Aizawl: MNF Party chuan nikum 2018 khan NEDP hnuaiah Tourism department-a hman turin nuai 304.08 dah a ni tiin he sum hi dik lo taka hman nia sawiin mipui sum awmna chin hi hriat an phut tih an sawi.

Nimin khan Aizawl Press Club-ah thuthar lakhawmtute kawmin MNF Vigilance Department chuan Central sawrkarin Product Infrastructure Development for Destination Circuit (PIDDC) Scheme sum a rawn pek thin chu a rawn tihtawp tak avangin an hmalakna laklawh deuhte kalsan lovin anmahni sumin an chhunzawm tih an sawi a. MNF Vigilance Department Secretary David R. Lalsawmtluanga chuan, “Nuai 304.08 hmanna tur ruahman zinga pakhat, Tourist Lodge, Khawzawl-a sakna atan hian Rs. 337,47,000/- dah a niin Contractor M/s Royal Engineering & Architectural Consultant, Aizawl hnenah Rs.324,66,200/- senga thla 18 chhunga sa zo turin Work Order ni 13.02.2014-ah pek an ni,” tiin a sawi.

“Pawisa a awm tak loh avangin laklawh takin hna hi chawlhsan a ni ta a ni. Khawzawl Tourist Lodge sak chhunzawm nan kum 2018 inthlan dawn khan NEDP sum Rs 304,08,000/- lai mai chu sawrkar lehkha No. D. 21018/35/2016-TOUR Dt. 5.Oct.2018 hmangin an la chhuak a. Tuna kan hriat theih chinah Khawzawl-a Tourist Lodge sakna tur sum hi a awmna chin hriat lohin a khuangcher bo ta hmak,” niin a sawi bawk.

MNF Vigilance secretary chuan, “Tourist Lodge sak mek pawh chhunzawm lohin a la awm ta reng a. Sum bo chungchangah hian PC Chuauhnuna, Khawzawl Darngawn Veng chuan ni 24.05.2019 khan Lokayukta Chairperson hnenah Complaint a thehlut ta hial a ni,” a ti zui bawk.

MNF Vigilance Department hruaitute chuan Khawzawl-a Tourist Lodge sakna tur chauh ni lovin ni 05.10.2018-a sawrkar lehkha No. D. 21018/35/2016-TOUR hmanga Sanction NEDP sum cheng nuai 304.08 pawh a boa nia sawiin heng sum bo hi zawng chhuak tur leh thil tisualtu an awm a nih chuan dan anga hremna pe ngei turin MNF chuan thuneitute an ngen tih an sawi bawk.

Zawhna chhangin MNF hruaitute chuan tuna mi lo pawh vaibelchhe 99 bo a awm nia an hriat thu sawiin hei pawh hi an chhuizui mek tih an sawi a. Sum bo chungchangah hian khatih laia Minister kha a mawhphurtu nia an hriat thu an sawi bawk.