Aizawl: Aizawl traffic police chhinchhiah danin nikum chhung khan dan bawhchhia lirthei 16,053 an man a, hemi atanga pawisa chawi tling khawm chu Rs. 57,65,050 a ni.   Traffic Police kum 2018 chhunga lirthei danbawhchhia an man zingah two wheeler a tam ber a, 10,671 a ni. LMV 3,554, taxi 1,294, HMV 385 leh bus 145 an man bawk. Lirthei dan bawhchhia an man zingah signal pawisak loh vanga man an tam ber a, mi 6094 an man a. A dawttu chu hun phal lohna hmuna lirthei hung (no parking) a ni a, mi 4834 an man bawk. Hei bakah hian driving licence nei loa khalh mi 1,719 an man a, zu nam chunga khalh vanga man chu 383 an ni a. Registration number ziah dan dik lo leh mumal lo vangin mi 215 an man bawk.