Aizawl : Nimin khan Mizoram Pradesh Congress Committee te chuan Covid-19 hripui avanga harsatna tawk mek TNT camp tan tanpuina - tel, sangha tin, alu, purun leh dal thahnem tak an hlan.

MPCC aiawh hian an party-in Covid-19 hripui leh a nghawng buaipuitu tura an din MPCC Covid-19 Monitoring Committee te chuan tanpuina hi TNT camp-ah an hlan a, TNT aiawh hian camp director H Vanlaldika, secretary R Malsawmtluanga leh TNT hruaitu dangte'n an lo dawng a ni.

Inhlanna hmunah MPCC Covid-19 Monitoring Committee chairman CS Thanga chuan Mizoram sorkar in TNT ah Covid 19 mass testing-an ti chu an lawmawma tih thu a sawi a, Mizoram pumah tih nise tia MPCC President-zahawm tak, Dr Lal Thanhawla statement a siam kha sawrkar hian ngai pawimawh in a rang thei ang berin kalpui turin kan duh a ni, a ti.

Test tam a, inenkawl ran a tul thu sawiin CS Thanga chuan, "Congress party-chuan sawrkar hi pawisa nei lo chung chunga thil ti tûrin kan phut loa, pawisa an neilo emaw harsatna dang engemaw an nei a nih pawhin, eptu party te, NGO te leh kohhran hruaitute hnen ah an harsatna te hi thlen hreh loin, he hripui do nân kan ram in a mamawh RT-PCR khawl hi atam thei ang ber bun nise, tin, MLA zahawm tak Pu Zodintluanga Ralte in a lei RT-PCR khawl bun lova sorkar in chhuanlam siam reng lo in, chhim lam mipui mamawh êm em sukiang vat tûrin, party politics dahtha he khawl bun nan a rang thei ang berin hma la se kan duh a ni," a ti.