Lemchan khawvelah chuan a ni aia hriat hlawh an awm lo ang tih tur hial a ni, mahse hmangaihna zinkawngah chuan a tluang vak bik lo. American actor Tom Cruise hi a kawppui Elsina Khayrova nen an inthen tih khawthlang media te chuan an tarlang. 

'Mission: Impossible - Dead Reckoning Part One' star Tom Cruise leh Russian socialite Elsina Khayrova te hian an inkar an titawp a, an inthen chhanah hian Elsina pasal hlui Dmitry Tsvetkov hming pawh a ri ring hle.

Kum 61 mi Tom Cruise leh Elsina (36) te hi nikum December atang khan an in 'date' tan a, thla tam pawh an la inzui hman lo. February thla mai khan an inthen tih thawm hi a ri tan a, Elsina hian a pasal hlui diamond dealer Dmitry Tsvetkov lakah hian fa pahnih a neih bawk si avangin an inkar hi a fuh tak tak thei lo nia sawi a ni. Hetiang boruak karah hian Tom Cruise a rawn tawng chhuak ta nge nge a, Elsina Khayrova nena an inkar chu a tawp tak thu a sawi chiang ta a ni. 

Tom Cruise hi July 3, 1962 khan Syracuse, New York-ah a piang a, lemchan khawvela mi hlawhtling ber zinga mi a ni. Kum 1987 khan Mimi Rogers nen inneiin, kum thum hnu lek 1990 khan an inthen leh nghal thung. Hei hnu hian lemchan lama hriat hlawh tak Nicole Kidman nen innei lehin, 1990–2001 chhung an inkawl a, an inthen ve leh a ni. A lar bakah a hmelthat bawk avangin nupui tur a haichham lo hle a, Katie Holmes nen 2006 khan an innei a, kum 2012 khan an inthen leh a ni. Russian nuthlawi Elsina Khayrova nen pawh an inkawp rei chuang lo a, an inthen thu kan hre zui leh ta a ni.