Aizawl March 9, 2024 : March 8, Zirtawpni, 2024 khan Mizoram Christian College chuan Zirtawpni chawhnu apianga Co-Curricular Activities an neih thin hmang tangkaiin, Serlui A Hydel Project bulhnaia Tlawng lui fintu thenfai hnatlang an nei a. 

He hunah hian ram leh hnam hmangaihna leh khuarel enkawlna kawnga inzirtirna an nei nghal a. Zirtirtuten thusawina hun hmangin zirlaite chu an graduate ruala ram hmangaihna thinlung graduate pui tur leh ram rohlu, thing leh mau, nungchate leh lui neihchhunte vawnhimna leh enkawlna kawnga mawhphurtu an ni tih inhria a, anmahni theihna zawn theuhah an mawhphurhna hlen ngei turin an fuih a ni.