Aizawl: Congress Thalai (MPYCC) chuan Aizawl chawmtu Tlawng tui a kâm avanga tui ‘pump’ tur a awm meuh lo nia sawi chu a dik lo nia sawiin, 'Tui hi pump sén loh a awm, thal tui tlem lai ber pawhin Reiek kai Aizawl chawmtu Tlawng luiah hian nitin tui litre maktaduai 34 (34 MLD) a pump thei a ni,' an ti

MPYCC chuan Zirtawpni khan an President Dr. Lalmalsawma hovin Aizawl khawpui tui lakna hmun hi an tlawh tih an sawi a. MPYCC President chuan, "Tlawng lui hi Reiek kai lei chhakah Raw Water Pump-I awmin hemi zawnah hian tui khuahna (Weir) Metre 4 (Feet 13 vel) laia sangin khuah a ni a, hei hian a chhak lam KM 2 dawna thui Tlawng lui hi engtiklai pawhin a khuap tling reng a. Raw Water Pump-I-ah hian kuminah tui 'pump' chhuah tur awm loh lai a awm lo a, a thlanga Raw Water Pump-II tuikhuah an siamah pawh tunah hian tui 'pump' tur a awm reng tih a hmunah hian kan finfiah a ni," tiin tui 'pump' tur awm lo khawpa a kâm ngai loh thu a sawi. 

"PHED lam hotu pakhat hnen a?anga thudawn dànin kumina tui a kâm lai ber pawh khan ni khata 'pump' chhuah theih zat litre maktaduai 34 'pump' tur awm lo khawpa tui a tlem lai a awm lo," a ti a. Tui pump thei lo khawpa PHE Department-in harsatna an tawk hnem lutuk chu a Department enkawltu Minister inthlahdah vang leh a ngaihven tawk loh vang niin MPYCC President chuan an sawi bawk.

Dr. Lalmalsawma chuan ramngaw humhalh leh lui hnar ven uluk a pawimawh zual zia sawiin, "Kan sawrkar hunlai atang tawh khan Reiek kài chhak lam KM 2.5 hi PHED leh Branch YMA pahnih Ailawng leh Maubawk te nen thawk hovin lui bula thing, mau leh balu thlengin humhalh a ni a, Sangha pawh humhalh a ni tel bawk. He hmalakna hi khauh zawka kan kalpui chhoh zel a pawimawh tak zet a, Mizoram hmun tinah tuihna leh luipui kam ram ngaw kan humhalh nasat zual a ngai," a ti bawk.