Aizawl: Chief Minister Zoramthanga chuan, “Tourism hi Mizoramin pawisa a lakluh tam theihna a ni,” a ti.

Ni hnih awh Anthurium Festival kharna inkhawm, nimin Reieka neih a hmanpuinaah he thu hi sawiin chief minister chuan, “Delhi leh khawpui lian tak takah chuan boruak thianghlim lo avangin an hriselna thlengin nghawng tha lo a awm phah thei a. Mizoramah erawh a thlawnin boruak thianghlim tak hip tur kan neite hi kan vanneihna a ni,” a ti a. “Heng kan ram nawmnate hi khualzin hipna atan, sum lakluh nan te, ruahmanna hrang hrang siama sum chungchangah pawh financial institution lian tak takte dawrin a tul anga bawhzui zel tum a ni,” a ti bawk.

Khualzahawm, Tourism Minister Robert Romawia Royte chuan tourism hmasawnna atana sawrkarin hma a lak dan sawiin, chung zingah chuan department-in hmalakna êng ‘Infrastruture Revolution’ chu Reiek leh Ailawng tlangdungah a kalpui mek tur thu a sawi a. Hmachhawp siam zingah PRASAD scheme hnuaia project dah a nih thu te, hmun dangah pawh project dang hrang hrang siam a nih thu te a sawi bawk. 

Kut kharnaah hian Govt. Dy. Chief Whip Lalrintluanga Sailo, MLA leh Chief Secretary Renu Sharma ten thu an sawi bawk.

Anthurium Festival atan hian Ministry of Tourism chuan Rs. nuai 25 (Festival Fund) a tumsak a ni.