West Bengal-a East Medinipur district-a rorel lai, Trinamool Congress (TMC) hruaitu pakhat chenna ina thil puakah mi pathum an thi.

Thil puak hi Contai atanga km 40 vela hla, TMC hruaitu hlun, Abhishek Banerjee-a’n Inrinnia vantlang inkhawm a neihna tur hmun, Naryabila khuaa thleng a ni.

Zirtawpni zan dar 11:15 vela TMC booth president chenna ina puak a ni a. In pawh a chhia tih thuneitute chuan an sawi.

“A puah chhan hi hriat theih chiah la ni lo mah se a thawk na hle a, hluma sak in leh a chung di chu a thlawh darh vek a ni,” tiin police officer-in news agency PTI a hrilh.

BJP chuan TMC hruaitu inah hian tualchher bomb kam luih niin an sawi a. BJP National Vice President Dilip Ghosh chuan, “He state-ah hian bomb siam chhuahna industry chiah a thang duang,” a ti bawk.

CPI (M) hruaitu, Sujan Chakraborty chuan he thil thlengah hian Chief Minister Mamata Banerjee a ngawi tlat chu mak a tih thu leh thu a neih thuai a beisei tiha  sawi.

TMC State General Secretary Kunal Ghosh chuan Bengal-a eptute chu finfiahna engmah nei si lova rorel lai party beih mai an awlsam lutuk niin a sawi.

West Bengal-ah hian kum tharah panchayat inthlan a awm dawn a, police chuan tual chher bomb leh ralthuam dangte vaiin an man nual tawh.

Rorel lai, TMC chuan Chief Minister Bannerjee-i’n inthlanna muanawm tak a awm theih nan police-te chu hma la nasa turin a ti tawh tih an sawi.

Kum 2018-a panchayat inthlan hnuhnung berah khan tharum thawhna a thleng nasa hle a. TMC-in chiang taka hnehna changin BJP chu pahnihna an ni.