhawmnungtu zawk a ni tih kan hriat fo a pawimawh. YMA chhawmnunna hian tun thlengin Tlawmngaihna hi Mizo zingah mawi takin a la parvultir zel a ni tih erawh kan pawm thiam a pawimawh hle. A RAH CHHUAH: Tlawmngaihna hlu tak kan neih avang hian Mizo nih a nuam em em a, mangan lungngaih, chhiatni thatniahte a taka kan hman tangkai thin avangin phairama chengte ai chuan kan dinhmun a rualkhai zawk hle a, Hausa leh rethei inthlarna pawh a la nep hle tih a hriat theih a va lawmawm em! Hei vang hian hnamdang kan zinga khawsa thinte paw'n nuam an ti a, kan zinga in leh lo ngial nghet taka benbel ve an chak hle thin. Vai in sa mistiri leh helper chenin nuam an ti em em a, khauphar thawven takin an thawveng a, khawlaia veivah nuam an ti hle tih a hriat theih. Thih hnua kan insawngbawl Dan leh inchhawmdawlzui dante hi an hmuhin mak an tih rualin tha an ti a, an awt ve hle thin. Aizawl Veng pakhata mithi ina Australian sap pakhat kal ve chuan kan insawngbawl Dan a hmuhin a awt em em a, video camera-in a la char char a, “Kan ramah chin ve tura zirtir atan ka duh takzet a ni,” a ti hial a ni. Vai Mistiri helper palhat pawhin, “Mizo nih hi a nuam awm mang e, Kristiana inleha Mizo nula nupuia neiha Mizorama inbelbela damchhunga awm ka châk,” a ti ngawih ngawih thin. An ram lama chhutia a haw laiin a pum a na thut a, a boral zui ta a , a duhna puitlin hman lovin a awm ta a ni Tlawmngaihna kan chhawm nun tlat avangin khitiang khawp khian hnamdangte paw'n kan zinga awm leh Mizo nih an chak phah a, min entawn a, min zir ru reng thin a ni tih kan hriat a pawimawh. TUNA KAN DINHMUN: Khawvel hnamdang leh ramdangte neih ve loh Tlawmngaihna hlu tak nei mah ila tuna kan dinhmun erawh kan bihchian a ngai ta. Thenkhat chuan YMA hmalakna kher lo chuan mirethei chhumchhia chhawmdawl an tum ta lo niin a lang. Zonet, LPS cable news leh Media hrang hranga puan chhuah leh tihlan beisei chunga tlawmngaih chhuah chakte pawh kan tam ta niin a lang. Khawihmunah pawh tlawmngaihna hi kan lantir a ngai tih I hrenawn mawlh ang u. Aizawl khawpui veng thenkhatah hian mirethei leh hausa kan thliar tan hle em tihte kan inenlet a tul ta hle. Tlawmngaihna erawh chuan tunah a thliar ve si lo. A letleh beisseina avanga tlawmngaihnate hi Mizo tlawmngaihnain a tum a ni lo. Chutiangte chu Pharisaite pawhin an ti ve thin asin! Chuvangin, a letleh beisei chungin tu chungah mah tlawmngaihna kan lantir loh a tha hle ang.Tin, tlawmngaihna hian thleibik a nei tur a ni lova, midangte tiha dah tur a ni hek lo. A hnuleha hmingthan mawina beisei vangin tlawmngaih kan chhuah tur a ni hek lo. Tanpui ngaiten an mamawhna ang takin an mamawhna zawnah beisei nei miah lova kan tanpui thin hi Tlawmngaihna dik tak chu a ni e.